06/06/2026
रिना घतानीको मानवीय पहलमा बेवारिसे अवस्थामा भेटिएका बालक सुरक्षित रूपमा परिवारको जिम्मा👏👏
तेह्रथुम, आठराई — आठराई गाउँपालिका–४, ईवा ढोडेनी अग्राखे आधारभूत विद्यालय आसपास अन्दाजी ९ वर्षका एक बालक भेटिएपछि स्थानीय समाजसेवी रिना घतानीको सक्रियता र मानवीय पहलमा ती बालकलाई सुरक्षित रूपमा आफ्ना अभिभावकको जिम्मा लगाइएको छ।
मिति २०८३ साल जेठ १९ गते साँझ करिब ६:३० बजे भेटिएका बालकले आफ्नो नाम “सुबास लिम्बु” बताएका थिए। तर उनले आफ्ना अभिभावक तथा परिवारको स्पष्ट विवरण दिन नसकेपछि रिना घतानीले बालकलाई सुरक्षित संरक्षणमा राख्दै वडा कार्यालय तथा नेपाल प्रहरीलाई जानकारी गराएर आवश्यक समन्वय प्रक्रिया अघि बढाएकी थिइन्।
बालकको परिवार पत्ता लगाउने उद्देश्यले सामाजिक सञ्जालमार्फत सूचना सार्वजनिक गरिएको थियो। नाबालकको गोपनीयता र सुरक्षालाई मध्यनजर गर्दै प्रारम्भिक सूचनामा तस्बिर सार्वजनिक नगरिए पनि व्यापक रूपमा सूचना सेयर भएपछि धेरै व्यक्तिहरूले चासो व्यक्त गरेका थिए।
यसै क्रममा ताप्लेजुङ जिल्लाको फुङ्लिङ नगरपालिका–३ आगादिम निवासी राजेन्द्र मगरातीले उक्त बालक आफ्नै छोरा भएको दाबी गर्दै सम्पर्क गर्नुभएको थियो। उहाँका अनुसार बालक करिब एक महिनादेखि हराइरहेका थिए। आवश्यक पहिचान, सोधपुछ तथा समन्वयपछि भेटिएका बालकले समेत राजेन्द्र मगरातीलाई आफ्नै पिता भएको पुष्टि गरेका छन ।
आवश्यक प्रक्रिया पूरा गरी बालक सुबासलाई सुरक्षित रूपमा उनका अभिभावकको जिम्मा लगाइएको छ।
बालकलाई परिवारसम्म पुनर्मिलन गराउने यस कार्यमा रिना घतानीले देखाएको संवेदनशीलता, जिम्मेवारी र मानवीय सेवाको स्थानीयवासीहरूले प्रशंसा गरेका छन्। उहाँको सक्रियता, समन्वय र अथक प्रयासकै कारण एक परिवारले हराएको सन्तान पुनः फिर्ता पाउन सफल भएको हो।
बालकको उद्धार, संरक्षण, पहिचान तथा परिवारसँग पुनर्मिलन गराउने अभियानमा सहयोग गर्ने वडा कार्यालय, नेपाल प्रहरी, सामाजिक सञ्जालमार्फत सूचना प्रवाह गर्ने शुभेच्छुकहरू तथा सम्पूर्ण सहयोगीप्रति आभार व्यक्त गरिएको छ।
सुबासलाई माया, आशीर्वाद र उज्ज्वल भविष्यको शुभकामना दिँदै सुरक्षित रूपमा परिवारको जिम्मा लगाइएको छ। यो घटना मानवता, सामाजिक उत्तरदायित्व र सामूहिक सहयोगको उत्कृष्ट उदाहरण बनेको छ।
