14/07/2025
कानेपोखरी गाउँपालिकाद्वारा छात्रवृत्ति, पुरस्कार वितरण तथा सम्मान कार्यक्रम सम्पन्न
कानेपोखरी । मोरङको कानेपोखरी गाउँपालिकाले छात्रवृत्ति, पुरस्कार वितरण तथा सम्मान कार्यक्रम सम्पन्न गरेको छ । सोमबार कानेपोखरी गाउपालिकाको प्राङ्गणमा सो कार्यक्रम सम्पन्न गरेको हो ।
कानेपोखरी गाउँपालिकाको आयोजनामा बृहत औपचारिक कार्यक्रमका बिच आ.व. २०८१/८२ मा उत्तीर्ण भएका विभिन्न कक्षाका बिद्यार्थीहरुलाई छात्रवृत्ति प्रदान गरेको हो ।
कानेपोखरी गाउँपालिकाको विशेष कार्यक्रम अन्तरगत रहेको "प्राविधिक विधामा रोजगारी, कानेपोखरीका छोराछोरी" कार्यक्रम अन्तर्गत पालिका भरिका प्राविधिक विषयमा अध्ययनरत १८ जनालाई नगद २७ हजार ५ सय रुपैयाँका दरले सम्मान गरिएको थियो भने, आफ्ना छोराछोरी सामुदायिक विद्यालयमा अध्ययन गराउने गाउँपालिकाका शिक्षक र कर्मचारीहरुलाई पनि समयावधिको आधारमा नगद पुरस्कार सहित ३० जनालाई सम्मान गरिएको थियो ।
यस्तै कानेपोखरी गाउँपालिका स्तरिय आधारभूत शिक्षा (कक्षा ५ र ८) उत्तीर्ण परीक्षामा सामुदायिक विद्यालयतर्फ पालिका प्रथम र द्वितीय स्थान हासिल गर्न सफल विद्यार्थीहरुलाई प्रमाणपत्र र नगद पुरस्कार वितरण गरिएको हो ।
सुदर्शन निरौला कक्षा ८ प्रथम नगद रु.१० हजार, द्वितीय सरिना धिमाल रु.७ हजार र कक्षा ५ तर्फ सृष्टि राई प्रथम नगद रु.५ हजार र द्वितीय ममता भट्टराई नगद रु.३ हजारले सम्मानित भएका थिए ।
त्यस्तै माध्यमिक शिक्षा परिक्षा (एस.ई.ई.) २०८१ मा सामुदायिक विधालयहरुको तर्फबाट उत्कृष्ट नतिजा हासिल गर्ने विद्यार्थीहरुलाई प्रमाणपत्र र नगद पुरस्कार वितरण गरिएको थियो ।
श्री सिंहदेवि माध्यमिक विद्यालय, कानेपोखरी ५ की छात्रा आराधना कार्की प्रथम नगद रु.२५ हजार र जनसेवा माध्यमिक विद्यालय, कानेपोखरी-६ का आर्यन आचार्य द्वितीय रु.२० हजारले सम्मान गरिएको थियो ।
यस्तै माध्यमिक शिक्षा परिक्षा (एस.ई.ई.) २०८१ मा सामुदायिक विधालयहरुको तर्फबाट उत्कृष्ट नतिजा हासिल गर्ने विद्यालय प्रथम श्री शिक्षासदन माध्यमिक विद्यालय, कानेपोखरी-३ लाई नगद रु.३० हजार र प्रमाणपत्र र दृतिय हुने श्री सिंहदेवि माध्यमिक विद्यालय, कानेपोखरी-५ लाई नगद रु.२० हजार राशी र प्रमाणपत्रले सम्मान गरिएको थियो ।
कार्यक्रममा मन्तब्य राख्नुहुदै उपाध्यक्ष भोलाप्रसाद अधिकारीले शिक्षामा सुधार ल्याउन पालिका व्यापक लागिपरेको बताउनुभयो । उहाँले गुणस्तरीय शिक्षाको लागि नै अहिले विद्यालय मर्जको अवधारणामा पालिका अघि बढेको समेत जोड दिनुभयो । उहाँले पालिकाले लगानीको स्तरमा वृद्धि गर्दै थप शिक्षामा लगानी गर्न पछि नपर्ने बताउनुभयो । उत्कृष्ट विद्यार्थी, विद्यालय सबैलाई शुभकामनासहित अन्य विद्यालयलाईसमेत यस खाले नतिजा ल्याउन लागि पर्न सुझाव राख्नुभयो ।
पालिकाका प्रमुख प्रशासकीय अधिकृत हिराकुमारी यादवले पालिकाको सामुदायिक विद्यालय सुधारमा सबै पक्ष एकजुट भएर लागि पर्न सुझाव दिनुभयो । उहाँले विद्यालयमा अनावश्यक विषयमा टिकाटिप्पणी गर्दै विद्यालयलाई हानीनोक्सानी हुने काम नगर्न अनुरोध गर्नुभयो । सबैजना एकजुट भएर लागिपरे मात्र सामुदायिक विद्यालयको उन्नती प्रगतिहुने भन्दै वहाँले शिक्षामा आगामी वर्षमा अझ बजेटको सिमा बढाउने बताउनुभयो ।
कार्यक्रमलाई सम्बोधन गर्ने क्रममा पालिका अध्यक्ष राजमती इङ्गनामले पालिकाले शिक्षालाई उच्च स्थानमा पुर्याउनलाई ठुलो लगानी गरेको बताउनुभयो ।उहाँले पालिकाले शिक्षामा स-सानादेखि ठुला कक्षासमेत लाभान्वित हुने कार्यक्रम गरिरहेको बताउनुभयो । वहाँले विद्यालयको पुर्वाधारतर्फ पनि बृहत लगानी गरिरहेको जनाउनुभयो । उहाँले अर्को वर्ष अझ शिक्षालाई नै पहिलो प्राथमिकतामा राखेर काम गर्ने प्रतिबद्धता जनाउनुभयो । वहाँ भन्नुहुन्छ “सामुदायिक विद्यालय अध्ययन गरेका विद्यार्थी खाडी मुलुक मात्र जान सक्ने बनाउने हैन, अन्य ठूला राष्ट्रहरुमा अध्ययन गर्न, रोजगारी गर्न वा नेपाल कै उच्च पदमा जागिर गर्न सक्ने सक्षम बनाउनु पर्छ ।"
कार्यक्रममा कानेपोखरी गाउँपालिका अध्यक्ष राजमती इङ्गनामज्यूको अध्यक्षता रहेको थियो भने, उपाध्यक्ष भोलाप्रसाद अधिकारी र प्रमुख प्रशासकीय अधिकृत हिराकुमारी यादवको विशेष आतिथ्यता रहेको थियो । कार्यक्रम संचालन शिक्षा साखा प्रमुख चूडामणि रेग्मीले गर्नुभएको थियो ।
