SNS Ang Samariñan

03/10/2025

𝘗𝘢𝘯𝘪𝘵𝘪𝘬𝘢𝘯| 𝘿𝙖𝙡𝙖𝙬𝙖𝙣𝙜 𝙏𝙞𝙣𝙞𝙜, 𝙄𝙨𝙖𝙣𝙜 𝙋𝙖𝙝𝙞𝙣𝙖

Sa pagdaan ng panahon, dalawang tinig ang sabay na sumibol sa Samar National School—mga tinig na naging saksi sa paghubog ng kabataan at naging tagapaghatid ng kanilang mga kuwento’t pamahayagan.
Isa ang Ang Samariñan, dumadaloy sa wikang sariling atin; samantalang ang The Samariñan ay kumakatawan naman sa tinig sa wikang banyaga. Magkaibang wika, magkaibang anyo, subalit iisa ang kanilang adhikain: maging tinig ng katotohanan at daluyan ng diwa ng bawat Samariñan.

Ngayon, ang dalawang publikasyong minsang nagtaglay ng magkaibang tinig ay muling nagtagpo sa iisang layunin. Mula sa magkahiwalay na pahina, sila’y nagsanib upang bumuo ng isang pahayagang mas matatag sa adhikain, mas makulay sa pagpapahayag, at higit na makapangyarihan sa pagbibigay-boses sa kabataan. Sa iisang tahanan, pinagsama ang diwa ng tradisyon at sigla ng inobasyon—ang wikang sariling atin at wikang pandaigdig.

Ngunit ang pag-iisang ito ay higit pa sa simpleng pagsasanib ng pangalan. Ito’y pagtatagpo ng mga diwa—ng panitikan, paninindigan, at wagas na pagmamahal sa paaralan at katotohanan. Isa itong makasaysayang yugto na nagpapaalala: sa kabila ng pagkakaiba, mas makabuluhan at higit na makapangyarihan ang tinig kapag ito’y nagkakaisa.

Mula ngayon, sa bawat artikulo, panitikan, at balitang isusulat, iisa ang pintig ng puso:

Pusong Samariñan, tapat at dalisay,
Tinig ng kabataan, busilak at buhay.
Handang magsalita, makinig, at tumugon,
Ilaw sa dilim, gabay sa bawat panahon.

Bagong Yugto, Bagong Simula!

𝘷𝘪𝘢 𝙆𝙖𝙩𝙝𝙡𝙚𝙚𝙣 𝙑𝙞𝙨𝙩𝙖
𝘥𝘪𝘣𝘶𝘩𝘰 𝘯𝘪 𝘾𝙯𝙖𝙧𝙞𝙣𝙖 𝘾𝙤𝙧𝙩𝙖𝙣
𝘱𝘢𝘨 𝘢𝘢𝘯𝘺𝘰 𝘯𝘪 𝙅𝙖𝙣𝙚𝙡𝙡𝙚 𝘽𝙚𝙧𝙣𝙖𝙧𝙙𝙤

16/09/2025

𝙈𝙖𝙡𝙞𝙜𝙖𝙮𝙖𝙣𝙜 𝙋𝙖𝙜𝙗𝙖𝙩𝙞, 𝙈𝙞𝙘𝙝𝙖𝙚𝙡 𝘽𝙖𝙗𝙤𝙣!

Sa likod ng bawat pahina ng Ang Samariñan, naroroon ang pusong nag-aalab para sa katotohanan at tinig na handang ipaglaban ang tama. Siya’y hindi lamang manunulat kundi isang pinunong tapat at mapagkakatiwalaan—si Michael Babon, ang kasalukuyang editor-in-chief na nagsisilbing gabay ng publikasyon.

Sa tinta at salita, hatid niya’y pag-asa; sa letra at diwa, dala niya’y katarungan at hustisya. Ngunit higit pa sa kanyang husay sa pagsusulat, siya rin ay nagbibigay-saya at ligaya sa marami. Sa kanyang presensiya, gumagaan ang bawat gawain at nagiging mas makulay ang mundo ng pamamahayag.

Sa kanyang pamumuno, patuloy niyang inihuhubog ang bagong mukha ng Ang Samariñan—isang pahayagang hindi natitinag sa hamon ng panahon bagkus higit pang nagliliwanag sa pagyakap sa makabagong pamamahayag. Siya ang buhay na patunay na ang kabataan, gaano man kabata, ay may kapangyarihang baguhin at pagandahin ang lipunan sa pamamagitan ng panulat na tapat at makahulugan.

