17/01/2026
PALDO NA NAGING BATO PA!
Paslak na sa selda ang babaye nga maoy nag kawat sa kwarta sa Pari sa sulod sa iyang kwarto sa Barangay Candulawan lungsod sa Minglanilla gahapon sa hapon, Enero 14, 2026.
Ang suspetsado mao si Christine Ababon, 31, taga Sitio Ufeba, Barangay Bulacao sa siyudad sa Sugbo.
Gisakiyo ni Ababon ang dul-an P200,000 nga kwarta sa pari sa sulod sa iyang kwarto human maablihi ang pultahan ani gamit ang picklock tools.
Human makuha ang maong kantidad dali nga misibat ang suspetsado paingun sa siyudad sa Sugbo.
Pagbalik sa pari alas 5:30 sa hapon nakugang nalang siya nga nawala na ang iyang kwarta ug gipasusi dayon niya ang CCTV footage ug didto iyang nakita nga gisulod diay og kawatan nga usa ka babaye iyang kwarto.
Mi report dayon si Father sa Minglanilla police station ug gi post sa social media ang video sa usa ka page nga mi resulta sa dali nga pag viral.
Pagka gabii dunay mipahibawo ni Father nga nailhan na ang naa sa video nga kawatan nga taga Bulacao.
Gipahibawo dayon sa biktima ang kapulisan sa Minglanilla ug milusad dayon sila og follow up operation ug malampuson nga nadakpan ang suspetsado.
Apan sa P200,000 nga kwarta nga gikawat P15,000 nalang ang nahabilin kay gipalit na diay ni Ababon og brand new nga motorsiklo nga Yamaha Mio ug bluetooth speaker.
Kasong pagpangawat ang atubangon sa maong suspetsado nga matud pa naka igo na usab og pangawat sa siyudad sa Mandaue, Liloan ug lungsod sa Badian.
