𝗔𝗡𝗚 𝗧𝗨𝗟𝗔𝗬

21/09/2025

𝐋𝐀𝐓𝐇𝐀𝐋𝐀𝐈𝐍 | 𝐒𝐢𝐧𝐭𝐚𝐧𝐠 𝐊𝐨𝐫𝐨𝐧𝐚: 𝐈𝐯𝐡𝐚𝐧 𝐉𝐨𝐞 𝐒. 𝐌𝐚𝐫𝐳𝐨, 𝐇𝐮𝐰𝐚𝐫𝐚𝐧𝐠 𝐁𝐚𝐮𝐚𝐧𝐠𝐞ñ𝐨

Hindi lahat ng tagumpay ay nasusukat sa pinakamataas na palapag ng tagumpayan. May mga salaysay ng tagumpay na higit na mahalaga, yaong nakaukit sa puso ng bawat sumaksi, at yaong nag-iiwan ng bakas ng dangal at inspirasyon.

𝑳𝒂𝒌𝒂𝒔 𝒂𝒕 𝑫𝒂𝒏𝒈𝒂𝒍
Sa entabladong nagliliwanag sa Bauang, La Union, humakbang si 𝗜𝘃𝗵𝗮𝗻 𝗝𝗼𝗲 𝗦. 𝗠𝗮𝗿𝘇𝗼, kinatawan ng Don Eulogio de Guzman Memorial National High School, na tangan ang tibay ng loob at anyo ng isang kabataang Bauangeño. Sa kaniyang pagkilalang 2𝐧𝐝 𝐑𝐮𝐧𝐧𝐞𝐫-𝐔𝐩 𝐧𝐠 𝐌𝐫. 𝐓𝐞𝐞𝐧 𝐁𝐚𝐮𝐚𝐧𝐠 2025, higit na nasilayan ang kaniyang gilas, tikas, at marangal na pagdadala, larawan ng kabataang may paninindigan at mithiin.

𝑳𝒊𝒘𝒂𝒏𝒂𝒈 𝒏𝒂 𝑯𝒊𝒏𝒅𝒊 𝑲𝒖𝒎𝒖𝒌𝒖𝒑𝒂𝒔
Bawat ngiti niya ay larawan ng kumpiyansa, at bawat hakbang ay kasaysayang iniukit sa entablado. Sa kaniyang karanasan, ipinamalas ni Ivhan na ang dangal ay hindi nasusukat sa antas ng parangal, ito’y nananatili, kumikislap, at patuloy na nagbibigay liwanag sa landas ng iba.

Si Ivhan Joe S. Marzo ay hindi lamang kalahok sumungkit ng korona. Siya ay naging sining ng Sintang Korona, isang paalala na ang ginto ng tagumpay ay nakikita sa puso, hindi lamang sa ulo. Sa kaniyang paglalakbay bilang kinatawan ng DEGMNHS, ipinamalas niya na bawat kabataan ay may tinig, at bawat tinig ay may kakayahang magpabago ng daigdig.

𝑰𝒔𝒊𝒏𝒂𝒕𝒊𝒕𝒊𝒌 𝒏𝒊: 𝑩𝒉𝒆𝒏𝒛𝒂𝒏𝒆 𝑲𝒖𝒓𝒗𝒚

21/09/2025

𝐋𝐀𝐓𝐇𝐀𝐋𝐀𝐈𝐍 | 𝐁𝐚𝐧𝐲𝐮𝐡𝐚𝐲 𝐧𝐠 𝐌𝐮𝐭𝐲𝐚: 𝐓𝐚𝐠𝐮𝐦𝐩𝐚𝐲 𝐧𝐢 𝐀𝐧𝐠𝐞𝐥𝐢𝐜𝐚 𝐍𝐨𝐧𝐨𝐠

Liwanag na tila bagong bukang-liwayway ang pumukaw sa mata ng madla, banayad, marikit, at puno ng pangakong may darating na pagbabagong hindi madaling kalimutan. Mula sa pusod ng hilagang baybayin, isang dalagang Bauangeña ang naglakad dala ang pangarap na hindi para sa sarili lamang, kundi para sa lahat ng kabataang kaniyang kinakatawan.

