04/01/2026
मोरङ–१ मा भरोसाको उदाउँदो नेतृत्व: खड्ग फागोप्रति बढ्दो जनसमर्थन
आगामी फागुन २१ गते हुने निर्वाचन नजिकिँदै जाँदा मोरङ क्षेत्र नं. १ मा राजनीतिक सरगर्मी तीव्र बन्दै गएको छ ।
उम्मेदवार छनोटको प्रक्रिया चलिरहँदा यसपटक मतदाता र कार्यकर्तामाझ पुरानै अनुहार दोहोर्याउनेभन्दा परिणाममुखी, जवाफदेही र जनतासँग प्रत्यक्ष जोडिएको नेतृत्वको खोजी बलियो रूपमा देखिन थालेको छ । यही सन्दर्भमा नेपाली कांग्रेसका नेता खड्ग फागो सशक्त र भरोसायोग्य उम्मेदवारका रूपमा उभिँदै व्यापक जनसमर्थन बटुल्न सफल देखिएका छन् ।
पछिल्लो समय पार्टीभित्र शुद्धीकरण र सुधारको आवाज उठाउने अग्रपंक्तिका नेतामध्ये फागो पनि एक हुन् । “नेतृत्व सुध्रिएन भने राजनीति सुध्रँदैन” भन्ने स्पष्ट धारणा सार्वजनिक रूपमा राख्दै उनले केन्द्रिय नेतृत्वसमक्ष निर्भीक रूपमा आफ्नो मत राख्ने साहसी छवि बनाएका छन् । यही स्पष्टता, इमान्दारिता र साहसका कारण उनी कार्यकर्ता तथा युवा पुस्तामाझ झनै लोकप्रिय बन्दै गएका छन् ।
स्थानीय तहमा खड्ग फागोको सक्रियता उल्लेखनीय मानिन्छ । रमितेजस्ता दुर्गम क्षेत्रदेखि उर्लाबारी, लेटाङ र मधुमल्लासम्म उनी निरन्तर कार्यकर्तासँग संवादमा छन् । राजनीतिक भेटघाटमा मात्र सीमित नभई, नागरिकहरू समस्यामा पर्दा समाधानका लागि अग्रसर देखिने उनको व्यवहारले जनविश्वासलाई थप मजबुत बनाएको स्थानीयको भनाइ छ ।
उर्लाबारी नगरपालिकाका पहिलो नगरप्रमुखका रूपमा बहुमत–अल्पमतका चुनौती, राजनीतिक दबाब र विभिन्न मुद्दाबीच पनि डटेर काम गर्ने क्षमता उनले त्यसैबेला प्रमाणित गरिसकेका छन् । हाल नेपाली कांग्रेस कोशी प्रदेश सह–महामन्त्रीको जिम्मेवारी सम्हाल्दै संगठन मजबुत बनाउने र जनभावनाबीच सन्तुलन कायम गर्ने भूमिकाले उनलाई कठिन परिस्थितिमा पनि निर्णय लिन सक्ने परिपक्व नेताका रूपमा स्थापित गरेको छ ।
देशव्यापी रूपमा परिवर्तनको चाहना तीव्र बन्दै गएको यस घडीमा मोरङ–१ मा पनि नयाँ सोच, स्पष्ट दृष्टिकोण र जनउत्तरदायी नेतृत्वको अपेक्षा बढेको छ । जमिनसँग जोडिएको अनुभव, पार्टी सुधारको साहस र जनताप्रतिको निरन्तर प्रतिबद्धताका कारण खड्ग फागोलाई मोरङ–१ का मतदाताले भविष्यको भरोसायोग्य नेतृत्वका रूपमा हेर्न थालेका छन् ।
