07/05/2026
May 08
Let Us Pray No. 129
Oh Panginoon naming Dios, lahat ng bagay na ito na aming inihanda upang ipagtayo ka ng bahay na ukol sa iyong banal na pangalan ay nangagmumula sa iyong kamay, at iyong sariling lahat. 1 Cronica 29:16
Abba, Panginoon naming Dios, pinakahahangad naming mahandugan ka ng kalugodlugod na paglilingkod sapagkat ikaw ay karapatdapat na papurihan at sambahin bilang iisang tunay na Dios at Tagapagligtas ng aming mga kaluluwa. Ngunit Panginoon, ano ang maibibigay namin sa iyo na hindi nagmula sa iyo? Kahit ang aming buhay ay tiyak na kukulangin bilang kapalit sa dakilang mga gawa ng iyong Agape. Kapag minamasdan namin ang aming mga sarili sa iyong kadakilaan at kaluwalhatian, nasusumpungan namin ang aming mga sarili na nagnanais na mahandugan ka ng higit sa abot ng aming magagawa para sa iyong ikaluluwalhati. Inaanyayahan ka namin Panginoon, nawa ay pumasok ka sa aming mga buhay at payagan mong mabuhay kami sa iyong piling upang kami, lahat kami, ang bawat isa at bilang isang iglesia ay makatayo sa iyong harapan bilang isang templong banal na tinatahanan ng iyong espiritu. Sa gayon, mapaglingkuran ka namin sa paraang nakalulugod sa iyo at hindi sa kanino pa man ni hindi sa aming mga sarili man. May isang bagay pa na aming hinihiling sa iyo, Panginoon, nawa ay maging nasain at kaaliwan namin ang sama-samang masigasig na paggawa sa ikatatag ng iyong kaharian at huwag kaming mapanatag na pumirmis lamang sa aming nakikisamihang mga bahay. Likhaan mo kami ng magiting na kalooban upang kusa naming maiprisinta ang aming sarili at maging mga kamanggagawa sa bisyon at misyon ng iyong Iglesia sa halip na saksihan lamang namin ang katuparan nito. Panginoon, sidlan mo ng sikap ang aming mga puso. Amen.
Shalom po
MP Hiel
