24/06/2025
भिमाद नगरपालिकाको २०८२/८३ को वार्षिक बजेट सार्वजनिक, कुल ६३ करोड ७२ लाखको अनुमानित प्रक्षेपण
भिमाद, तनहुँ – भिमाद नगरपालिकाले आर्थिक वर्ष २०८२/८३ का लागि कुल ६३ करोड ७२ लाख ६० हजार ३ सय ७० रुपैयाँको वार्षिक बजेट प्रस्तुत गरेको छ। बजेट तर्जुमा समितिकी संयोजक तथा नगर उपप्रमुख शारदा खनालज्यूले नगरसभामा औपचारिक रुपमा बजेट वक्तव्य प्रस्तुत गर्नुभएको हो।
प्रस्तुत बजेटमा चालू खर्चतर्फ ४४ करोड ४४ लाख ८५ हजार ३ सय ७० रुपैयाँ विनियोजन गरिएको छ, जुन कुल बजेटको ६९.७५ प्रतिशत हो। यस्तै, पूँजीगत खर्चतर्फ १९ करोड २७ लाख ७५ हजार रुपैयाँ, अर्थात् ३०.२५ प्रतिशत विनियोजन गरिएको छ।
उपप्रमुख खनालले समावेशी र समानुपातिक विकासको आधारमा बजेट निर्माण गरिएको बताउँदै आगामी वर्षमा पूर्वाधार, शिक्षा, स्वास्थ्य, कृषि, रोजगार सिर्जना तथा डिजिटल प्रशासन प्रणाली सुदृढीकरणमा प्राथमिकता दिइने स्पष्ट पार्नुभयो।
नगर प्रमुख तथा अन्य जनप्रतिनिधिहरूको उपस्थिति रहेको नगरसभामा बजेटमाथि छलफल पश्चात अनुमोदनको प्रक्रिया अघि बढाइएको छ ।
