29/06/2025
🙏🙏
शुभकामना सन्देश
राष्ट्रिय धान दिवस-२०८२ को अवसरमा सम्पूर्ण मधेशवासी तथा देशभरका कृषक दाजुभाइ दिदीबहिनीहरूमा हार्दिक शुभकामना व्यक्त गर्दछु।
कृषिलाई अर्थतन्त्रको मेरुदण्डको रूपमा स्वीकार गर्दै खाद्यान्नमा आत्मनिर्भर बनाउने उद्देश्यसहित मधेश प्रदेश सरकारले "मधेशले देशलाई खुवाउने" दीर्घकालीन अभियानलाई अघि बढाइरहेको छ। "उत्पादन मधेशमा, विस्तार देशमा" भन्ने मूल नाराका साथ कृषि उत्पादन तथा उत्पादकत्व वृद्धि गरी कृषिजन्य वस्तुको आयात न्यूनीकरण गर्दै निर्यात प्रवर्द्धन गर्न प्रदेश सरकार प्रतिबद्ध छ।
धान बालीको उत्पादन र उत्पादकत्व वृद्धि गर्न ‘दुई धान बाली प्रवर्द्धन कार्यक्रम’ कार्यान्वयनमा रहेको छ। माटोको उर्वरता सुधार, सिंचाइमा आत्मनिर्भरता, यान्त्रीकरण, विद्युतीकरण तथा व्यवसायीकरणमार्फत कृषिमा गुणात्मक सुधार ल्याउने कार्यलाई सरकारको उच्च प्राथमिकतामा राखिएको छ।
जलवायु परिवर्तनका असरहरू न्यूनीकरण गर्दै जलवायुमैत्री प्रविधिको अनुसन्धान, विकास र प्रवर्द्धनमार्फत धान बालीको दिगो विकास सुनिश्चित गर्ने दिशा सरकारको मूल एजेन्डा हो। आधुनिक खेती प्रणालीको विस्तार, उन्नत बीउ, मल तथा सिंचाइ सुविधा पहुँचमा ल्याई कृषकको जीवनस्तर सुधार गर्न आवश्यक नीति तथा कार्यक्रम निरन्तर सञ्चालनमा छन्।
राष्ट्रिय धान दिवसले हामी सबैलाई खाद्य सुरक्षामा आत्मनिर्भर बन्ने मार्गमा साझा संकल्प र प्रेरणा मिलोस् भन्ने कामना गर्दै सम्पूर्ण कृषकहरुप्रति सम्मान व्यक्त गर्दछु।
धन्यवाद।
सतिशकुमार सिंह
मुख्यमन्त्री, मधेश प्रदेश
