Mechi-Mahakali Media Society, NEPAL

15/08/2026

विजयपुर खोलामा दुई बालक बेपत्ता

पोखरा, साउन ३० । पोखरा महानगरपालिकास्थित विजयपुर खोलामा बगेर आइतबार दिउँसो दुई जना बालक बेपत्ता भएका छन्।
पोखरा महानगरपालिका–१४ विजयबस्तीबाट वडा नम्बर–२६ स्थित सक्नेरीतर्फ जाने क्रममा दिउँसो करिब १ बजेको समयमा उनीहरूलाई खोलाले बगाएको हो।
भगवती हाइड्रोपावर नजिकै विजयपुर खोला तर्ने क्रममा अन्दाजी १४ देखि १५ वर्ष उमेरका दुई बालक खोलाले बगाएर बेपत्ता भएको बताइएको छ।
घटनापछि स्थानीयवासी तथा सुरक्षाकर्मीको टोलीले बेपत्ता बालकहरूको खोजी तथा उद्धार कार्य सुरु गरेको छ। घटनाबारे थप विवरण आउन बाँकी रहेको छ।

14/08/2026

अविरल वर्षा ले गर्दा अन्नपूर्ण -६ हाईजुङ मा रहेको माता अन्नपूर्ण मन्दिर सहित पुल वगाएको छ।।मन्दिरका पुजारी खोला को बिच मा रहनु भएको उदृार कार्य जारि रहेकाे अन्नपूर्ण गाउपालि अध्यक्ष बिष्णु बहादुर के.सी. ले जानकारी दिनुभयाे।
video credit : from Madhu Panthi facebook wall

14/08/2026

कास्की अन्नपुर्णमा मोदी खोलामा बाढी सडक बगायाे
Video credit : from Aakraj Giri facebook wall

05/08/2026

03/08/2026

गण्डकीमा औषधिजन्य तथा औद्योगिक प्रयोजनका लागि गाँजा खेतीले पायो कानुनी मान्यता
पोखरा, साउन १८ — गण्डकी प्रदेशमा अब औषधिजन्य तथा औद्योगिक प्रयोजनका लागि गाँजा खेतीले कानुनी मान्यता पाएको छ।
प्रदेश प्रमुख डिल्लीराज भट्टले नेपालको संविधानको धारा २०१ को उपधारा (४) बमोजिम ‘औषधिजन्य तथा औद्योगिक प्रयोजनको लागि गाँजा खेतीलाई नियमन र उपयोग गर्ने सम्बन्धमा व्यवस्था गर्न बनेको विधेयक’ सोमबार (साउन १८) प्रमाणीकरण गरेसँगै प्रदेशमा कानुनी रूपमा गाँजा खेती गर्ने बाटो खुलेको हो।
यो विधेयक प्रमाणीकरण भएसँगै गण्डकी प्रदेशमा औषधि उत्पादन, औद्योगिक प्रयोग तथा अनुसन्धानका लागि गाँजा खेती गर्न आवश्यक कानुनी आधार तयार भएको छ। अब प्रदेश सरकारले ऐनअनुसार आवश्यक नियमावली, मापदण्ड तथा कार्यविधि बनाएर गाँजा खेती, उत्पादन, प्रशोधन, उपयोग र नियमनको प्रक्रिया अघि बढाउनेछ।
प्रदेश सरकारका अनुसार यस व्यवस्थाले कृषकका लागि नयाँ आयआर्जनको अवसर सिर्जना गर्नुका साथै औषधि तथा औद्योगिक क्षेत्रको विकास, रोजगारी सिर्जना र प्रदेशको अर्थतन्त्रमा समेत सकारात्मक योगदान पुग्ने अपेक्षा गरिएको छ।
यद्यपि, गाँजा खेती ऐनले तोकेको मापदण्ड र अनुमति प्रक्रियाअनुसार मात्र गर्न पाइनेछ भने गैरकानुनी उत्पादन, बिक्री–वितरण तथा दुरुपयोगमाथि विद्यमान कानुनी व्यवस्था अनुसार कारबाही हुने व्यवस्था यथावत रहनेछ।