𝑷𝒂𝒈𝒅𝒂𝒎𝒃𝒂𝒏𝒂 𝒏𝒈 𝑲𝒐𝒓𝒐𝒏𝒂
Sa mismong bayan ng Bauang, La Union, isinilang ang sandaling tatatak sa kasaysayan: itinanghal si 𝗔𝗻𝗴𝗲𝗹𝗶𝗰𝗮 𝗥. 𝗡𝗼𝗻𝗼𝗴 bilang 𝗠𝘂𝘁𝘆𝗮 𝗻𝗴 𝗞𝗮𝗯𝗮𝘁𝗮𝗮𝗻 2025. Bawat hakbangin sa entablado, sumiklab ang apoy ng kaniyang paninindigan, higit pa sa kagandahan ng anyo, ipinakita niya ang dangal at giting ng isang kabataang Bauangeño. Ang korona’y hindi lamang kumikinang sa kanyang bunbunan bagkus nagsisilbing sagisag ng marangal na kabataan ng Don Eulogio De Guzman Memorial National High School at Bauang.

𝑷𝒂𝒏𝒂𝒏𝒂𝒈𝒉𝒐𝒚 𝒏𝒈 𝑷𝒂𝒈𝒔𝒖𝒔𝒖𝒎𝒊𝒌𝒂𝒑
Hindi basta dumatal ang kaniyang tagumpay; ito’y hinabi ng tiyaga at pananalig. Bawat pagsasanay ay naging hakbang ng pagpupunyagi, bawat pagkadapa ay naging patunay ng kaniyang katatagan. Gaya ng isang ubas na binubuo ng araw at ulan bago maging alak, pinanday ng panahon ang kaniyang pagyamungmong. Sa huli, nagningning siya gaya ng tala na matagal nang nagkukubli, ngayo’y sumambulat sa kalangitan.

Ngayon, ang pangalan ni Angelica R. Nonog ay hindi lamang alaala ng isang entablado kundi sagisag ng inspirasyon. Ang kaniyang koronasyon bilang Mutya ng Kabataan 2025 ay patunay na ang kabataang Bauangeño ay may kakayahang umangat, magbigay-liwanag, at magmulat ng bagong pananaw. Siya’y naging alab ng kaniyang henerasyon, liwanag na patuloy na magbubukas ng daan para sa mga susunod pang pangarap.

𝑷𝒊𝒏𝒂𝒏𝒅𝒂𝒚 𝒔𝒂 𝑷𝒂𝒏𝒊𝒕𝒊𝒌 𝒏𝒊: 𝑩𝒉𝒆𝒏𝒛𝒂𝒏𝒆 𝑲𝒖𝒓𝒗𝒚

19/09/2025

𝐓𝐈𝐍𝐆𝐍𝐀𝐍 | 𝐏𝐚𝐠𝐩𝐮𝐩𝐮𝐠𝐚𝐲 𝐬𝐚 𝐊𝐚𝐚𝐫𝐚𝐰𝐚𝐧 𝐧𝐠 𝐇𝐚𝐥𝐢𝐠𝐢 𝐧𝐠 𝐒𝐞𝐫𝐛𝐢𝐬𝐲𝐨 𝐚𝐭 𝐓𝐔𝐋𝐀𝐘 𝐧𝐠 𝐢𝐧𝐬𝐩𝐢𝐫𝐚𝐬𝐲𝐨𝐧

Huwag ipagwalang-bahala ang kahalagahan ng araw na ito sapagkat ipinagdiriwang ang kaarawan ni 𝐃𝐫. 𝐀𝐥𝐯𝐢𝐧 𝐃. 𝐌𝐚𝐧𝐚𝐠𝐚𝐨𝐚𝐧𝐠, isang tunay na Tulay ng Pag-asa at Haligi ng Serbisyo para sa kaniyang pamayanan. Sa kaniyang wagas na dedikasyon at matapat na pamumuno, naipadama niya ang malasakit at naitawid ang marami tungo sa kaunlaran. Nawa’y pagkalooban siya ng Maykapal ng patuloy na kalusugan, karunungan, at biyaya upang higit pang maitaguyod ang kanyang makabuluhang misyon sa paglilingkod. Maraming salamat sa pagsisilbing gayagay ng ANG TULAY!

15/09/2025

📣 MAGHANDA NA, DEGMNHS! 📰🎙️🎥

Inaanyayahan ang lahat ng mag-aaral ng DEGMNHS na makilahok sa School-Level Press Conference 2025 na gaganapin sa huling linggo ng Setyembre 2025.

