08/03/2026
प्रिय गगनजी,
जय नेपाल !
नेपाली राजनीतिमा कुनै समय तपाईं आशा, तर्क र परिवर्तनको आवाज भनेर चिनिनुहुन्थ्यो । संसदमा बोल्दा तपाईंले प्रायः भन्नुहुन्थ्यो, “राजनीतिमा जिम्मेवारी हुनुपर्छ, असफल नेतृत्वले पद छाड्नुपर्छ।” आज इतिहासको एउटा रोचक मोडमा, तपाईंले आफैंले बोलेका शब्दहरू तपाईंकै ढोकामा आइपुगेका छन्।
सार्लाही–४ को जनताले यस पटक तपाईंलाई अस्वीकार गरे । तपाईं नेतृत्वको २.० कांग्रेसका कुनै पनि पदाधिकारीलाई जनताले विश्वास गरेनन् र पराजयको तितो स्वाद चखाए । यो चुनावमा तपाईं १२ हजारभन्दा बढी मतान्तरले पराजित हुनभयो । कांग्रेसको इतिहासमा यो सबैभन्दा लज्जास्पद हार हो । यो केवल व्यक्तिगत हार होइन, यो तपाईंको २.० टिमलाई क्लियर रुपमा अस्वीकार गरेका हुन् । राजनीतिमा हार सामान्य कुरा हो। तर हारपछि के गर्ने भन्ने नै नेतृत्वको असली परीक्षा हो । तपाईंले आफ्नै दलभित्र र अन्य दलका नेताहरूलाई धेरैपटक कठोर प्रश्न गर्नुभएको छ-
– किन असफल भएपछि पनि पदमा बसिरहनु?
– किन जिम्मेवारी नलिनु?
– किन नयाँ पुस्तालाई ठाउँ नदिनु?
आज ती प्रश्नहरू तपाईंमाथि फर्किएका छन्।
नेपाली कांग्रेस कुनै व्यक्तिको निजी कम्पनी होइन भनेर तपाईले सिकाउनु भएको हो । यो बा-को पार्टी पनि होइन र दास र लास चाहिने संगठन पनि होइन । प्रश्न गरिरहनुपर्छ भनेर तपाईले सिकाउनुभएको हो ्
यो पार्टी नेपालको लोकतान्त्रिक इतिहासको मेरुदण्ड हो । बी.पी. कोइराला, गणेशमान सिंह, कृष्णप्रसाद भट्टराईजस्ता नेताहरूले बनाएको पार्टी आत्मसम्मान, विचार र जिम्मेवारीको परम्परामा उभिएको छ । त्यसैले आज प्रश्न उठ्छ—
यदि पार्टी अध्यक्ष नै निर्वाचनमा जनताबाट अस्वीकार भए भने, नैतिक जिम्मेवारी कसले लिने?
यस्तो बेला नेतृत्वले पद समातेर बस्नु होइन, उदाहरण दिनु पर्छ ।
तपाईं बुद्धिमान नेता हुनुहुन्छ। तपाईंले धेरै पटक संसदमा तर्क, तथ्य र नैतिकताको भाषा बोल्नुभएको छ । तर आज देशले तपाईंलाई एउटै प्रश्न सोधिरहेको छ- “के तपाईं आफ्नै मापदण्डमा उभिन तयार हुनुहुन्छ?”
नेतृत्व केवल जित्दा होइन,हार्दा पनि देखिन्छ। हारलाई स्वीकार गरेर पद त्याग्नु कमजोरी होइन, त्यो राजनीतिक संस्कारको सबैभन्दा ठूलो उदाहरण हो। यदि तपाईं साँच्चै नयाँ राजनीतिक संस्कृति बनाउन चाहनुहुन्छ भने, आजको सबैभन्दा शक्तिशाली सन्देश यही हुन सक्छ- “जनताले अस्वीकार गरेको नेतृत्व पदमा बसिरहँदैन।”
त्यो दिन नेपाली कांग्रेस कमजोर हुँदैन। बरु, पार्टी झन् बलियो हुन्छ । किनकि लोकतन्त्रको आत्मा भनेको यही हो- पदभन्दा ठूलो जनताको मत हो।
अन्त्यमा फेरि दोहोर्याउँछु-
नेपाली कांग्रेस कसैको निजी कम्पनी होइन। यो दास र लास चाहिने संगठन होइन। यो कसैको बा-को पार्टी पनि होइन। कांग्रेस विचार, इतिहास र जनविश्वासले बनेको संस्था हो । त्यसैले आज तपाईंले लिनुपर्ने निर्णय केवल व्यक्तिगत होइन- नेपाली लोकतन्त्रको संस्कृतिसँग जोडिएको निर्णय हो । आशा छ, तपाईंले इतिहासको यो क्षण बुझ्नुहुनेछ।
सम्मानसहित,
एक चिन्तित लोकतन्त्रप्रेमी नागरिक
