Ang Tala-Domingo Lacson NHS

15/03/2025

Sa Lilim ng Kaniyang Pananahimik
Ni: Angelex Martus

May mga tao talaga na dumarating sa 'ting buhay na tila bang isinulat sa mga pahina ng sarili nating kuwento—mangyaring hindi bida, subalit mayroong epekto. Siya ang aking kuwento na hindi ko inaasahang isusulat ng tadhana. Siya'y hindi pangkaraniwan, hindi siya malakas sa salita, ngunit sa kaniyang katahimikan, doon ko siya mas lalo pang nakilala.

Sa simula, wari'y hindi siya madaling abutin—parang isang bituin na sadyang matayog para mahawakan. Subalit habang lumilipas ang mga araw, aking napansin na hindi lang siya isang bituin—isa siyang konstelasyon, mayroong sariling liwanag at sariling mundo. At sa kabila ng kaniyang matibay na panlabas, alam kong sa loob niya'y may lambing na kaniyang itinatago.

Hindi ko alam kung kailan nagsimula ang lahat. Sig**o nang kami'y unang nag-usap ng hindi pilit. O noong nakita ko siyang nag-aalala sa iba na hindi humihingi ng kapalit. O baka naman noong araw na napansin kong kahit hindi siya palatawa, siya ay may paraang makapagbigay ng saya—sa pamamagitan ng simpleng presensya niya.

Paminsan-minsan gusto kong tanungin ang sarili ko, bakit ako ganito? Bakit ako nag-aalala ng higit pa sa dapat? At bakit ako naaapektuhan 'pag siya'y biglaang nananahimik, kapag siya'y mukhang pagod at kapag alam kong mayroong bumabagabag sa kaniya? Ngunit paano ko 'to maipapaliwanag kung 'di naman ako kasintiyak kung kailan siya naging ganito kahalaga sa'kin?

Nais kong alagaan siya, kahit hindi niya man hilingin. Gusto ko siyang intindihin, kahit siya'y 'di palaging nagsasalita. Hinahangad kong iparamdam sa kaniya na hindi niya kinakailangang maging matibay sa lahat ng oras dahil hindi siya nag-iisa.

Gayunpaman sa kabila ng lahat ng 'to, may takot din ako—takot na baka sa isang araw, itanong niya sakin na, "Bakit ka nagmamalasakit?" sapagkat alam kong wala akong maisasagot at lakas ng loob upang ipaliwanag ang lahat. Subalit paano ko sasabihin na minsan, mayroong mga taong dumarating sa buhay natin at wala tayong magagawa kundi mahalin na lamang sila sa paraang kaya natin, kahit walang kasiguraduhan kung kailan matatapos ang kuwento?

02/03/2025

Bilog na Mundo, Landas ng Puso | LATHALAIN
ni: Angelex Martus

Sa laro ng buhay, hindi sapat na saluhin lamang ang bola—ngunit kinakailangan mo itong ipasa, ipanalo o minsan hayaang mahulog para matuto.

Sa simpleng pakahulugan, ang bola ay isang bilog na bagay na umiikot, tumatalbog at gumugulong sa iba't ibang direksiyon. Subalit 'pag tiningnan mo ito nang mas malalim, mas marami itong ipinapahayag kaysa nakikita natin. Sa kabuoan ng isang bilog naroon ang siklo ng buhay, ang 'di-tiyak na direksiyon ng kapalaran at ang walang kasiguraduhang galaw ng pag-ibig.

Sa laro, hawak natin ang bola, pero hindi ito nananatili. Minsan, kinakailangan mo itong ipasa. Minsan, tinatangkang agawin ng iba at kahit na anong gawin mo ay hindi mo ito agad-agad mababawi. Ganoon rin ang buhay—inaakala mong nasa iyo na ang lahat ng kontrol ngunit hindi. Sa isang iglap, hindi mo namamalayang mayroon ng isang pagbabago. Ganoon din sa larangan ng pag-ibig—mayroong dumadating sa 'yong buhay, ngunit hindi nananatili.

