22/07/2025
पनौतीमा निशुल्क कृषि तथा पर्यटन पत्रकारिता तालिम संचालन हुने
देशको समृद्धिका लागि कृषि र पर्यटनजस्ता आधारभूत क्षेत्रको सशक्तिकरण अत्यावश्यक छ, र यिनको दिगो विकासमा तथ्यमा आधारित पत्रकारिता एक निर्णायक माध्यम बन्न सक्छ। यही दृष्टिकोणलाई आत्मसात गर्दै एग्रो टाइम्स मिडिया नेटवर्क र पनौती पर्यटन विकास केन्द्रको संयुक्त पहलमा यहि साउन ९ र १० गते पनौती, काभ्रेमा दुईदिने निशुल्क ‘कृषि तथा पर्यटन पत्रकारिता तालिम’ आयोजना गर्न लागिएको छ। देशभरिका युवा, सञ्चारकर्मी तथा पत्रकारितामा रुचि राख्ने विद्यार्थी लक्षित यो तालिमले सहभागीहरूलाई कृषि र पर्यटनको क्षेत्रबारे तथ्यपरक, गहिरो र उत्तरदायी रिपोर्टिङका सीपहरू प्रदान गर्नेछ। कार्यक्रम आयोजकमध्ये एग्रो टाइम्स मिडिया नेटवर्क विगत डेढ दशकदेखि नेपाली कृषि पत्रकारितामा क्रियाशील संस्था हो, जसले ‘समृद्ध कृषि’, ‘कृषि सवाल’, र ‘हेलो किसान’जस्ता कार्यक्रममार्फत कृषकको आवाजलाई राष्ट्रिय मञ्चमा पुर्याउँदै आएको छ। अर्कोतर्फ, पनौती पर्यटन विकास केन्द्रले पनौती क्षेत्रको ऐतिहासिक, सांस्कृतिक र पर्यटकीय सम्भावनाको संरक्षण र प्रवर्द्धनमा सशक्त भूमिका खेल्दै आएको छ। संयुक्त आयोजनाको मुख्य उद्देश्य कृषि तथा पर्यटन विषयमा युवालाई संवेदनशील, जिम्मेवार र खोजमूलक पत्रकारितातर्फ आकर्षित गर्नु हो। तालिमका सहभागीहरूले क्षेत्रीय विशेषज्ञ तथा अनुभवी सञ्चारकर्मीहरूसँग प्रत्यक्ष अन्तरक्रिया गर्ने अवसर प्राप्त गर्नेछन्। देशका मौलिक सम्भावना बोकेका क्षेत्रहरूको प्रभावकारी संचारमार्फत विकास सम्भव छ भन्ने सन्देश यो तालिमले दिन खोजेको छ।
