06/07/2026
🥹😱 SSS Calamba Branch sinabing nagkaroon daw ng error sa bank transfer??!! 😱
Halos 5 taon na akong SSS pensioner, at ngayon lang nangyari na na-delay ang pagpasok ng pension ko.
Responsable akong pensioner. Taon-taon akong maagang nagko-comply sa ACOP, kaya regular na pumapasok ang pension ko tuwing ika-2 ng bawat buwan.
Ngunit nitong July 2, 2026, walang pumasok sa aking bank account. Naghintay muna ako ng ilang araw dahil baka delayed lang, pero wala pa rin.
Kaya kahapon, July 6, nagtungo ako sa SSS Calamba, Laguna Branch. Halos 6 na oras akong pumila, at pagdating sa counter ay sinabi sa akin na wala naman daw problema sa aking records. Ang paliwanag ay nagkaroon umano ng error sa pagpapadala sa bangko, at ang target na petsa ng pag-credit ay July 16, 2026.
Nauunawaan ko na maaaring magkaroon ng technical error. Pero sana ay isipin din ang epekto nito sa mga pensioner.
Ang pension na ito ang inaasahan ko para sa Meralco, tubig at iba pang pangunahing gastusin. Ang mga bayarin ay hindi naman nade-delay dahil lang may technical error. Hindi ko rin naman puwedeng sabihan ang Meralco o water provider ng, "Pasensya na po, delayed ang pension ko kaya sa July 16 na lang ako magbabayad."
Hindi ito tungkol sa pagiging impatient. Ito ay tungkol sa mga pensioner na umaasa sa tamang oras ng kanilang pension para sa kanilang pang-araw-araw na pangangailangan.
Umaasa akong matutupad ang ipinangakong pagpasok ng pension sa July 16, at sana ay magkaroon ng mas mabilis na solusyon kapag may ganitong aberya upang hindi na maranasan ng iba pang pensioners ang parehong sitwasyon.
