15/07/2025
लोकतन्त्र र महिला अधिकारका लागि दबाव अभियान अन्तर्गत आज बुद्धनगरस्थित गैरसरकारी संस्था महासंघभमा मानव अधिकारकर्मीहरूसँग विशेष संवाद कार्यक्रम सम्पन्न भयो। कार्यक्रममा मानव अधिकारको क्षेत्रमा निरन्तर क्रियाशील ३५ भन्दा बढी अधिकारकर्मीहरूको उल्लेखनीय सहभागिता रहेको थियो।
कार्यक्रममा वक्ताहरूले लोकतन्त्र हजारौं नागरिकको बलिदान, समुदाय तहको संगठित आन्दोलन र लामो संघर्षबाट प्राप्त उपलब्धि भएको उल्लेख गर्दै यसको संरक्षण र सुदृढीकरण नागरिकको साझा दायित्व भएकोमा जोड दिए। लोकतन्त्र केवल कागजी दस्तावेजमा सीमित नरही सबै नागरिकले अनुभूत गर्न सक्ने व्यवहारिक शासन प्रणाली बन्नुपर्ने धारणा राखियो। साथै संविधानमा उल्लेखित नागरिक अधिकारहरूको पूर्ण कार्यान्वयनको आवश्यकता औंल्याइयो।
वक्ताहरूले वर्तमान राजनीतिक नेतृत्वको विभेदपूर्ण अभिव्यक्ति, सोच र व्यवहारले लोकतन्त्रप्रति वितृष्णा सिर्जना भइरहेको र त्यसले लोकतान्त्रिक मूल्य र प्रणालीलाई संकटमा पारेको जनाएका थिए। यस्तो परिस्थितिमा राजनीतिक दलहरूसँग निरन्तर संवाद, बहस र खबरदारी आवश्यक रहेकोमा सहभागीहरूले एकमत व्यक्त गरे।
कार्यक्रममा लोकतन्त्रप्रति विशेषतः युवा पुस्तामा बढ्दो नैराश्यलाई सम्बोधन गर्न लोकतन्त्रका उपलब्धिहरू, ऐतिहासिक संघर्ष, र योगदानबारे अन्तरपुस्तीय संवाद आवश्यक रहेको सुझाव दिइयो। लोकतन्त्रकै कारण प्राप्त गरेका उपलब्धिहरूको मूल्यांकन र अनुभूति गराउनु आजको प्रमुख आवश्यकता रहेकोमा सबैले जोड दिएका थिए ।
अभियान संयोजक डा. रेणु अधिकारीले सहजीकरण गर्नु भएको उक्त कार्यक्रममा गैरसरकारी संस्था महासंघका अध्यक्ष अर्जुन भट्टराईले लोकतन्त्रको सुदृढीकरण बाहेक कुनै विकल्प नरहेको बताउँदै यो अभियानलाई सातै प्रदेशमा, समुदाय तहसम्म विस्तार गरी साझा अभियानको रूपमा लैजाने प्रतिबद्धता व्यक्त गर्नुभएको थियो।
