11/06/2026
‘२ रुपैयाँ पनि बेइमानी गरेको प्रमाणित भए सार्वजनिक जीवन छोड्छु’ - अर्थमन्त्री वाग्लेको चुनौती
अर्थमन्त्री स्वर्णिम वाग्ले ले बजेट निर्माण प्रक्रियामा करका दर चुहावट गरेको तथा आर्थिक विधेयकमा अनधिकृत फेरबदल गरेको आरोप अस्वीकार गर्दै आफूविरुद्ध नियोजित दुष्प्रचार गरिएको बताएका छन् । प्रतिनिधि सभामा बिहीबार जवाफ दिँदै उनले आफूबाट २ अर्ब होइन, २ रुपैयाँ मात्र बेइमानी भएको प्रमाणित भए पनि मन्त्री पद मात्र होइन, सम्पूर्ण सार्वजनिक जीवन त्याग्न तयार रहेको घोषणा गरे ।
विपक्षी दलहरूले आर्थिक विधेयकका १६ पृष्ठ गायब पारिएको आरोप लगाएपछि मन्त्री वाग्लेले त्यसलाई प्राविधिक कारणले भएको पृष्ठ सङ्ख्या परिवर्तन मात्र भएको स्पष्ट पारे । उनका अनुसार जेठ १५ मा संसद्मा प्रस्तुत विधेयकमा केही भाषिक तथा प्राविधिक त्रुटि देखिएपछि जेठ १७ मै विधिवत रूपमा सच्याइएको पाना राखिएको थियो । संसद्मा पेस भइसकेपछि एउटा अक्षर वा अङ्कसमेत थपघट नगरिएको उनको दाबी छ ।
बजेटअघि कर बढ्ने सूचना चुहाएर केही व्यवसायीलाई फाइदा पुर्याइएको आरोपबारे पनि उनले प्रतिवाद गरे । व्यवसायीहरूले सम्भावित कर परिवर्तनको अनुमान गरेर बजेटअघि नै योजना बनाउने अभ्यास विश्वभर सामान्य रहेको उनले बताए । यदि सूचना चुहावट भएको भए कर घट्ने जानकारी पाएर व्यवसायीहरूले आफ्नै घाटा हुने निर्णय नगर्ने तर्क गर्दै उनले विद्युतीय गाडी आयातसम्बन्धी तथ्याङ्कसमेत प्रस्तुत गरे ।
बजेटको अन्तिम चरणमा कर्मचारीहरू अत्यधिक दबाबमा काम गर्नुपर्ने भएकाले कहिलेकाहीँ मानवीय त्रुटि हुन सक्ने स्वीकार्दै उनले केही प्राविधिक कमजोरी पछि सच्याइएको जानकारी दिए । रगत तथा खोप बोक्ने विशेष सामग्री र सुटकेससम्बन्धी कर व्यवस्थादेखि विद्युतीय सवारीसाधनको सडक दस्तुरसम्बन्धी त्रुटि सुधारिएको उल्लेख गर्दै उनले सरकार सुशासनको एजेन्डासहित अघि बढेको र जनविश्वासमाथि धोका दिने कुनै उद्देश्य नभएको बताए ।