At kung may isang taong maaaring ilarawan bilang perpektong depinisyon ng “small but terrible,” siya iyon. Maliit man ang pangangatawan, malaki naman ang kanyang tapang, talino, at husay sa pamumuno. Sa kanyang paggabay, ang Ang Samariñan ay patuloy na humuhubog ng mga manunulat na matatag, mapanuri, at makatao.

Sa bawat pahina ng pahayagan ay nasasalamin ang kanyang dedikasyon—ang alab ng katapatan, malasakit, at galing sa pamumuno. Nawa’y sa bagong yugto ng iyong buhay, patuloy kang maging ilaw ng katotohanan at haligi ng kabataan sa mundo ng pamamahayag.

Isang maligayang kaarawan sa aming Punong Patnugot—ang tinig ng katotohanan at saya ng publikasyon.

15/09/2025

𝘿𝙚𝙢𝙤𝙠𝙧𝙖𝙨𝙮𝙖, 𝙏𝙞𝙣𝙞𝙜 𝙣𝙜 𝙋𝙖𝙜-𝙖𝙨𝙖

Tuwing sumasapit ang Pandaigdigang Araw ng Demokrasya, ipinapaalala sa atin na ang tunay na yaman ng isang bayan ay hindi lamang nasusukat sa ginto o kayamanan, kundi sa kalayaan at karapatang tinatamasa ng mamamayan. Ang demokrasya ay haligi ng katarungan, haligi ng pagkakaisa, at haligi ng pagkakapantay-pantay.

Ngunit hindi sapat na ipagdiwang lamang ang araw na ito. Higit na mahalaga ang isabuhay ang diwa ng demokrasya araw-araw—sa pakikinig sa boses ng iba, sa paggalang sa karapatan ng kapwa, at sa matapang na paninindigan para sa tama at makatarungan.

Demokrasya’y sagisag ng pagkakaisa,
Katarungan at kalayaan para sa masa.
Kung bawat isa’y kikilos at makikibahagi,
Bayan ay uunlad at magiging marilag lagi.

Kaya naman sa Pandaigdigang Araw ng Demokrasya, tayo’y manindigan. Panatilihing buhay ang ating karapatan, ipaglaban ang ating kalayaan, at pahalagahan ang ating pagkakaisa. Sapagkat ang demokrasya ay hindi lamang isang sistema ng pamahalaan—ito ay tinig ng pag-asa, tibay ng bansa, at lakas ng bawat isa.

𝙈𝙖𝙡𝙞𝙜𝙖𝙮𝙖𝙣𝙜 𝘼𝙧𝙖𝙬 𝙣𝙜 𝘿𝙚𝙢𝙤𝙠𝙧𝙖𝙨𝙮𝙖!
Sa pagkakaisa at katarungan, mas maliwanag ang kinabukasan...

𝘷𝘪𝘢 𝙈𝙖𝙧𝙞𝙖𝙣𝙣𝙚 𝙑𝙞𝙨𝙩𝙖 | 𝕬𝖓𝖌 𝕾𝖆𝖒𝖆𝖗𝖎𝖓𝖆𝖓

15/09/2025

𝘗𝘈𝘕𝘐𝘛𝘐𝘒𝘈𝘕 | 𝙄𝙨𝙖𝙣𝙜 𝙎𝙪𝙡𝙮𝙖𝙥

Sa bawat hakbang, bawat galaw,
sa isip ko’y ikaw ang tanaw.
Isang sulyap lang, sapat na sa akin,
ikaw ang awit ng pusong kay tamis damhin.

Hindi ko alam kung bakit, sa dagat ng mga taong dumaraan, siya lamang ang natitira sa aking isipan. Ang kanyang ngiti’y tila liwanag ng umaga na pumapawi sa dilim ng aking kaba. Ako’y isang binibining umaasa at natutong magtago ng lihim na damdamin. Isang “happy crush” lamang kung tawagin, ngunit sa akin iba na ang pagtingin. Sa bawat pagtama ng kanyang tingin, ako’y lubusang nahumaling.

Ngiti niyang kay tamis, parang araw sa umagang walang kapantay,
nagbibigay sigla sa pusong nag-aalala.
Tila tala sa gabi ang kanyang mga mata,
nag-iiwan ng ningning na hindi nawawala.

