04/09/2026
‼️ विपद्, पीडा र आँसुबीच राजनीति गर्नेहरूका नाममा ! 🤯
___________________
नेकपा एमालेलाई सेना–प्रहरी र राज्यका संयन्त्रको विश्वास नलागेर बाढीपीडितलाई राहत आफैं बाँड्ने रे ! हर्क साम्पाङको पार्टीले सरकारलाई ‘त्यस्ता नाथे’ भन्दै आफ्नै पार्टीको खातामा पैसा (राहत) संकलन गर्ने । संसद्मा जाँदा बालेनले आफूलाई नहेरी गएकोमा पित्त फुट्ने गरी प्रचण्डको कत्रो चित्त दुखाइ, तेरिमा टोक्ने ! उता, यो सरकार बाढीसँगै बगेर गयो भन्ने कुराको चिन्ताले एमाले नेतृ रामकुमारी झाँक्रीलाई चैं रातभर निद्रा लाग्दैन रे !
अनि, यिनीहरूलाई नै आपत्ति छ– गृहमन्त्रीले बाढीबाट निकालेको बच्चा बोकेर हेलिकप्टरमा हाल्दै हिँड्ने हैन । त्रिशुली ३–ए बाट १० दिनपछि जीवितै उद्धार भएकालाई लगाएको मानव अक्सिन सिलिन्डर गृहमन्त्री आफैंले बोकेर दौडिने होइन । गृहमन्त्रीले पीडितका हात समाउँदै, आँसु पुछ्दै हिँड्ने हैन । गृहमन्त्रीले बाढी प्रभावित क्षेत्रमा गएर उद्धारकर्ता र सुरक्षाकर्मीको हौसला बढाउने होइन ...... ।
(अस्ति काठमाडौंमा बाढी आउँदा एउटा छाप्राको छतमा उद्धार माग्दै ४–५ घण्टा पर्खिएका नागरिकलाई अन्ततः बाढीले बगाउँछ । तर उद्धार गर्न ‘भीजीबीलीटी पुगेन’ भन्दै हेलिकप्टर उडाउन नसक्ने निकम्मा सरकार र बज्रस्वाँठ गृहमन्त्री यिनीहरूकै पालाको थियो भन्ने कुरा मैले चैं अझै बिर्सेको छैन ।)
कांग्रेस–एमालेहरूको स्वर चर्को छ– गृहमन्त्रीले संयन्त्र र स्रोत–साधन परिचालन गर्ने हो । निर्णय कार्यान्वयन गर्दै जाने हो । उनीहरूलाई लाग्दो रहेछ– हजारौं मानिस बाढीमा बेपत्ता भएका बेला, मानिसका मनहरू विक्षिप्त भएका बेला सरकार र उसका संयन्त्रहरू बनभोज खान गएका छन् ।
त्यसोभए बाढी आएको एक–डेढ घण्टाभित्र सेनाका हेलिकप्टरलाई उद्धार गर्न बाढी क्षेत्रमा कुन देशको सरकारले पठायो ? बाढीपहिरोबाट १०औं हजार नागरिकको उद्धार एमाले–कांग्रेस–नेकपा मध्ये कुन पार्टीले गरेको हो ? डोरीमा खानेकुरा र औषधिका पोका झुण्ड्याएर बाढीपीडित नागरिक र उनीहरूको आश्रयस्थल खोज्दै डाँडाकाँडा उडिरहेका हेलिकप्टर कुन पार्टीका भ्रातृ संगठनका हुन् ? बाढीबाट तानेर–निकालेर, डोरीमा झुण्ड्याएर अस्पताल पुर्याइरहेका हेलिकप्टर र स्रोत–साधन कसका हुन् ? एक प्याकेट चाउचाउ र एक बोतल पानीका भारमा १०औं दिनदेखि दिनरात नभनी हिलो–दलदल र सुरुङमा आफ्ना नागरिकको सास (कि लास) को खोजीमा खटिइरहेका सेना–प्रहरी कुन पार्टीका हुन् ? मित्रराष्ट्रहरूबाट प्राप्त टनका टन राहत सामग्री कुन पार्टीले कुन विमानमा बोकेर बाढी प्रभावित क्षेत्रमा पुराइरहेको छ ? बाढी क्षेत्रमा खटिइरहेका हजारौं कर्मचारी, स्वास्थ्यकर्मी, उद्धारकर्ता कुन देशका हुन् ?
