31/08/2026
फेरि फेला पर्यो बन्दुक, फेला परेनन् शिकारीःपूर्वी मोरङका वन क्षेत्र सुरक्षा चुनौती बन्दै
अवैध हतियार र विष्फोटक पदार्थ धमाधम फेला परेतापनि वन्यजन्तुको अवैध चोरी शिकारीमा संलग्न मुख्य दोषीहरु उम्किने क्रम निरन्तर जारी रहँदा सुरक्षा संयन्त्रमाथि चुनौती थपिएको छ ।
यसैबीच, विशेष सूचनाका आधारमा इलाका प्रहरी कार्यालय उर्लाबारीबाट खटिएको टोलीले आइतबार साँझ ६:३० बजे मिक्लाजुङ गाउँपालिका–६, लालमाटी श्रीलङ्का टोलस्थित मयुर सामुदायिक वनभित्र लुकाईछिपाई राखिएको ठुलो परिमाणमा हतियार बरामद गरेको छ ।
झाडीभित्र शंकास्पद अवस्थामा रहेको बोरा खोतल्दा प्रहरीले ३ थान तयारी भरुवा बन्दुक, १ थान फलामको नाल, १९ ग्राम २४० मिलिग्राम बारुद, ९८ वटा फलामको व्यारिङ (छर्रा), १३ वटा फलामका टुक्रा र झुम्रो फेला पारेको हो । बरामद सामग्री इप्रका उर्लाबारीको नियन्त्रणमा छ ।
साउनमै फेला परेका थिए ४ बन्दुकः
वन क्षेत्रमा वेवारिसे हतियार भेटिने यो पहिलो घटना भने होइन । यसअघि गत साउन महिनामा मात्रै पूर्वी मोरङका तीनवटा बेग्लाबेग्लै वन क्षेत्रबाट चार थान भरुवा बन्दुक र विष्फोटक पदार्थ बरामद भइसकेका छन् ।
मिक्लाजुङकै कोइली सामुदायिक वन र उर्लाबारी–१, कत्लेस्थित जनज्योति सामुदायिक वन र २ नम्बर वडामा अवस्थित सुनझोडा सामुदायिक वन क्षेत्रमा त्यसबेला हतियार फेला परेका थिए ।
शृङ्खलाबद्ध रुपमा बन्दुक भेटिए पनि हतियार छाडेर भाग्ने वा शिकारी समूहको पहिचान हुन नसक्दा वनमा आश्रित वन्यजन्तुको सुरक्षा र स्थानीयको सुरक्षामाथि समेत प्रश्न उठेको छ ।
हातहतियार फेला परे पनि आरोपीहरु उम्किरहेको सन्दर्भमा इलाका प्रहरी कार्यालय उर्लाबारीकी प्रहरी निरीक्षक नवीन ओलीले चोरी शिकारीमा संलग्नहरुको पहिचान गर्ने कार्य भइरहेको बताईन् । उनकाअनुसार वन क्षेत्रलाई आधार बनाएर अवैध गतिविधि गर्ने समूहको खोजी कार्य र अनुसन्धानलाई निकै तीव्र पारिएको छ ।
