19/08/2025
नेपालले रूबेला रोग उन्मूलन गर्यो : डब्लुएचओ
काठमाडौं, साउन ३२ – नेपालले दीर्घ प्रयासपछि रूबेला रोगको उन्मूलन गर्न सफल भएको छ। विश्व स्वास्थ्य संगठन (WHO) ले सोमबार नेपाललाई रूबेला उन्मूलन गरेको देशको रुपमा घोषणा गरेको हो।
रूबेला एक अत्यधिक संक्रामक भाइरल रोग हो, जसले गर्भवती महिलाबाट जन्मिने शिशुमा गम्भीर असर पुर्याउन सक्छ। नेपालले सन् २०१२ मा देशव्यापी खोप अभियानमार्फत खस्रा-रूबेला (MR) खोप सुरु गरेको थियो। त्यसपछि २०१६ देखि नियमित खोप तालिकामा दोस्रो मात्रा समेत समावेश गरिएको हो।
कोरोना महामारी र भूकम्पजस्ता ठूला चुनौतीका बाबजुद नेपालले सन् २०२४ सम्ममा रूबेला खोपको ९५ प्रतिशतभन्दा बढी आवरण हासिल गरेको थियो। यसैका आधारमा क्षेत्रीय प्रमाणीकरण आयोगले नेपाललाई रूबेला रोग उन्मूलन गरेको प्रमाणित गरेको हो।
नेपाल यस उपलब्धि हासिल गर्ने डब्लुएचओ दक्षिण–पूर्वी एशिया क्षेत्रको छैठौं देश बनेको छ। यसअघि भुटान, उत्तर कोरिया, माल्दिभ्स, श्रीलङ्का र टिमोर–लेस्तेले रूबेला उन्मूलन गरेका थिए।
यो उपलब्धिलाई नेपालकै सार्वजनिक स्वास्थ्य क्षेत्रको ठूलो सफलता मानिएको छ।
