02/03/2025
रामेले बीस वर्षसम्म शहरमा परिश्रम गरेर बचत गरेको पैसाले गाउँमा आफ्नो परिवारको लागि एउटा घर बनायो।
त्यसपछि, आफ्नो नयाँ घरमा आफ्नो परिवारसँग बस्नको लागि शुभ दिन तोक्यो। उसले घर अर्पणको कार्यक्रम बनायो र बजारबाट मिठाई र फलफूलहरू किनेर ल्यायो।
तर घर सर्ने एक दिन अगाडि रातभर मुसलधारे बर्षा भयो र खहरे उर्लेर आइ रामेको नयाँ घर जगैसमेत बगाएर लग्यो।
रामे बिहानै आफ्नो नयाँ घर हेर्न जाँदा केही पनि देखेन। बिस्तारै अरू गाउँलेहरू पनि भेला हुन थाले र उसलाई सान्त्वना दिन थाले। गाउँलेहरूले उसको लागि आफ्नो चिन्ता व्यक्त गरे, किनभने उसले त्यहाँ बस्न पाउनु अघि नै आफ्नो घर गुमाएको थियो।
तर रामेले अफूले अर्पण कार्यक्रमको लागि किनेर ल्याएको मिठाई र फलफूल निकालेर सबैलाई खुशीसाथ बाँड्न थाल्यो।
यो देखेर त्यहाँ उपस्थित सबै छक्क परे।
यो देखेर एकजना साथीले भने, "के तिमी पागल भयौ? तिम्रो भर्खरै बनेको घर खहरेले बगाएर लग्यो, जिन्दगीभरको कमाइ खेर गयो, अनि तिमी चाहिँ यहाँ खुसीले मिठाई बाँड्दै छौ!!"
रामेले मुस्कुराउँदै भन्यो, "तपाईंहरू यो घटनाको नकारात्मक पक्ष मात्रै हेर्दै हुनुहुन्छ, त्यसैले सकारात्मक पक्ष देख्न सक्नुहुन्न। आज नै मेरो नयाँ घर बगाएर लैजानु एकदम राम्रो भयो!
यो घरमा मेरो परिवारसहित बस्न थालेपछि बाढी आएर बगाएको भए म, मेरी श्रीमती र छोराछोरी सबैको ज्यान जान सक्थ्यो! त्यस्तो भएको भए कति ठूलो क्षति हुन्थ्यो होला?
त्यसैले जे भयो, राम्रोको लागि नै भयो।"
कयौं पटक हामी सबै कुरा गुमाए जस्तो महसुस गर्छौं, तर त्यस समयमा पनि, यदि हामीले कठिन परिस्थितिप्रति सकारात्मक दृष्टिकोण राख्छौं भने, हामी शान्त र राम्रोसँग त्यो परिस्थितिलाई सामना गर्न सक्नेछौं।
हरेक घटनामा नकारात्मक र सकारात्मक दुवै पक्ष हुन सक्छ। हरेक कालो बादलभित्र एउटा चाँदीको घेरा हुन सक्छ। हरेक बाँचेको पललाई ईश्वरबाट पाएको एउटा सुनौलो मौका सम्झेर जिउनुपर्छ। ゚