03/08/2026

हाइकिङ, खेलकुद सामग्री वितरण तथा वृक्षारोपण कार्यक्रम सम्पन्न

स्याङ्जा, फेदीखोला । विद्यार्थीहरूमा शारीरिक स्वास्थ्य, अनुशासन, नेतृत्व क्षमता, सहकार्य तथा वातावरण संरक्षणसम्बन्धी चेतना अभिवृद्धि गर्ने उद्देश्यले हिमाली स्काउट ट्रुपको आयोजनामा फेदीखोला गाउँपालिका–१, मट्टीखानस्थित श्री चण्डीडाँडा माध्यमिक विद्यालयमा हाइकिङ, खेलकुद सामग्री वितरण तथा वृक्षारोपण कार्यक्रम सम्पन्न भएको छ।
कार्यक्रमअन्तर्गत बिहान ५:०० बजे हिमाली बाल कल्याण संरक्षण मञ्चबाट सुरु भएको हाइकिङ श्री चण्डीडाँडा माध्यमिक विद्यालयमा पुगेर सम्पन्न भएको थियो। हाइकिङमा विद्यार्थी, शिक्षक तथा स्काउट सदस्यहरूको उत्साहजनक सहभागिता रहेको थियो। कार्यक्रममार्फत विद्यार्थीहरूलाई शारीरिक रूपमा सक्रिय बनाउने, प्रकृतिसँग नजिक गराउने, समूहमा मिलेर काम गर्ने, अनुशासनको पालना गर्ने तथा नेतृत्व र सहकार्यको भावना विकास गर्ने अवसर प्रदान गरिएको आयोजकले जनाएको छ।
यसै अवसरमा विद्यालयका विद्यार्थीहरूको खेलकुदप्रतिको रुचि र सहभागिता बढाउने उद्देश्यले विभिन्न खेलकुद सामग्री विद्यालयलाई हस्तान्तरण गरिएको थियो। उपलब्ध सामग्रीले विद्यार्थीहरूलाई नियमित खेलकुद तथा अतिरिक्त क्रियाकलापमा सहभागी हुन थप प्रेरणा मिल्ने विश्वास व्यक्त गरिएको छ।
कार्यक्रममा फेदीखोला गाउँपालिका–१ का वडा अध्यक्ष अमृत क्षेत्री, विद्यालय व्यवस्थापन समितिका सदस्य खेमराज पोख्रेल, श्री चण्डीडाँडा माध्यमिक विद्यालयका प्रधानाध्यापक अमृत श्रेष्ठ, शिक्षक–अभिभावक संघका अध्यक्ष केशव सुनार, शैक्षिक विभाग प्रमुख बन्धुराज पौडेल, शिक्षक–अभिभावक संघका सदस्यहरू लालबहादुर सुनार र विमला क्षेत्री तथा हिमाली विद्यालयका प्रधानाध्यापक दिपक कार्कीको विशेष उपस्थिति रहेको थियो।
त्यसैगरी शिक्षकहरू पूर्णिमा थापा, अमिसा गुरुङ, कविता वली, वसन्ती पौडेल, मिलन पौडेल, अलका आले मगर, हाउस मदर गंगा बानियाँ र चित्रमाया दुरा, कार्यालय सहयोगी विनोद नेपालीलगायत विद्यालय परिवार तथा सम्बन्धित सरोकारवालाहरूको पनि सक्रिय सहभागिता रहेको थियो।
कार्यक्रमको अर्को महत्वपूर्ण गतिविधिका रूपमा विद्यालय परिसर तथा आसपासको क्षेत्रमा वृक्षारोपण गरिएको थियो। दुवै विद्यालयका विद्यार्थी, शिक्षक तथा हिमाली स्काउट ट्रुपका सदस्यहरूले विभिन्न प्रजातिका बिरुवा रोप्दै वातावरण संरक्षण, हरियाली प्रवर्द्धन तथा स्वच्छ विद्यालय वातावरण निर्माणको सन्देश दिएका थिए। सहभागीहरूले रोपिएका बिरुवाको नियमित हेरचाह, संरक्षण र संवर्द्धन गर्ने प्रतिबद्धता समेत व्यक्त गरेका थिए।
कार्यक्रमअन्तर्गत विभिन्न प्रतिस्पर्धात्मक खेलहरू पनि सञ्चालन गरिएका थिए। डोरी तान्ने प्रतियोगितामा सुबोध वि.क.को टोली प्रथम, हिरा बहादुर थापाको टोली द्वितीय तथा स्वस्तिक परियारको टोली तृतीय भएको थियो।
ब्लाइन्डफोल्ड बेलुन फुटाउने प्रतियोगिताको छात्रतर्फ सुबोध वि.क. प्रथम, अमर थापा द्वितीय र कपिल पोखरेल तृतीय भए। छात्रातर्फ रमिला सुनार प्रथम, दिप्शा खत्री द्वितीय तथा एलिशा जलारी तृतीय स्थान हासिल गर्न सफल भएका छन्।
त्यसैगरी फिङ्गर क्याच प्रतियोगितामा सुबोध वि.क. प्रथम, सिजल सारु मगर द्वितीय तथा आदिप सुनार तृतीय भएका छन्।
स्काउट मास्टर कृष्ण कुमार राजवाहकको समन्वयमा सम्पन्न उक्त कार्यक्रमले विद्यार्थीहरूमा अनुशासन, नेतृत्व, सहकार्य, शारीरिक सक्रियता, सामाजिक उत्तरदायित्व तथा वातावरणीय चेतनाको विकासमा महत्वपूर्ण योगदान पुर्‍याएको आयोजकले जनाएको छ।

