30/08/2026
Umaaligid: Panawagan sa pamamagitan ng pagkakakilanlan
ni Arvin Dave Aguilar
Sa patuloy na pagbabago ng takbo ng mundo, may mga pagkakataong ang mabuti ay nagiging masama at ang liwanag ay nagbubuo ng pangamba. Sa ganitong kalagayan, ang awiting “Umaaligid” nina Sarah Geronimo at SB19 ay nagbibigay ng babala sa bawat isa na maging mapagmatyag, sapagkat ang kasamaan ay maaaring unti-unting bumalot sa atin nang hindi natin namamalayan.
Noong 2025, inilabas nina Sarah Geronimo at SB19—dalawa sa mga tanyag na pangalan sa industriya ng musikang Pilipino na patuloy na nagbibigay-kilala sa Original Pilipino Music o OPM—ang “Umaaligid.” Hanggang sa kasalukuyan, nananatiling maiuugnay ang mensahe ng awitin sa iba't ibang sitwasyong nararanasan ng mga Pilipino sa bawat sulok ng lipunan.
“‘Di makatakbo,
May nakasunod o nakaharang, oh
Maging mga salamin na hawak-hawak mo”
Sa pamamagitan ng mga linyang ito, malinaw na naipararating ng awitin ang mensahe ng isang panganib na tila patuloy na sumusunod at nagbabantay saan man tayo magpunta. Isa sa mga lugar na maaaring maiugnay rito ay ang paaralan, kung saan patuloy na nagiging usapin ang kaligtasan ng mga estudyante at g**o. Kabilang dito ang mga balitang may kaugnayan sa pagdadala ng mga armas, gaya ng baril, sa loob o paligid ng paaralan. Ang ganitong mga pangyayari ay maaaring magdulot ng panganib at makaapekto hindi lamang sa pisikal na kalagayan ng mga indibidwal, kundi pati sa kanilang emosyonal at sikolohikal na kalusugan.
Bilang tugon sa ganitong suliranin, nagsagawa ang JILCF Office of Student Affairs ng programang tinatawag na S.A.F.E. JILCF, na nangangahulugang Secure Every Child Against Bullying and Abuse, Foster Respect and Responsibility, and Ensure a Safe and Learning Environment. Layunin nitong magbigay ng proteksiyon sa mga estudyante at g**o at makatulong sa pagpapanatili ng ligtas na kapaligiran sa loob at labas ng kampus.
Sa pamamagitan ng S.A.F.E. JILCF, nababawasan ang pangamba sa loob ng kampus at napapatibay ang seguridad ng bawat isa. Nakatutulong din ang programang ito sa pagtugon sa panawagan ng awiting “Umaaligid”—ang maging mapagmatyag at huwag ipagsawalang-bahala ang mga panganib na maaaring nasa paligid. Sa ganitong paraan, napabubuti ang kalidad ng kapaligiran hindi lamang sa loob ng silid-aralan, kundi sa bawat sulok ng sintang paaralan.
“Mag-ingat-ingat ka at baka mabihag ka ng mga umaaligid,
Idilat ang mata, ’wag kang basta-basta”
Sa patuloy na pagbabago ng mundo, isang bagay ang hindi magbabago: ang boses ng Pilipino. Sa pamamagitan ng musika, naipararating nina Sarah Geronimo at SB19 ang mga suliranin at pangambang nararanasan ng ating lipunan. Dahil dito, hindi lamang libangan ang naibibigay ng mga artista sa kanilang mga tagahanga. Nagiging instrumento rin ang kanilang impluwensiya upang maghatid ng kamalayan at panawagan para sa pagbabago.
Sa isang awitin, maaaring magsimula ang isang paalala. Sa isang boses, maaaring mabuo ang isang panawagan. At sa pakikinig ng bawat isa, maaaring magsimula ang pagkilos tungo sa isang mas ligtas na paaralan at mas ligtas na lipunan.
