16/04/2026
रानीसैन संरक्षण तथा दिगो विकासका लागि वडा अध्यक्ष मंगल बुढाद्वारा प्रस्ताव बुझाइयो।
उमेश थापाः- बाजुराको हिमाली गाउँपालिका -३ नं. का वडा अध्यक्ष मंगल बुढाले रानीसैन क्षेत्रको संरक्षण, सुधार तथा दिगो विकासका लागि सम्बन्धित निकायमा मिति २०८३-०१-०२ गते दिउसोको ४ः०० बजे वडा अध्यक्ष मंगल बुढाले प्रस्ताव बुझाउनु भयो । यसैक्रममा वडा अध्यक्ष मंगल बुढाले संस्कृति, पर्यटन तथा नागरिक उड्डयन मन्त्रालय समक्ष प्रस्ताव बुझाउनुभएको हो।
प्रस्तावमा पर्यावरणीय, जैविक तथा धार्मिक दृष्टिले महत्त्वपूर्ण मानिने रानीसैन क्षेत्रलाई व्यवस्थित संरक्षण गरी पर्यटकीय गन्तव्यका रूपमा विकास गर्नुपर्ने माग गरिएको छ। प्राकृतिक सौन्दर्य, दुर्लभ वनस्पति, जडीबुटी, वन्यजन्तु तथा धार्मिक महत्त्व बोकेको उक्त क्षेत्रलाई संरक्षण गर्न नसकिए यसको मौलिकता हराउने जोखिम पनि बढेको अध्यक्ष मंगल बुढाले जानकारी दिनुभयो ।
वडा अध्यक्ष बुढाले रानीसैन क्षेत्रलाई संरक्षणसँगै स्थानीय विकासको आधारका रूपमा अघि बढाउन आवश्यक रहेको पनि जानकारीदिनुभयो । उहाँले पदमार्ग, विश्रामस्थल, दृश्यावलोकन स्थल, सूचना बोर्ड, धार्मिक संरचना संरक्षण, सरसफाइ तथा सुरक्षा व्यवस्थापनका लागि बजेट विनियोजन गर्न माग गर्दै प्रस्ताव बुझाउनुभएको हो।
उहाँका अनुसार रानीसैन क्षेत्रलाई संरक्षण अभाव, अव्यवस्थित चरिचरन, वन विनाश, डढेलो तथा प्रचारप्रसारको कमीका कारण ओझेलमा परेको छ। समयमै आवश्यक योजना अघि नबढाइए जैविक विविधता र पर्यटन सम्भावना दुवै कमजोर हुने खतरा रहेको अध्यक्ष बुढाले औंल्याउनुभयो।
स्थानीयवासीले पनि रानीसैन संरक्षणको पहललाई सकारात्मक रूपमा लिएका छन्। उनीहरूका अनुसार क्षेत्रको विकासले आन्तरिक पर्यटन प्रवर्द्धन हुनुका साथै होटल, यातायात, कृषि उत्पादन बिक्री, हस्तकला र गाइड सेवाजस्ता क्षेत्रमा रोजगारी को सिर्जना हुने बताउनुभयो ।
प्रस्ताव मार्फत वडा अध्यक्ष मंगल बुढाले रानीसैन क्षेत्रको दीर्घकालीन गुरुयोजना निर्माण, आवश्यक बजेट, प्राविधिक सहयोग र संरक्षण कार्यक्रम तत्काल अघि बढाउन सम्बन्धित निकायसँग माग गर्नु भयो ।
यसमा हजुरहरुको राय सल्लाह के छ comment गर्नु होला ? धन्यवाद