01/08/2026

विश्व कीर्तिमानी पर्वतारोही निर्मल पुर्जा (निम्स दाई) को निधन
काठमाडौं, साउन १७ — विश्व कीर्तिमानी नेपाली पर्वतारोही निर्मल पुर्जा (निम्स दाई) को निधन भएको पुष्टि भएको छ।
पाकिस्तानस्थित ब्रड पिक हिमाल आरोहणका क्रममा गएको हिमपहिरोमा उनीसहित अन्य १० जना बेपत्ता भएका थिए। लामो समयसम्म खोजी तथा उद्धार प्रयास जारी रहे पनि उनको अवस्था पुष्टि हुन सकेको थिएन।
पुर्जाले स्थापना गरेको इलाइट एक्सपेड ले सामाजिक सञ्जालमार्फत उनको निधन भएको आधिकारिक जानकारी सार्वजनिक गरेको हो।
निर्मल पुर्जा विश्वका ८ हजार मिटरभन्दा अग्ला १४ वटा हिमाल सबैभन्दा कम समयमा आरोहण गरी विश्व कीर्तिमान कायम गर्ने नेपाली पर्वतारोहीका रूपमा परिचित थिए। उनको साहस, नेतृत्व र पर्वतारोहण क्षेत्रमा पुर्‍याएको योगदानले नेपाललाई अन्तर्राष्ट्रिय स्तरमा नयाँ पहिचान दिलाएको थियो।
उनको असामयिक निधनले नेपाली पर्वतारोहण क्षेत्र तथा विश्व पर्वतारोहण समुदायलाई गहिरो क्षति पुगेको छ। उनका परिवारजन, शुभेच्छुक तथा सम्पूर्ण पर्वतारोहण समुदायप्रति हार्दिक समवेदना व्यक्त गरिएको छ।

31/07/2026

पाकिस्तानको हिमालमा बेपत्ता निर्मल पुर्जाको ट्र्याकरमा देखियो 'मुभमेन्ट', खोजीकार्य जारी

काठमाडौं । पाकिस्तानको एक हिमालमा हिमपहिरोमा परेर बेपत्ता भएका प्रख्यात नेपाली पर्वतारोही निर्मल पुर्जा (निम्सदाइ) को ट्र्याकरमा 'मुभमेन्ट' देखिएको जानकारी सार्वजनिक भएको छ।
निर्मल पुर्जाका पर्वतारोहण साझेदार मिङ्मा डेभिड शेर्पाका अनुसार हिमपहिरो गएपछि ट्र्याकरले देखाउने स्थान निरन्तर परिवर्तन भइरहेको छ। यद्यपि, ट्र्याकरमा देखिएको गतिविधिले निर्मल पुर्जाको अवस्था पुष्टि गर्ने आधार भने बनेको छैन।
प्राप्त जानकारीअनुसार हिजो बिहान करिब ९:३० बजे हिमालमा हिमपहिरो गएको थियो। त्यसयता निर्मल पुर्जा सम्पर्कविहीन छन् भने उनको खोजी तथा उद्धार कार्य निरन्तर जारी रहेको सम्बन्धित टोलीले जनाएको छ।
हालसम्म उनको अवस्थाबारे आधिकारिक पुष्टि हुन नसकेको र उद्धार टोलीले प्रतिकूल मौसम तथा हिमाली भूगोलका बीच खोजी कार्यलाई तीव्र बनाइरहेको जनाएको छ।

28/07/2026

ललितपुरमा एसओएस बालग्रामका कर्मचारी चढेको गाडी दुर्घटना: १ को मृत्यु, ५ जना घाइते

24/07/2026

पाेखरा उत्तमचाेकमा जेब्राक्रसबाट बाटो काट्ने क्रममा बसको ठक्करबाट पैदलयात्रीको मृत्यु । मृत्यु हुनेमा स्याङ्जा घर भई हाल पोखरा–१० उत्तमचोक बस्दै आएका राजु थापा रहेका छन् ।