📌 Mga Patimpalak sa Pagsulat at Sining Pampahayagan:
✍️ Pagsulat ng Balita
✍️ Editoryal
✍️ Lathalain
✍️ Isports
✍️ Agham
✍️ Kolum
📸 Pagkuha ng Larawang Pampamamahayag
🎨 Pagguhit ng Kartung Pang-editoryal
📝 Pagwawasto ng Sipi at Pag-uulo ng Balita

Kasabay nito, magsasagawa rin ng Awdisyon / Tryout para sa mga nais maging bahagi ng:
🎤 TV/Radio Broadcasting Team
🎬 Video Editor
📹 Video Journalist

📅 Tryout Schedule: Setyembre 16–24, 2025

Para sa mga interesado, makipag-ugnayan sa Kagawaran ng Filipino at hanapin sina:
👨‍🏫 Dr. Alvin D. Mangaoang
👩‍🏫 Dr. Delia A. Estrada
👩‍🏫 Gng. Gracia G. Garcia
👩‍🏫 Bhenzane Kurvy Supsup
at iba pa.

✨ Huwag palampasin ang pagkakataong maging bahagi ng mga bagong henerasyon ng Campus Journalists ng DEGMNHS!

14/09/2025

𝗧𝗜𝗡𝗚𝗡𝗔𝗡 | 𝗧𝗨𝗚𝗧𝗨𝗚𝗜𝗡 𝗡𝗚 𝗣𝗔𝗚𝗞𝗔𝗞𝗔𝗞𝗜𝗟𝗔𝗡𝗟𝗔𝗡

Himig at musika’y nagsanib sa entablado nang itanghal ng SPA Rondalla na pinangunahan ni G. Marion Christopher Corpuz at M&A Band ang kanilang tugtugin at mga awitin para sa Buwan ng Wika. Bawat nota ay naging kasangkapang nagbubuklod, at bawat liriko ay umuukit ng gunita hinggil sa yaman ng ating kultura. Sa kanilang manaka-nakang pagtatanghal, nadama na ang wika ay hindi lamang binibigkas, kundi, tinutugtog, inaawit, isinasalin, at isinusulat sa mismong himig ng ating bayan.

✒️ 𝑰𝒕𝒊𝒏𝒊𝒊𝒎 𝒏𝒊: 𝑩𝒉𝒆𝒏𝒛𝒂𝒏𝒆 𝑲𝒖𝒓𝒗𝒚
📸 𝑹𝒆𝒕𝒓𝒂𝒕𝒐 𝒏𝒊: 𝑨𝒍𝒍𝒂𝒏 𝑫𝒂𝒗𝒆 𝑫. 𝑪𝒂𝒓𝒕𝒂𝒔

14/09/2025

𝗟𝗔𝗧𝗛𝗔𝗟𝗜𝗡 | 𝗜𝗡𝗗𝗔𝗬𝗢𝗚 𝗡𝗚 𝗪𝗜𝗞𝗔

Setyembre 3 — umalingawngaw ang himig ng pamana sa entablado habang unti-unting sumibol ang kultura ng wika sa pamamagitan ng sayaw. Sa bawat kumpas ng kamay at indak ng paa, naramdaman ang tibok ng bayan. Hindi lamang ito pagtatanghal, kundi pagninilay na ang ating wika at sining ay magkaugnay na sumasalamin sa ating pagkakakilanlan.

Naging buhay na retrato ang kasaysayan sa husay ng mga mag-aaral ng SPA (Dance Arts), kasiglahan ng SYSTEMA (Grade 11 Alacaraz at Ferrera), at kakaibang birtud ng SPFL (Chinese Mandarin). Bawat yapak ay tila titik ng isang tulang isinasayaw, bawat kumpas ay alon ng panata na hindi kailanman mapaparam. Sa kanilang pagpitlag, muling nabuo ang ugnayan ng nakaraan, kasalukuyan, at hinaharap.

Higit pa sa aliw, ang sayaw ay naging panata ng kabataan na ipagpapatuloy ang diwa ng wika at kultura. Sa kanilang indak nanahan ang alaala; sa kanilang sigla umusbong ang pag-asa. Sa entablado ng DEGMNHS , muling napatunayan na ang sining ay buhay, at ang wika ang kanyang pusong pumipintig.

✒️ 𝑰𝒕𝒊𝒏𝒊𝒊𝒎 𝒏𝒊: 𝑩𝒉𝒆𝒏𝒛𝒂𝒏𝒆 𝑲𝒖𝒓𝒗𝒚
📸 𝑨𝒏𝒊𝒏𝒂𝒈 𝒏𝒊𝒏𝒂: 𝑨𝒍𝒍𝒂𝒏 𝑫𝒂𝒗𝒆 𝑫. 𝑪𝒂𝒓𝒕𝒂𝒔, 𝑱𝒂𝒎𝒂𝒊𝒄𝒂 𝑪𝒊𝒆𝒍𝒐 𝑪. 𝑷𝒊𝒛𝒂, 𝒂𝒕 𝑫𝒓. 𝑨𝒍𝒗𝒊𝒏 𝑫. 𝑴𝒂𝒏𝒈𝒂𝒐𝒂𝒏𝒈