Ang bola ay hindi basta-bastang nalalaglag lang. Sa halip, ito'y tumatalbog, gumugulong at bumabalik na tila bang nagpapahayag ito na kahit anong bagsak mo, palaging may pagkakataon upang bumangon. Sa bawat kabiguang patungkol sa buhay't pag-ibig tila nagpapahayag na ito ay hindi katapusan. Lagi kang may pagpipilian na bumalik sa laro, sumubok muli, at muling lumaban.

Kapag inihagis ang bola, hindi mo alam kung saang direksyon ito tatalbog. Kahit gaano mo ito iniingatang ihagis upang ito'y dumako sa hinahangad mong sulok, may pagkakataon talaga na mag-iiba ang direksiyon nito. Kaugnay nito ang kapalaran—hindi mo hawak lahat ng bagay. Minsan, kahit may mga plano kang naiisip, may mga bagay na hindi nasusunod ayon sa 'yong ninanais. Katulad na lamang sa pag-ibig, kahit anong bugso ng damdamin, kung hindi 'yon ang taong nakatakda para sa'yo, kailangan mo itong tanggapin.

Ang bola ay isang maliit na simbolo ng mundo—bilog, hindi ito palaging patas, pero ito ay patuloy sa pag-ikot. Minsan ikaw ay nasa itaas at minsan naman nasa ibaba. Pero ang mahalaga, hindi ito tumitigil. Kung ang bola mismo ay hindi tumitigil at sumusuko sa bawat hampas o sipa, bakit tayo hihinto sa takbo ng buhay?

Sa kabuuan, ang bola ay hindi lang isang bagay na ginagamit sa laro. Ito’y paalala na ang buhay ay puno ng galaw, ang pag-ibig ay isang laro ng tiyaga at ang mundo ay hindi titigil sa pag-ikot kahit ilang beses tayong bumagsak.

28/02/2025

MAPEH Culmination, idiniwang sa DLHNS

“Ani ng Sining, Diwa at Damdamin”

Ginanap ang MAPEH Culmination sa Mataas na Paaralang Pambansa ng Domingo Lacson, sa lungsod ng Bacolod ngayong ika-26 ng Pebrero.
Ipinagdiwang ang kulminasyon bilang pagtatapos ng selebrasyon ngayong buwan ng MAPEH at buwan ng sining.
Isinimulan ang kulminasyon sa pamamagitan ng isang mataimtim na panalangin.
Pinangunahan ito ni Ginoong Lorenzo Ledesma, isa sa mga g**o ng departamento ng MAPEH.
Kasama na rito ang mga kinatawan ng DLNHS Choir at Rondalya na umawit at nagpatugtog ng musika.
Kasunod dito ang pagpapakitang gilas ng mga kinatawan ng Dance Sports katulad ng Arnis, Taekwondo, Hip-hop, at iba pa.
Dagdag pa rito, naki-jamming naman ang mga mag-aaral sa ginanap na live band sa gymnasium ng paaralan.
Nagsagawa rin sila ng isang raffle draw para sa mga mag-aaral na dumalo sa kulminasyon.
Nag-uwi naman ng samu't saring mga premyo ang mga masusuwerteng napili.

🖋️Mary Rose Quito
📸Zanjo Yulo
📸Lou Mendoza
📸Iriz Donoso

15/02/2025

SHS: Pundasyon ng Tagumpay
ni: Jamiela Rose Dilloro

Laktawan, lampasan, iwasan—tila ba sa mundong nagmamadali, ang pinakamahalaga ay makarating agad sa dulo. Dalawang taon, hindi ito isang maikling panahon ngunit ang Senior High School (SHS) ay hindi isang sagabal kundi isang paghahanda sa mga mas mabibigat na responsibilidad sa buhay kolehiyo.