Hindi ko mawari kung bakit siya lamang ang natatangi. Sa dinami-dami ng mukha, siya rin ang nag-iiwan ng alaala na ‘di ko makuha. Ang kanyang tinig ay tila hangin sa umaga, malamig ngunit may hatid na ginhawa. Kapag siya’y ngumiti, para bang liwanag ng tala na nagbibigay inspirasyong hindi madaling mawala. Kaya’t ako’y natutong magkubli. Tinatakpan ko ng palad ang pisnging nagbabaga upang ikubli ang damdamin, baka siya’y magtaka. Sapagkat ang lihim ko’y matagal ko nang iningatan, isang pag-ibig na mahigpit kong sinarhan.

Ngunit sa isang sulyap na iyon, kakaiba ang aking nadama— parang awit ng hangin na kay lambing sa pandama.
“Happy crush” lamang, sabi ng isip kong payapa, ngunit bakit sa puso’y tila tunay na ligaya?

Sa likod ng bawat ngiti ay may lihim na alaala, at sa bawat sulyap ay may himig na nagbibigay saya. Ngunit sa puso ko’y may pagkukubli, dahil ang damdamin ay sadyang inililihim. Pinipili kong panatilihing nakaukit ang pag-ibig na hindi ko mabigkas, isang lihim na damdaming walang wakas. Tahimik itong nananahan sa aking dibdib, naglalakbay sa bawat pintig, ngunit sa aking mga labi ay kailanman hindi mamumutawi.

Sapagkat may mga pag-ibig na ganoon:
hindi sinusulat sa pangalan,
hindi isinisigaw sa mundo,
at hindi isinasayaw sa liwanag ng araw.
Sa halip, ito’y nananatili sa lilim ng alaala,
sa buhay ng bawat buntong-hininga,
at sa mga gabing nakahimlay sa katahimikan.

𝘷𝘪𝘢 𝙈𝙖𝙧𝙞𝙖𝙣𝙣𝙚 𝙑𝙞𝙨𝙩𝙖 | 𝕬𝖓𝖌 𝕾𝖆𝖒𝖆𝖗𝖎𝖓𝖆𝖓
𝘥𝘪𝘣𝘶𝘩𝘰 𝘯𝘪 𝘾𝙯𝙖𝙧𝙞𝙣𝙖 𝘾𝙤𝙧𝙩𝙖𝙣 𝙖𝙩 𝙎𝙝𝙞𝙧𝙡𝙮 𝙎𝙞𝙡𝙫𝙚𝙨𝙩𝙧𝙚 | 𝕬𝖓𝖌 𝕾𝖆𝖒𝖆𝖗𝖎𝖓𝖆𝖓
𝘥𝘪𝘴𝘦𝘯𝘺𝘰 𝘯𝘪 𝙅𝙖𝙣𝙚𝙡𝙡𝙚 𝘽𝙚𝙧𝙣𝙖𝙧𝙙𝙤 | 𝕬𝖓𝖌 𝕾𝖆𝖒𝖆𝖗𝖎𝖓𝖆𝖓

14/09/2025

𝘗𝘈𝘕𝘐𝘛𝘐𝘒𝘈𝘕 | 𝘿𝙖𝙠𝙞𝙡𝙖𝙣𝙜 𝙃𝙖𝙡𝙞𝙜𝙞 𝙣𝙜 𝙏𝙖𝙝𝙖𝙣𝙖𝙣

Lola at Lolo, hatid ninyo’y saya,
Sa bawat payo’y ramdam ang ginhawa;
Kayo ang ilaw sa aming pamilya,
Pagmamahal ninyo’y tunay na dakila.

Hindi lamang kayo kuwento ng nakaraan,
Kundi tanglaw sa landas ng kasalukuyan;
Ang inyong pag-ibig ay walang hanggan,
Sa puso nami’y nagbibigay ng kabutihan.

Mga kamay ninyo’y bakas ng sakripisyo,
Patunay ng tibay at tapang sa mundo;
Sa bawat aruga’t halik na totoo,
Natutuhan nami’y magmahal nang buo.

Kahit tumanda at lumipas ang panahon,
Pagmamahal ninyo’y mananatiling baon;
Aral at gabay ay aming yayakapin,
Hanggang sa dulo kayo’y aalalahanin.

