09/02/2026
AI-Powered Traffic Lights Posibleng Ipatuman sa Butuan City?
Ang AI-powered traffic lights nga giplanong ipalit sa City Traffic and Transport Management Department (CTTMD) ug ibutang sa mga nag-unang kalsada sa Butuan City posibleng maimplementar sa umaabot nga panahon.
Ang maong proyekto adunay tumong nga makapamenos sa mga aksidente sa dalan ug mapalambo ang disiplina sa mga motorista, aron mamahimong mas masinugtanon sa mga lagda sa trapiko ang mga indibidwal sa dakbayan sa Butuan.
Usa sa mga pangunahing feature sa AI-Powered Traffic Light o Intelligent Traffic System (ITS) mao ang automatic detection sa mga traffic violator, sama sa “beating the red light.” Pinaagi sa integrated cameras, awtomatikong ma-detect ug ma-record ang sakyanan o motorsiklo nga nakalapas sa balaod trapiko, lakip ang plate number, kolor, klase, ug tipo sa sakyanan.
Ang maong impormasyon maitala sa computer system ug posibleng gamiton isip basihan sa pag-isyu og show cause order, aron mapatuman ang hustong penalty kon mapamatud-an nga nakalapas sa mga lagda sa trapiko ang motorista.
