25/07/2025
गुनासो व्यवस्थापन केन्द्रमार्फत जनगुनासोको सुनुवाइ हुने : मन्त्री न्यौपाने
तनहुँ — संघीय मामिला तथा सामान्य प्रशासन मन्त्री भगवती न्यौपानेले नागरिकका गुनासोहरुको तत्काल सुनुवाइ तथा समाधानका लागि मन्त्रालयमा ‘गुनासो व्यवस्थापन केन्द्र’ स्थापना गरिएको जानकारी दिएकी छन्।
शुक्रबार तनहुँको देवघाट, आबुँखैरेनी र बन्दीपुरमा आयोजित जनप्रतिनिधि, कर्मचारी तथा नागरिकसँगको भेटघाट र अन्तरक्रियामा मन्त्री न्यौपानेले सेवा प्रवाहसँग सम्बन्धित कुनै पनि प्रकारका गुनासोलाई प्रक्रियागत रुपमा समाधान गरिने बताइन्।
उनले भनिन्, “सेवाग्राहीबाट प्राप्त गुनासाहरूको अध्ययन र वर्गीकरण गरेर कारबाहीको आवश्यकता पर्ने विषयमा तुरुन्त प्रक्रिया अगाडि बढाइनेछ।” मन्त्रीका अनुसार गुनासो व्यवस्थापन केन्द्रमा दर्ता भएका गुनासालाई प्राथमिकताका आधारमा समाधान गरिनेछ।
कार्यक्रममा उनले कर्मचारी सरुवा सम्बन्धी मापदण्ड परिमार्जनको कार्य भइरहेकाले अब सरुवामा एकरुपता कायम हुने बताइन्। प्रमुख प्रशासकीय अधिकृतलाई स्थानीय तहमा हाजिर नगराउने प्रवृत्तिप्रति चिन्ता व्यक्त गर्दै उनले त्यसप्रकारको कार्यलाई निरुत्साहित गरिने स्पष्ट गरिन्।
मन्त्री न्यौपानेले तनहुँ जिल्लाको विकासमा आफूले सक्दो सहयोग पुर्याएको उल्लेख गर्दै आगामी दिनमा बजेट विनियोजनमा पनि सक्रियता देखाउने बताइन्।
कार्यक्रममा देवघाट गाउँपालिकाका अध्यक्ष तिलबहादुर थापा, आबुँखैरेनी गाउँपालिकाका अध्यक्ष शुक्र चुमान र बन्दीपुर गाउँपालिकाका अध्यक्ष सुरेन्द्र बहादुर थापाले स्थानीय तहमा कर्मचारीको अभाव, संघीय निजामती ऐन अभावका कारण देखिएको प्रशासनिक कमजोरि, वन ऐन तथा सार्वजनिक खरिद ऐन परिमार्जनको आवश्यकता जस्ता सुझावहरू दिएका थिए।