12/09/2025

𝗧𝗜𝗡𝗚𝗡𝗔𝗡 | 𝗠𝗮𝘀𝗶𝗴𝗮𝗯𝗼𝗻𝗴 𝗧𝗮𝗯𝗹𝗲𝘂 𝗧𝗮𝗺𝗽𝗼𝗸 𝘀𝗮 𝗕𝘂𝘄𝗮𝗻 𝗻𝗴 𝗪𝗶𝗸𝗮

Ginanap noong Setyembre 3 ang makukulay na pagtatanghal ng tableau bilang tampok na bahagi ng Buwan ng Wika. Sa bawat nakapirming eksena, muling nabuhay ang mga larawan ng ating kasaysayan at kultura, na masining na isinabuhay ng mga kalahok.

Pinangunahan ng SAMAFIL ang masusing paghahanda, katuwang ang SSLG, mga mag-aaral ng SPA, at iba pang mag-aaral ng DEGMNHS bilang tulay ng koordinasyon. Bawat tagpo ay nagpaalala na ang ating pamana ay dapat ipagmalaki, at sa pamamagitan nito’y naipakita ng kabataan ang kanilang malikhaing galing at malasakit sa sariling wika at tradisyon.

✒️ 𝑳𝒊𝒌𝒉𝒂’𝒕 𝑷𝒂𝒏𝒂𝒏𝒅𝒂 𝒏𝒊: 𝑩𝒉𝒆𝒏𝒛𝒂𝒏𝒆 𝑲𝒖𝒓𝒗𝒚
📸 𝑹𝒆𝒕𝒓𝒂𝒕𝒐 𝒏𝒊: 𝑨𝒍𝒍𝒂𝒏 𝑫𝒂𝒗𝒆 𝑫. 𝑪𝒂𝒓𝒕𝒂𝒔

12/09/2025

𝗧𝗜𝗡𝗚𝗡𝗔𝗡 | 𝗗𝗜𝗪𝗔 𝗔𝗧 𝗪𝗜𝗞𝗔: 𝗣𝗔𝗚𝗗𝗜𝗥𝗜𝗪𝗔𝗡𝗚 𝗡𝗚 𝗞𝗨𝗟𝗠𝗜𝗡𝗔𝗦𝗬𝗢𝗡 2025

Ipinagdiwang noong ika-3 ng Setyembre ang maringal na pagbubukas ng Buwan ng Wika na pinangasiwaan ng mga kagalang-galang na pinuno at panauhin ng ating paaralan. Sa pangunguna nina G. Eliseo C. Buenafe, Punong-Guro, at Gng. Jemima Villaraza, Assistant Principal II, higit na nabigyang-diin ang layunin ng selebrasyon. Naghandog naman si Gng. Kim Cortez ng isang taimtim na Doxology na nagsilbing panimulang dalangin ng programa.

Kasunod nito ay ang makahulugang mga mensahe nina Dr. Delia A. Estrada, Dr. Alvin D. Mangaoang, Gng. Karen Xenia, G. Adrian Flores at Gng. Shaira G. Carbonell, na nagbigay-inspirasyon sa lahat ng dumalo. Pinakatampok ang pagdalo at pagbabahagi ng mensahe ni Kgg. Ma. Clarissa T. Lee, Punong-Bayan, na nagpatibay sa adhikain ng mas masidhing pagtataguyod sa wikang Filipino. Pinamunuan naman nina Marshal Salayon at Nathalie Antonio ang entablado na siyang na nagsilbing tinig ng programa.

Nagsilbing makapangyarihang gabay tungo sa mas malalim na pag-unawa at pagmamahal sa ating sariling identidad ang bawat titik na lumabas sa kanilang mga labi. Ito’y naging hudyat ng maningning at masiglang pagsisimula ng selebrasyon, isang pagdiriwang na hindi lamang nag-aalay ng kasayahan, kundi higit sa lahat ay naghahasik ng pag-ibig at pagpapahalaga sa ating pambansang wika at kultura.

