09/06/2026
महावीर पुन विज्ञान, प्रविधि तथा नवप्रवर्तन मन्त्री बन्दै
काठमाडौँ, जेठ २६ — प्रधानमन्त्री वालेन्द्र शाहले विज्ञान, प्रविधि तथा नवप्रवर्तन मन्त्रालयको जिम्मेवारीका लागि महावीर पुनलाई मन्त्री नियुक्त गर्न सिफारिस गरेका छन्।
प्रधानमन्त्री सचिवालयका अनुसार पुनको शपथ ग्रहण मंगलबार दिउँसो ३ बजे तय गरिएको छ। शपथपछि उनले विज्ञान, प्रविधि तथा नवप्रवर्तन मन्त्रालयको नेतृत्व सम्हाल्नेछन्।
म्याग्दीबाट स्वतन्त्र सांसदका रूपमा निर्वाचित पुन नेपालमा सूचना प्रविधि, अनुसन्धान र नवप्रवर्तनका क्षेत्रमा योगदान पुर्याएका व्यक्तित्वका रूपमा परिचित छन्। ग्रामीण क्षेत्रमा इन्टरनेट सेवा विस्तार, प्रविधिमार्फत विकास तथा नवप्रवर्तन प्रवर्द्धनका लागि उनले लामो समयदेखि काम गर्दै आएका छन्।
पुन यसअघि सुशीला कार्की नेतृत्वको सरकारमा शिक्षामन्त्रीको जिम्मेवारी सम्हालिसकेका छन्। पछिल्लो नियुक्तिसँगै उनी पुनः सरकारमा सहभागी हुन लागेका हुन्।
विज्ञान, प्रविधि तथा नवप्रवर्तन मन्त्रालयमा पुनको आगमनसँगै अनुसन्धान, नवप्रवर्तन, उद्यमशीलता तथा प्रविधि विकासका क्षेत्रमा नयाँ पहल र नीतिगत सुधारको अपेक्षा गरिएको छ। उनको नेतृत्वले देशमा विज्ञान तथा प्रविधिमैत्री वातावरण निर्माण गर्न सहयोग पुग्ने विश्वास गरिएको छ।
मन्त्री नियुक्तिको औपचारिक प्रक्रिया शपथ ग्रहणसँगै पूरा हुनेछ। त्यसपछि पुनले मन्त्रालयको कार्यभार सम्हाल्नेछन्।
