18/06/2025
निर्मल कुमार बुढा , नेपालगञ्ज, ८ जुन २०२५
लुम्बिनी प्राविधिक विश्वविद्यालय (Lumbini Technological University – LTU) को आयोजनामा ‘International Conference on Digital Transformation and Innovation – 2025’ नामक एकदिने अन्तर्राष्ट्रिय सम्मेलन भव्य रूपमा सम्पन्न भएको छ। ‘Shaping the Future of Lumbini, Nepal through Digital Innovation’ भन्ने मूल नाराका साथ आयोजना गरिएको यो सम्मेलन नेपालगञ्जको भ्यु होटल सिद्धार्थमा सम्पन्न भएको हो।
कार्यक्रमको उद्घाटन प्रदेश तथा विश्वविद्यालयका उच्च पदाधिकारीहरू प्रा.डा. बिनोद प्रसाद ढकाल (Vice Chancellor of LTU), रजिस्टार रेग भन्डारी र डिन डा. निरज के.सीको उपस्थितिमा गरिएको थियो। प्रमुख अतिथिको रूपमा लुम्बिनी प्रदेशका समाजिक विकास मन्त्री मा. जन्म जय तिमिल्सेना त्यसै गरि विशिष्ट अथितिमा प्रा.डा. बेदराज के.सी. (Vice Chancellor of Pokhara University) लगायत अन्य University का बाट Vice Chancellor ले सम्मेलन उद्घाटन गर्दै डिजिटल प्रविधिको वर्तमान महत्व र लुम्बिनी प्रदेशको भविष्य निर्माणमा यसको भूमिकामाथि विशेष जोड दिनुभयो। उहाँले लुम्बिनी प्राविधिक विश्वविद्यालयलाई नवप्रवर्तन, अनुसन्धान तथा स्थानीय र वैश्विक प्रविधि विकाससँग जोड्ने केन्द्रको रूपमा विकास गर्ने लक्ष्य रहेको पनि बताउनुभयो।
सम्मेलनमा विभिन्न देश तथा नेपालका सूचना प्रविधि, शिक्षाशास्त्र, नीति निर्माण, नवप्रवर्तन, र नेतृत्व विकास क्षेत्रमा क्रियाशील विज्ञ, प्राध्यापक, अनुसन्धानकर्ता तथा विद्यार्थीहरूको उत्साहजनक सहभागिता देखिएको थियो। प्रस्तुतिहरूले डिजिटल शिक्षाको रूपान्तरण, स्मार्ट सिटी निर्माण, कृत्रिम बौद्धिकता (AI), ब्लकचेन, साइबर सुरक्षा, डाटा विश्लेषण तथा नवप्रवर्तनका अन्य पक्षहरूलाई समेटेका थिए।
कार्यक्रममा सहभागी वक्ताहरूले डिजिटल नवप्रवर्तनले शिक्षा, स्वास्थ्य, प्रशासन, कृषि, पर्यटन लगायतका क्षेत्रहरूमा पार्न सक्ने सकारात्मक प्रभावमाथि प्रकाश पारे। स्थानीय तहसँग सहकार्य गर्दै डिजिटल नेपाल बनाउने अभियानमा विश्वविद्यालयहरूको भूमिका विशेष महत्त्वपूर्ण हुने भनाइहरू पनि राखिए।
यस सम्मेलनको सफल आयोजनामा नेपालगञ्ज उपमहानगरपालिका, कोहलपुर नगरपालिका, सूचना प्रविधि समाज नेपाल (IFSN), र SCEE Summit लगायतका संस्थाहरूको विशेष सहयोग रहेको थियो। सहभागीहरूका अनुसार यस्तो खालको सम्मेलनले लुम्बिनी प्रदेशलाई डिजिटल नवप्रवर्तनको केन्द्र बनाउने दिशामा उल्लेखनीय टेवा पुर्याउने अपेक्षा गरिएको छ।
कार्यक्रमको अन्त्यमा सहभागी वक्ताहरूलाई सम्मान गरिएको थियो भने, डिजिटल नवप्रवर्तन सम्बन्धी कार्यपत्रहरूको सारांश पनि सार्वजनिक गरिएको थियो। विश्वविद्यालयले आगामी वर्षहरूमा अझ विस्तारित स्तरमा यस्ता सम्मेलनहरू आयोजना गर्ने प्रतिबद्धता जनाएको छ।