✒️ 𝑳𝒊𝒌𝒉𝒂’𝒕 𝑷𝒂𝒏𝒂𝒏𝒅𝒂 𝒏𝒊: 𝑩𝒉𝒆𝒏𝒛𝒂𝒏𝒆 𝑲𝒖𝒓𝒗𝒚
📸 𝑹𝒆𝒕𝒓𝒂𝒕𝒐 𝒏𝒊: 𝑨𝒍𝒍𝒂𝒏 𝑫𝒂𝒗𝒆 𝑫. 𝑪𝒂𝒓𝒕𝒂𝒔

09/09/2025

𝗘𝗗𝗜𝗧𝗢𝗥𝗬𝗔𝗟 | 𝗟𝗨𝗡𝗢𝗗 𝗦𝗔 𝗕𝗔𝗛𝗔, 𝗟𝗨𝗡𝗢𝗗 𝗦𝗔 𝗞𝗢𝗥𝗔𝗣𝗦𝗬𝗢𝗡

Tuwing bumubuhos ang ulan, madalas nalang maraming binabahang kalsada, mga lubog na barangay at mamamayang nagdurusa sa pinsala. Kaunting ulan lamang, baha agad. Ngunit ang mas nakakalunod keysa sa baha ay ang katiwalian na sumasabay rito—ang mga ghost projects sa ilalim ng flood control ng Department of Public Works and Highways (DPWH).

Sa papel, milyon-milyong pondo ang inilaan para sa mga proyektong flood control. Ngunit sa kabila nito marami parin ang mga lugar na nababaha, dahil ang totoo ay nananating plano na lamang ang mga proyektong ito at hindi talaga natutupad. Ang mas nakakaalarma pa, nalaman na ang negosyanteng si Sarah Discaya ang may-ari ng siyam na construction firms na nakakuha ng malalaking proyekto para sa flood control mula sa DPWH. Sa halip na makakita tayo ng mga tunay na imprastraktura, parang ang pondo na dapat sana’y proteksyon natin laban sa baha ay napupunta lang sa pagpapayaman, pagbili ng mga mamahaling kotse, at marangyang pamumuhay. Samantala, ang mga tao ay patuloy na nahihirapan sa baha at nawawalan ng tiwala sa gobyerno.

Hindi lang ito tungkol sa kapabayaan, kundi malinaw na halimbawa ng sistematikong pandaraya. Ang mga 'ghost projects' at paulit-ulit na pagbigay ng kontrata sa iisang tao o grupo ay hindi lang simpleng anomalya—ito ay patunay ng malalim na sugat ng katiwalian sa ating gobyerno.

Hindi sapat ang pansamantalang imbestigasyon o paminsan-minsang pagsisiwalat ng mga katiwalian. Kailangan ng managot ang mga sangkot—mula sa pinakamataas na opisyal hanggang sa mga kasabwat nilang mga kontraktor. Hindi dapat gawing biro ang mga "ghost projects" habang ang mga tao ay hirap na hirap sa mga baha.

Kung hindi ito masosolusyunan, patuloy na magtatanong ang mga tao: Nalulunod ba tayo dahil sa ulan, o dahil sa korapsyon?

Guhit ni: Olivia Halog
Katha ni: Princess Juliena Casero

09/09/2025

𝗧𝗜𝗡𝗚𝗡𝗔𝗡 | 𝗖𝗢𝗟𝗟𝗔𝗕𝗢𝗥𝗔𝗧𝗜𝗩𝗘 𝗔𝗡𝗗 𝗗𝗘𝗦𝗞𝗧𝗢𝗣 𝗣𝗨𝗕𝗟𝗜𝗦𝗛𝗜𝗡𝗚

Higit pa sa isang buwanang selebrasyon, ang Buwan ng Wika ay sagradong pagkakataon upang muling ipagbunyi ang ating katutubong wika, tinig ng ating lahi, salamin ng ating pagkakakilanlan, at haligi ng ating pagkakaisa. Sa temang “Paglinang sa Filipino at Katutubong Wika: Makasaysayan sa Pagkakaisa ng Bansa,” higit na naipapamalas ang alab ng ating damdamin para sa bayan at ang matibay na bigkis ng ating pagkakaisa.

Ang ating sariling wika ay hindi lamang daan ng pakikipagtalastasan, kundi siyang sumasalamin sa ating ulirat bilang Pilipino. Sa bawat pantig at salita ay nakaukit ang ating kasaysayan; sa bawat taludtod at talata ay nakalimbag ang ating pag-ibig sa bayan.

🌸 “Wika ay buhay ng lahi, lakas ng bayan, at tagapag-ugnay ng sambayanan.” 🌸

👉 Tuklasin ang diwa ng pagdiriwang dito:
https://online.fliphtml5.com/lvbdp/aemn/

Balita: Jamaica Cielo C. Piza
Editoryal: Princess Juliena R. Casero
Kartun: Olivia Halog
Lathalain: Aeazhelle Jhuris R. Cabradilla
Retrato: Allan Dave D. Cartas
Layout: Mary Azrielle Eunice R. Javillonar

✍️: Bhenzane Kurvy

09/09/2025