24/04/2026
तनहुँमा यात्रुवहाक बस दुर्घटनाः २ जनाको मृत्यु, २९ जना घाइतेलाई थप उपचारका लागि पोखरा पठाइयो
तनहुँमा यात्रुवहाक बस दुर्घटना हुदाँ २ जनाको मृत्यु भएको छ । शुक्रबार दिउँसो तनहुँको शुक्लागण्डकी नगरपालिका–७ शेराटारस्थित पृथ्वी राजमार्गमा पोखराबाट नारायणगढतर्फ हिँडेको ग २ ख १८३६ नम्बरको बस दुर्घटना भएको हो ।
दुर्घटनामा दुई महिलाको मृत्यु भएको छ । तनहुँको म्याग्दे गाउँपालिका–१ की अन्दाजी ६५ बर्षीया जसमाया सुनारको पहिचान खुलेको छ । अन्दाजी ३० वर्षको युवतीको पहिचान खुल्न नसकेको इलाका प्रहरी कार्यालय बेलचौताराले जनाएको छ ।
घटनास्थलबाट उद्धार गरेर जिपी कोइराला राष्ट्रिय श्वासप्रश्वास उपचार केन्द्र बेलचौतारा ल्याइएकोमा चिकित्सकले मृत घोषणा गरेको इलाका प्रहरी कार्यालय बेलचौताराका प्रमुख प्रहरी निरीक्षक धननारायण श्रेष्ठले जानकारी दिए । उनका अनुसार दुर्घटनामा घाइते २९ जनालाई थप उपचारका लागि पोखराको मणिपाल शिक्षण अस्पताल पठाइएको छ । घाइतेमध्य २ जनाको अवस्था गम्भिर रहेको छ । बसमा सवार ३४ जना रहेकोमा ३ जना भने जिपी कोइराला राष्ट्रिय श्वासप्रश्वास उपचार केन्द्रमा सामान्य उपचारपश्चात डिस्चार्ज भएका छन् । डिस्चार्ज भएका घाइते देव गजमेरले बाइकलाई जोगाउन खोज्दा बस सडकमै पल्टिएको बताए ।
