26/01/2026
आह्वान: तनहुँ क्षेत्र नं. १ को भविष्यका लागि "नागरिक बहस" (Public Debate) – एउटा साझा पहल!
सम्पूर्ण आदरणीय तनहुँवासी आमाबुवा, दाजुभाइ तथा दिदीबहिनीहरूमा हार्दिक अभिवादन ।
मुलुक अहिले निर्वाचनको सङ्घारमा छ। राष्ट्रिय स्तरमा प्रधानमन्त्रीका दाबेदारहरूबीच सार्वजनिक बहस (Public Debate) हुनुपर्छ भन्ने आवाज सडकदेखि सदनसम्म गुञ्जिरहेको अवस्थामा हाम्रो तनहुँ क्षेत्र नं. १ ले पनि एउटा स्पष्ट मानक स्थापना गर्नु आवश्यक छ। के हामी सांसदका रूपमा केवल 'भाइरल' अनुहार वा पार्टीको 'टिकट' मात्र रोज्दैछौँ? कि देशको संविधान र कानुन कोर्ने एक योग्य 'विधायक' रोज्दैछौँ?
अहिलेसम्म नेताहरूले हामीलाई जे सुनाउन चाहे, हामीले त्यही सुन्यौँ। तर यसपटक हामी चाहन्छौँ— हामीले जे सोध्न चाहन्छौँ, नेताले त्यसको जवाफ दिनुपर्छ।
तसर्थ, एक स्वतन्त्र र सचेत नागरिकको हैसियतले म तनहुँ-१ का प्रमुख उम्मेदवारहरू:
* डा. स्वर्णिम वाग्ले (राष्ट्रिय स्वतन्त्र पार्टी)
* भगवती न्यौपाने (नेकपा एमाले)
* गोविन्द भट्टराई (नेपाली कांग्रेस)
* अन्य उम्मेदवारहरूलाई...
एउटै मञ्चमा "खुला नागरिक बहस" का लागि हार्दिक आह्वान गर्दछु ।
१. आदरणीय डा. स्वर्णिम वाग्ले ज्यू (रास्वपा): तपाईँको अर्थशास्त्रीय विज्ञता तनहुँको किसानको हलो र कोदालोसँग कसरी जोडिन्छ?
२. आदरणीय गोविन्द भट्टराई ज्यू (नेपाली कांग्रेस): तपाईँको दशकौँको राजनीतिक निष्ठाले तनहुँका युवाहरूको विदेश पलायन कसरी रोक्छ?
३. आदरणीय भगवती न्यौपाने ज्यू (नेकपा एमाले): तपाईँको पार्टीको नीतिले तनहुँको शिक्षा र स्वास्थ्यमा कुन क्रान्ति ल्याउँछ?
१. भुइँमान्छेको न्याय: यो बहस कुनै चिल्लो स्टुडियोमा होइन, यस बहसमा कुनै ठुला पत्रकार वा भीआईपीले मात्र होइन, बरु हाम्रा किसान दाइहरू, ट्याक्सी/ट्रक चालकहरू, मजदुर, विद्यार्थी र गृहिणीहरूले प्रत्यक्ष प्रश्न सोध्नेछन्। जसको आवाज कहिल्यै काठमाडौँको सत्ताले सुन्दैन, उनीहरूले आफ्ना उम्मेदवारको आँखामा आँखा जुधाएर प्रश्न गर्नेछन्।
२. नीतिगत स्पष्टता (Policy over Populism): सांसद भनेको विकासको ठेक्का बाँड्ने एजेन्ट होइन । उम्मेदवारहरूसँग शिक्षा, स्वास्थ्य, र देशको जर्जर अर्थतन्त्र सुधार्ने के 'नीति' (Policy) छ? उनीहरूले सदनमा हाम्रो क्षेत्रको प्रतिनिधित्व कसरी गर्छन्? यसको बौद्धिक परीक्षण हुनेछ।
मेरो अपिल: तनहुँ क्षेत्र नं. १ का सम्पूर्ण सचेत नागरिकहरू, आउनुहोस्! यो अभियानलाई साझा बनाऔँ। हामीलाई 'भाइरल' पात्र होइन, 'जिम्मेवार विधायक' चाहिएको हो। यदि तपाईँ आफ्नो र आफ्नो सन्तानको भविष्यप्रति चिन्तित हुनुहुन्छ भने, यो बहसमा हाम्रो साथ दिनुहोस्।
यो कुनै पार्टीको विरुद्ध होइन, यो त लोकतन्त्रको सुदृढीकरण र हाम्रा भविष्यका लागि हो।
"प्रश्नले नै मान्छेलाई जिम्मेवार बनाउँछ, अब बहस चौतारीमा हुनेछ!"