विपद् र दुःख परेका बेला सरकारका मन्त्री जनताको घरआँगन पुगेर जनताको हात समाउँदा, आँसु पुछ्दा यिनीहरूलाई यतिविघ्न किन पोलेको ? यिनीहरू किन यसरी आत्तिएका ? यिनीहरू किन सरकारलाई चोरऔंला ठड्याउँदै ‘कसरी गर्दो रैछस्, हेरुँला, देखुँला’ भन्दैछन् ?
मेरो लाटो बुझाइ– यो विपद्मा कांग्रेस–एमाले–नेकपा लगायत साना पार्टीहरूको नियत नै खराब छ– यो बाढी र प्रकोपका नाममा रास्वपा सरकार पूर्णतः असफल होस् । र, यिनीहरूप्रति जनतामा चरम घृणा जागोस् । अनि, मात्रै आफूहरूले शिर उठाउन पाइन्छ भन्ने स्वार्थपूर्ण अन्तर्य छ ।
तर देश कहालीलाग्दो विपद्सँग जुधिरहेका बेला जनताको लास, भोग, शोक, आँसु र पीडासँग राजनीति गर्नेहरू 'अपराधीसरह' हुन् । तिमीहरू र तिमीहरूको यो प्रवृत्तिको हिसाब जनताले अस्तिको चुनावमा जस्तै अर्को चुनावमा पनि जरुर गर्लान् ! यो बेला ओली, प्रचण्ड र गगनहरूले आफ्नो चोथाले मुख चलाउने होइन । नत्र ०८४ मा पनि जनताले फेरि अस्तिकै पारामा ‘खुलिबिन्दाङ’ बनाइदेलान् !
देश विपद्सँग जुधिरहेका बेला सबै पक्ष एकताबद्ध हुने हो । नागरिकलाई विपद्बाट बाहिर ल्याउन अधिकतम् कोसिस हो । यसका लागि सबैले हातेमालो गर्नुपर्छ । पटक–पटक प्रधानमन्त्री भएका ओलीले ‘हामीलाई यो सरकारको विश्वास नै छैन, राहत आफैं बाँड्छौं’ भनेर सरकारलाई ललकार्ने बेला यो होइन । ‘सेना–प्रहरीले राहत सामग्री किन बाँडेको भनेर’ सेनासँग रिसाउने होइन ।
जेनजी आन्दोलनका बेला ज्यान बचाउन हेलिकप्टरमा झुन्डिएर भाग्नु परेका दिन सेना–प्रहरीले आफूलाई साथ दिएन भनेर राहत बाँडेका नाममा यी सेनाप्रति ‘दुश्मनी देखाउने’ बेला यो होइन । सरकारले आफूलाई समातेर खोरमा हाल्यो भनेर यो विपद्का बेला सरकारसँग बदलाको भावना राख्ने पनि होइन ।
(विपद् र प्रकोपका बेला जनताले राहतमा पाउने ‘जस्तापाता निल्ने’ नेता यही देशका हुन् । प्रभावित क्षेत्रमा पीडितका नाममा पुगेको राहत सामग्री पार्टीका मान्छे, नजिकका मान्छे र आफन्त पर्नेलाई पहिला दिने अनि बाँकी रहे मात्रै अरूलाई दिने यहींका पार्टी हुन् । राहत वितरण प्रणाली नै पार्टीले कब्जा गर्ने पनि यतैकतै हो ।)
यो बेला देशको विपद् र समस्या सबैको साझा चिन्ता बन्नुपर्छ । देश र नागरिक रहे भने त भोलि पनि राजनीति गर्ने होला नि ! विचार चोगे है काङ्बाहरू ! ❤️ 🇳🇵 🙏
