30/08/2025
मेरुदण्डीय पक्षघात समूह नेपालको १० औ साधारणसभा तथा ५ औ अधिवेशन सम्पन्न । अधिवेशनबाट झरना राना मगरको अध्यक्षतामा नयाँ कार्यसमिति चयन ।
१४ भदौँ २०८२, नबराज सोती ।
मेरुदण्डीय पक्षघात समूह नेपालको १० औ साधारणसभा तथा ५ औ अधिवेशन जोरपाटी काठमाण्डौँमा सम्पन्न भएको छ ।
गोकर्णेश्वर नगरपालिकाका प्रमुख दिपक रिसालको प्रमुख आतिथ्यता तथा राष्ट्रिय अपाङ्ग महासंघ नेपालका संघिय अध्यक्ष देवीदत्त आचार्यको विशेष आतिथ्यतामा उद्घाटन १० औ साधारणसभा तथा ५ औ अधिवेशनमा स्पाइनल इन्जुरी पुनर्स्थापना केन्द्रका सस्थापक कनकमणि दिक्षित, गोकर्णेश्वर नगरपालिका वडा नं. ८ का वडा अध्यक्ष नन्दलाल श्रेष्ठ, राष्ट्रिय शहिद तथा शान्ति पार्कका अध्यक्ष सुदर्शन सिग्देल, भगवती युवा क्लबका अध्यक्ष शिव कारजित, नेपाल युथ फाउण्डेशनका कार्यक्रम अधिकृत रिता महत, Asterisk International Service Pvt. Ltd. का प्रवन्ध निर्देशक नारायण कृष्ण खरेल, नेपाल नेत्रहीन संघका उपाध्यक्ष भाबुजङ थापा लगायतको आतिथ्यता रहेको थियो ।
कार्यक्रममा मेरुदण्डीय पक्षघात समूह नेपालको १० वर्षे यात्रामा महत्वपूर्ण योगदान पुर्याएको भन्दै व्यक्तितर्फ कृष्ण खड्का र सस्था तर्फ , नेपाल युथ फाउण्डेशन र Asterisk International Service Pvt. Ltd. खादा माला र प्रशंसापत्र सहित सम्मान गरिएको थियो ।
कार्यक्रमलाई सम्बोधन गर्नुहुदै स्पाइनल इन्जुरी पुनर्स्थापना केन्द्रका सस्थापक कनकमणि दिक्षितले मेरुदण्ड पक्षघात अपाङ्गता भएका व्यक्तिहरुको हक अधिकारका लागि मेरुदण्डीय पक्षघात समूहले खेलिरहेको भूमिकाको प्रसंशा गर्नुभयो ।
त्यस्तै राष्ट्रिय अपाङ्ग महासंघ नेपालका संघिय अध्यक्ष देवीदत्त आचार्यले मेरुदण्ड पक्षघात अपाङ्गता भएका व्यक्तिहरुलाई अपाङ्गताको छुट्छै वर्गमा समावेश गर्न महासंघको तर्फबाट सिफारिस भएको र अब हुने अपाङ्गता सम्बन्धिको ऐन संशोधनमा उक्त विषय संशोधन भएर आउने विश्वास व्यक्त गर्नुभयो ।
मेरुदण्डीय पक्षघात समूह नेपालको १० औ साधारणसभा तथा ५ औ अधिवेशनलाई सम्बोधन गर्नुहुदै कार्यक्रमका प्रमुख अतिथि समेत रहनुभएका गोकर्णेश्वर नगरपालिकाका प्रमुख दिपक रिसालले मेरुदण्डिय पक्षघात समूह नेपालका हरेक अभियानमा नगरपालिकाको साथ सहयोग रहदै आएको र आगामी दिनमा त्यसलाई निरन्तरता दिने प्रतिबद्दता व्यक्त गर्नुभएको थियो ।
कार्यक्रमलाई अध्यक्षता गर्नुभएका मेरुदण्डीय पक्षघात समूह नेपालका निवर्तमान अध्यक्ष रिशिराम ढकालले दश वर्षे यात्रामा निकै दुखका साथ यो स्थानमा पुर्याएको र नेत्रृत्व हस्तान्तरणको विषय सामाजिक संघ सस्थाका लागि सकारात्मक अभ्यास भएकाले आगामी नेत्रृत्वले सस्थालाई थप उचाइमा पुर्याउने विश्वास व्यक्त गर्नुभयो ।
मेरुदण्डीय पक्षघात समूह नेपालको ५ औ अधिवेशनबाट झरना मगरको अध्यक्षतामा ११ सदस्यीय नयाँ कार्यसमिति चयन गरेको थियो । अधिवेशनले उपाध्यक्षमा कृष्ण प्रसाद भण्डारी, महासचिवमा केशव थापा, सचिवमा राजेन्द्र खनाल, कोषाध्यक्षमा तारा प्रसाद पाण्डे साथै सदस्यहरुमा संगिता माझि, लक्ष्मी कुँवर, राम बहादुर तामाङ, राम प्रसाद विक, सरिता कोइराला र डोल बहादुर बस्नेतलाई चयन गरेको हो ।
#अपाङ्गताआवाज #आवाजबिहिनहरुकोआवाज