Ayon sa House Bill No. 11213, maaari nang pumili ang mga mag-aaral sa baitang 10 ng University Preparatory Pathway, kung saan kukuha sila ng mga advance na pagsusulit upang suriin ang kanilang kahandaan sa kolehiyo. Ang mga makapapasa ay ituturing bilang mga senior high school graduates kahit hindi na sumailalim ng grade 11 at 12 ay diretso kolehiyo na. Ngayong aprobado na ang panawagang maaaring laktawan ang SHS upang mapabilis ang pagpasok sa kolehiyo, mas maikli, mas magaan, mas mabilis ang panahon na igugugol sa paaralan ngunit sa kagustuhang mapadali ang pag-aaral malaki rin ang posibilidad na mas mahihirapan ang kabataan sa kanilang kinabukasan.

Hindi ako sumasang-ayon dito dahil para sa akin, ito ay hindi magiging patas para sa mga mag-aaral na hindi makapapasa para sa nasabing kuwalipikasyon. Isipin natin, kapag ang mga kuwalipikadong estudyante ay nakapagtapos na ng kolehiyo samantalang ang mga hindi nakapasa ay tutungtong pa lamang, hindi ba't hindi ito patas?

Bilang isang studyante na naghahangad ng magandang kinabukasan, hindi ako pabor na laktawan ang senior high school sapagkat para sa akin malaki ang maitutulong ng SHS upang ang mga katulad kong estudyante ay mas magkaroon ng kahandaan sa buhay kolehiyo at sa mga hamon ng buhay. Ang SHS ay hindi isang pag-aaksaya ng oras na dapat laktawan, kundi isang pagkakataon ng pagtuklas sa sarili at pagpapaunlad ng mga kaalaman, kakayahan at talento. Ito ay isang yugto kung saan nabubuo ang pundasyon ng isang matatag na pagkatao at paghahanda sa mga hamon ng buhay kolehiyo at maging sa pagtatrabaho sa hinaharap. Ang pagmamadali ay maaaring magresulta sa kakulangan ng paghahanda at maaaring magdulot ng mas malaking problema sa hinaharap. Ang paglaktaw ng SHS ay maihahalintulad sa paglaktaw ng mga mahahalagang hakbang sa matagumpay na pamumuhay.

Sa huli, ang pag-aalis sa SHS ay isang desisyon na maaaring magdulot ng problema na maaaring kakulangan sa pagsasanay at hindi pantay na mga pagkakataon para sa mga mag-aaral. Bagamat makatutulong ito sa pagpapabilis ng pag-aaral ng karamihan bagkus ang oportunidad na ito ay hindi dapat maging sanhi upang isakripisyo ang mayabong na kaalaman at paghahanda na maibibigay ng SHS. Sa halip na alisin ang SHS, dapat ay mas pagtuunan ng pansin ang pagpapaganda at pagpapaunlad ng kurikulum at pagbibigay ng mas maraming suporta at oportunidad sa mga mag-aaral upang mas maging handa sila sa buhay kolehiyo. Tandaan na ang pag-aaral ay hindi dapat ipagpalit sa mabilis na panahon kaysa kalidad na edukasyon.

🖼️: Angelex Martus

15/02/2025

𝓜𝓰𝓪 𝓣𝓲𝓽𝓲𝓰, 𝓣𝓪𝔀𝓪𝓷𝓪𝓷, 𝓪𝓽 𝓪𝓷𝓰 𝓶𝓰𝓪 𝓣𝓲𝓷𝓪𝓽𝓪𝓰𝓸𝓷𝓰 𝓓𝓪𝓶𝓭𝓪𝓶𝓲𝓷
Ni: Angelex Martus

Araw ng Mga Puso— Puno ng mga namumulang rosas, matatamis na tsokolate, at nakaaantig pusong mga harana. Ngunit hindi lahat ng pagmamahal ay ipinapahayag sa mga ganitong paraan. Minsan, ito ay ipinapahiwatig sa tahimik na sandali, sa mga titig na tila may kakaibang kahulugan, mga birong may halong katotohanan.