Kaya sa araw na ito’y aming pinararangalan,
Lolo at Lola, tunay na kayamanan;
Sa inyong gabay kami’y humugot ng kalakasan,
Biyaya ng Diyos, pag-ibig ninyo’y walang katapusan.

𝘷𝘪𝘢 𝘾𝙝𝙧𝙞𝙨𝙩𝙞𝙖𝙣 𝙈𝙚𝙙𝙞𝙣𝙖 | 𝕬𝖓𝖌 𝕾𝖆𝖒𝖆𝖗𝖎𝖓𝖆𝖓
𝘥𝘪𝘴𝘦𝘯𝘺𝘰 𝘯𝘪 𝙅𝙖𝙣𝙚𝙡𝙡𝙚 𝘽𝙚𝙧𝙣𝙖𝙧𝙙𝙤 | 𝕬𝖓𝖌 𝕾𝖆𝖒𝖆𝖗𝖎𝖓𝖆𝖓

14/09/2025

𝘓𝘈𝘛𝘏𝘈𝘓𝘈𝘐𝘕 | 𝙂𝙖𝙗𝙞𝙣𝙜 𝙐𝙠𝙞𝙩 𝙣𝙜 𝙏𝙞𝙠𝙖𝙨 𝙖𝙩 𝙆𝙖𝙧𝙞𝙠𝙞𝙩𝙖𝙣

Sa indayog ng makukulay na ilaw at pagbagsak ng unang himig ng musika, sumiklab ang gabi sa loob ng Samar National School. Ang entablado ay nagmistulang tahanan ng mga pangarap kung saan ang bawat galaw, ngiti, at titig ay nagpamalas sa mga munti ngunit makikinang na pangarap ng mga Samariñan sa isang tagpuang tatawaging — Binibini at Ginoong Siglakas 2025.

Mula sa aking kinatatayuan, tanaw ko ang makukulay na palamuti na wari’y nag-anyong bituin sa kisame ng kosmo ng liwanag. Rinig na rinig ang sigawan, halakhak, at sabayang palakpak ng mga estudyanteng sabik na masaksihan ang magaganap. Hindi lamang simpleng panonood ang dala ng bawat isa, kundi maging ang mga nagsisilakihang makukulay na banner at mga tinig na umaalingawngaw, na wari’y nagpapayanig sa buong court.

Isa-isang dumaan ang mga kandidato. Sa kanilang pagpasok, sumalubong ang nakakasilaw na liwanag at ang nakabibighaning kumpiyansa sa kanilang mga mata, taliwas sa monokromatikong itim at puting kasuotan ng paligsahan sa sportswear na hindi lamang nagpakita ng porma kundi nagpahayag din ng diwa ng sigla at kalusugan. Bawat hakbang at kumpas ay sinabayan ng sigawan ng kani-kanilang pamilya at kaklase, na tila ba bawat hiyaw ay nagsilbing gasolina sa kanilang enerhiya.

Kaba…
Pananabik…
At ‘di mapigilang damdamin ang nanaig nang isa-isang tinawag para sa puksaan ng talino at opinyon. Nabalot ng katahimikan ang entablado bago sila sumagot, at bawat salitang lumabas sa kanilang bibig ay tumama sa puso ng mga hurado at tagapakinig. Dito napatunayan na higit pa sa ganda at anyo, may paninindigan at prinsipyo ang bawat kandidato.

Dumating ang pinakahihintay na sandali ng lahat — ang awarding. Tahimik ngunit mabigat, tila ba bawat hininga ng tao ay sabay-sabay na pinipigil. Sa gitna ng katahimikan, ang tanging dinig ko ay ang dagundong ng puso ng bawat kandidato at kapwa ko manonood.

At nang tuluyang ianunsyo ang mga nagwagi, yumanig ang buong lugar sa hiyawan at palakpakan. Ang sigawan ay umalingawngaw na parang kulog, ang mga banner ay kumaway sa ere, at ang bawat ngiti ng nanalo ay tila liwanag na bumiyak sa dilim ng gabi. Lahat ng kaba ay napalitan ng sigla, at ang court ay nagmistulang dagat ng saya at pagdiriwang.

