09/08/2025
BALITA | Cook Off 2025: G**o at Estudyante ng JILCF, Nagtagisan sa talento sa pagluluto
Ni Richard Santos
Nagbalik ngayong taon ang Cook Off Competition ng Jesus Is Lord Colleges Foundation (JILCF) — tampok ang mga g**o at mag-aaral na nagtagisan sa husay sa paghahanda ng masustansiyang pagkain.
Batay sa temang “Food at Nutrisyon Security, Maging Priority! Sapat na Pagkain, Karapatan Natin!”, idinaos ang patimpalak bilang bahagi ng pagdiriwang ng Nutrition Month.
Noong Agosto 7, 2025, nagharap ang bawat strand ng Senior High School department sa culinary laboratory ng paaralan, gamit ang kalabasa bilang pangunahing sangkap. Nagwagi ang Grade 11 STEM na pinangunahan nina Kim D. Morales at Miguel Saeven S. Toledo, sinundan ng Grade 12 ABM at Grade 12 TVL.
Samantala, Agosto 8 naman ginanap ang Teachers’ Edition ng patimpalak na hinati sa dalawang kategorya. Sa Junior High School, wagi sina Mr. Luis King Nicodemus at Mrs. Jeraldlyn Basilio sa kanilang lutuin na tampok ang monggo o toge. Sa Senior High School, nanalo ang TVL strand na pinamunuan nina Mr. Limuel Z. Magbanua at Ms. Cristina B. Santos na ginamit ang tokwa bilang pangunahing sangkap.
Layunin ng Cook Off na itaguyod ang kahalagahan ng masustansiya at abot-kayang pagkain sa hapag ng bawat pamilyang Pilipino, gayundin ang pagpapakita ng talento at pagkamalikhain sa larangan ng pagluluto.
Photography: Dan Pamintuan, Chant Constantino, Tristan Carlos, Kaynne Amado & Aaliyah Ople
Editing: Nelyn Cristobal