Hindi lahat ng nagmamahal ay may lakas ng loob na ipakita o sabihin ang mga lihim na pagtingin. Minsan ito ay naipahahayag sa mga biro at tawanan, sa mga ginagawad na pag-aalala at sa mga tahimik na sandali na hindi na kinakailangang magsalita para maunawaan ang damdamin ng isa't-isa. Sa gitna ng mga magagarbong regalo—naglalakihang mga kumpol ng mga rosas at matatamis na mensahe, may mga lihim na tila hindi maipapahayag; mga damdaming hindi madaling mabatid ng iba.

Habang ang iba ay nagpapahayag ng damdamin sa harap ng madla, may ilan namang mas pinipiling manahimik, sapagkat hindi lahat ng nararamdaman ay madaling bigkasin. Karamihan sa'tin ay ipinapahayag ang pagmamahal sa pamamagitan ng mga kilos at gawa.

Tulad nga ng kasabihang "Action speak louder than words" mas pinipili ng iba na ipahayag ang kanilang mga damdamin sa kilos at hindi lamang sa mga matatamis na salita. Isang halimbawa nito ay isang tao na hindi palaging nagsasabi ng matatamis na salita sa kanyang iniirog, datapwat sapat na ang kaniyang mga kilos na ipinapakita—mga kilos na hindi ka hinahayaang mag-isa kapag ikaw ay kaniyang nakitang pagod at mananatili sa'yong tabi na tila bang hinihigop niya ang iyong kalungkutan hanggang sa mawala ito at bumalik ang 'yong sigla. Hindi siya yaong tipo na magsasabi na "Narito lang ako para sa'yo." Bagkus, ito ay kaniyang ginagawa at ipinapakita sa pamamagitan ng pananatili sa iyong tabi.

Sa Araw ng Mga Puso, karamihan sa'tin ay nag-aasam ng mga matatamis na salita ngunit hindi natin masusukat ang pagmamahal sa dami ng mga salitang binibitawan ng isang tao o sa mga materyal na bagay na natatanggap. Kundi, sa mga kilos na nagpapakita ng tunay na pag-aalala. Higit pa rito, sa kilos at pananatili na mas napalalalim ang tunay na kahulugan ng pag-ibig. Dahil dito, huwag nating kalimutan na minsan, ang pinakatunay na damdamin ay hindi kinakailangan pang bigkasin.

Hindi lahat ng mga nagmamahal ay may lakas ng loob na magsalita. Sa Araw ng Mga Puso, ito ay hindi lamang patungkol sa kung sino ang 'yong dapat sabihan ng mga salitang "Mahal Kita" dahil minsan ang katanungan ay... Kailan mo aaminin—o kailangan pa ba?

🖼️: Angelex Martus

15/02/2025

Pagdiriwang ng Buwan ng Puso sa Lacson High💖

13/02/2025

27/01/2025

20/11/2024

Mahusay! Papuri mula sa buong patnugutan ng Ang Tala💫

13/11/2024

As we have our Unit Meet tomorrow, we wish the best of luck to all our Lacsonian Athletes who will be representing our school.

The whole Lacsonian Community is here to show our full support.

13/11/2024

Abangan‼️

Get Ready for the Action!

Join us for the Unit I Sports & Athletic Meet 2024 on November 14-15 at Barangay Singcang-Airport National High School!

With the theme, "Championing mind power and health through excellence and unity in sports," students from Domingo Lacson NHS, Barangay Singcang-Airport NHS, and Andres Bonifacio SHS will come together in a showcase of athleticism, teamwork, and school spirit. Don’t miss the excitement and support your school!

📅 Date: November 14-15, 2024
📍 Location: Barangay Singcang-Airport National High School