Sa pagtatapos ng gabi, naiwan sa akin ang isang aral— ang Binibini at Ginoong Siglakas 2025 ay hindi lamang lunduyan ng ganda at tikas. Isa itong patunay na ang kabataan ng Samar National School ay may pusong singtibay ng mga kawayang arnis, may talinong higit pa sa hari at reyna ng chess, at may tapang na handang tumanggap ng pagkatalo, makailang beses man silang madapa sa karera ng buhay.

At sa ilalim ng mga ilaw ng court, ramdam ko na ang tunay na korona ay hindi lamang nakapatong sa ulo ng mga nagwagi; matatagpuan din ito sa mga dampi ng mga kamay ng mga taong handang umalalay, kahit hindi man tayo ang bida sa entablado.

𝘷𝘪𝘢 𝙎𝙝𝙚𝙠𝙞𝙣𝙖𝙝 𝘾𝙖𝙨𝙩𝙞𝙣𝙤 | 𝕬𝖓𝖌 𝕾𝖆𝖒𝖆𝖗𝖎𝖓𝖆𝖓
𝘥𝘪𝘴𝘦𝘯𝘺𝘰 𝘯𝘪 𝙅𝙖𝙣𝙚𝙡𝙡𝙚 𝘽𝙚𝙧𝙣𝙖𝙧𝙙𝙤 | 𝕬𝖓𝖌 𝕾𝖆𝖒𝖆𝖗𝖎𝖓𝖆𝖓

13/09/2025

𝘉𝘈𝘚𝘈𝘏𝘐𝘕 | 𝙂. 𝙖𝙩 𝘽𝙗. 𝙎𝙞𝙜𝙡𝙖𝙠𝙖𝙨 2025, 𝙠𝙞𝙣𝙤𝙧𝙤𝙣𝙖𝙝𝙖𝙣 𝙣𝙖!

CATBALOGAN, SAMAR — Hiyawan at dumadagundong na palakpalakan ang narinig mula sa buong Samariñans sa mga kandidatong nagpagalingan sa entablado para sa titulong Ginoo at Binibining Siglakas 2025 kahapon ng ika-12 ng Setyembre, taong kasalukuyan, sa SNS Covered Court bilang bahagi ng pagdaraus ng Intramural Meet 2025.

Sa ginanap na kompetisyon, nakamit nina Jeff Jared Congzon ng Baitang 10 at Jillian Kaye Poblete ng Baitang 7 ang korona ng Ginoo at Binibining Siglakas 2025, habang nakamit naman nina Charlie Luis Scott at Stephi Dyan Tan, parehong nasa ika-10 baitang ang pwestong 1st Runner Up, napasakamay naman nina Eoghan Angelo Distel ng Baitang 9 at Aubrey Nicole Manuel ng Baitang 12 ang pwestong 2nd Runner Up.

Iginawad ang mga espesyal na parangal kina Charlie Luis Scott at Aubrey Nicole Manuel bilang Mr. at Ms. Congeniality, Mikael Antonie Quebec at Eloise Moslares bilang Mr. at Ms. Professionalism, Jeff Jared Congzon at Stephi Dyan Tan bilang Mr. at Ms. Most Popular at Best in Production Number.

Naging hurado sa kompetisyon sina Engr. Banjo Iso, Mr. Manaragat 2016; Bb. CJ Babon, Queen Manaragat 2025; at. Bb. Jonnah Mae Bacuetes, Miss Manaragat 2025.

Walang tulak-kabigin ang mga kandidata sa pagpapakitang-gilas sa entablado para sa titulong nais sungkitin. Sila ay hinusgahan sa krayteryang; 50% para sa sports wear at 50% naman para sa Q&A Portion.

Ang nasabing kompetisyon ay patunay na buhay na buhay pa rin ang diwa ng Intramural Meet!

