11/03/2026
सांसदले पाउने सेवा–सुविधा हेर्नुहोस्👇️👇️
निर्वाचित भएर पहिलो पटक काठमाडौं आउने सांसदले यात्रा खर्च पाउँछन्, तर त्यसका लागि हवाई जहाज वा बसको टिकट संसद सचिवालयमा बुझाउनुपर्छ। उदाहरणका लागि जुम्लाबाट आएका सांसदले जुम्ला–नेपालगञ्ज–काठमाडौंको हवाई टिकट पेस गरे बराबरको रकम पाउँछन्। तर गोरखाका सांसद पोखरा गएर जहाज चढेमा हवाई टिकटको पैसा नपाई सार्वजनिक सवारीको भाडा बराबर मात्र पाउँछन्। यात्रा क्रममा खाना–खाजाको खर्च दिनको २५०० रुपैयाँसम्म, अधिकतम साढे २ दिनका लागि (६२५० रुपैयाँ) दिइन्छ।
सांसदले पाँच वर्षमा एक पटक १५ हजार रुपैयाँ फर्निचर खर्च पाउँछन्। काठमाडौंमा घर नभएका सांसदले मासिक १८ हजार घरभाडा पाउँछन् भने घर भएकाले मर्मत सम्भारका लागि ९ हजार पाउँछन्। मोबाइल बिल र पत्रपत्रिका/अनलाइन सदस्यताका लागि ३ हजार तथा धारा–पानी खर्चका लागि २ हजार रुपैयाँ पाउँछन्।
सांसदको मासिक तलब ६६,०७० रुपैयाँ र १ हजार विशेष भत्ता हुन्छ। संसद वा संसदीय समितिको बैठक बसेको दिन १ हजार बैठक भत्ता र १ हजार सवारी भाडा पाउँछन्। यदि महिनामा १५ दिन बैठक बस्यो भने करिब ३० हजार अतिरिक्त पाउँछन्। यसरी सामान्यतया काठमाडौं बाहिर घर भएका सांसदले करिब ९० हजार र काठमाडौंमा घर भएका सांसदले करिब ८१ हजार हाराहारी सेवा–सुविधा पाउँछन्, जबकि बैठक नियमित चलेमा १ लाखभन्दा बढी पुग्न सक्छ।
अधिकांश दलले सांसदबाट १०–२० हजारसम्म ‘लेबी’ उठाउँछन्। उदाहरणका लागि रास्वपाले एक सांसदबाट १६,५०० रुपैयाँ लेबी लिँदै आएको थियो, जसले पार्टी खातामा मासिक करिब ३० लाख रुपैयाँ जम्मा हुन सक्छ।
हाल सांसदहरूलाई संसदमा व्यक्तिगत कार्यकक्ष दिइँदैन, नयाँ संसद भवनमा भने कम्तिमा एउटा वर्किङ डेस्क दिने तयारी छ। पहिले सांसदले अधिकृत सरहको स्वकीय सचिव राख्न पाउँथे तर दुरुपयोगको आरोपपछि यो सुविधा हटाइएको छ। संसद सचिवालयले सांसदलाई ल्यापटप पनि उपलब्ध गराउँदैन; विधेयकहरू ‘पिजन होल’ नामक व्यक्तिगत बाकसमा राखेर जानकारी दिइन्छ। आवश्यक परे सांसदहरूले संसदको डोमेनमा सरकारी इमेल लिन सक्छन् र सरकारी कामका लागि विदेश जाँदा कुटनीतिक (रातो) पासपोर्ट पनि पाउँछन्।