𝗏𝗂𝖺 𝙀𝙙𝙞𝙨𝙤𝙣 𝘽𝙖𝙩𝙪𝙡𝙖 | 𝔄𝔫𝔤 𝔖𝔞𝔪𝔞𝔯𝔦𝔫𝔞𝔫

10/09/2025

06/09/2025

𝘛𝘪𝘯𝘪𝘨 𝘯𝘨 𝘒𝘢𝘣𝘢𝘵𝘢𝘢𝘯, 𝘏𝘢𝘵𝘪𝘥 𝘢𝘯𝘨 𝘒𝘢𝘳𝘶𝘯𝘶𝘯𝘨𝘢𝘯

𝙎𝙖𝙢𝙖𝙧𝙞𝙣𝙖𝙣𝙨, 𝙨𝙪𝙢𝙖𝙗𝙖𝙠 𝙨𝙖 𝟐𝟎𝟐𝟓 𝘾𝙖𝙢𝙥𝙪𝙨 𝙅𝙤𝙪𝙧𝙣𝙖𝙡𝙞𝙨𝙢 𝙎𝙚𝙢𝙞𝙣𝙖𝙧-𝙒𝙤𝙧𝙠𝙨𝙝𝙤𝙥

𝘊𝘈𝘛𝘉𝘈𝘓𝘖𝘎𝘈𝘕, 𝘚𝘈𝘔𝘈𝘙– Mahigit 300 mag aaral mula sa Pambansang Paaralan ng Samar ang lumahok sa School-Based Campus Journalism Seminar Workshop 2025 na may temang “Upholding the Thrust of Campus Journalism Promoting Accountability and Service in the Digital Age,” na ginanap sa SNS Social Hall mula Setyembre 3 hanggang 5.

Sa kaniyang panimulang pananalita, iniulat ni Gng. Myra Letaba, SSHT VI – English, na 184 ang lumahok sa Ingles na midyum at 140 naman sa Filipino.

“This is now the best training ground for you to learn, for you to hone, and for you to sharpen your potentials in writing,” ani Letaba sa kanyang pangunahing mensahe.

Nagbigay rin ng inspirasyonal na pananalita ang punongguro ng paaralan na si G. Rhum O. Bernate upang hamunin ang mga lumahok na gamitin ang pagsulat bilang sandata sa paglalahad ng katotohanan at makapagbibigay ng makabuluhang pagbabago.

Ayon kay Bernate, "every article you write and every story you share has the power to inspire and transfrom lives."

Bukod rito, tampok ang mga tagapagsalita sa iba’t ibang kategorya ng dyornalismo kabilang ang pagsulat ng editoryal, kolum, agham at teknolohiya, balita, lathalain, isports, paglalarawang tudling, pagkuha ng larawan, radio broadcasting, TV broadcasting, mobile journalism, collaborative desktop publishing, at online publishing.

Kinilala at pinarangalan naman ang mga estudyanteng nagwagi sa iba't-ibang patimpalak ng workshop sa ikatlong araw nito.

𝘷𝘪𝘢 𝙆𝙞𝙧𝙨𝙩𝙚𝙞𝙣 𝙋𝙤𝙗𝙡𝙚𝙩𝙚 | 𝔄𝔫𝔤 𝔖𝔞𝔪𝔞𝔯𝔦𝔫𝔞𝔫

05/09/2025

Matapos ang matagumpay na pagsasagawa ng 3-days Campus Journalism Seminar-Workshop na pumukaw sa mga pusong nag-aalab ang determinasyon sa larangan ng pamamahayag.

Halina't ating tuklasin ang naging kuwento, inspirasyon at karanasan ng mga mamamahayag ng The/Ang Samariñan sa 𝑱𝒐𝒖𝒓𝒏𝑻𝒂𝒏𝒐𝒏𝒈: 𝑪𝒉𝒊𝒌𝒂𝒉𝒂𝒏 𝒘𝒊𝒕𝒉 𝑻𝒉𝒆/𝑨𝒏𝒈 𝑺𝒂𝒎𝒂𝒓𝒊𝒏𝒂𝒏. 📰🚨

Sama-sama nating tuklasin ang mundo ng pamamahayag! 🖋️

via 𝙈𝙞𝙘𝙝𝙖𝙚𝙡 𝘽𝙖𝙗𝙤𝙣 | 𝕬𝖓𝖌 𝕾𝖆𝖒𝖆𝖗𝖎𝖓𝖆𝖓
Disenyo ni: 𝙅𝙖𝙣𝙚𝙡𝙡𝙚 𝘽𝙚𝙧𝙣𝙖𝙧𝙙𝙤 | 𝕬𝖓𝖌 𝕾𝖆𝖒𝖆𝖗𝖎𝖓𝖆𝖓

05/09/2025

𝘚𝘢𝘮𝘢𝘳𝘪𝘯𝘢𝘯𝘴, hindi pa rito nagtatapos bagkus nagsisimula pa lamang ang paghubog sa matitibay na tinig ng kabataang mamamahayag.

Mula sa papel at panulat ng seminar-workshop, tungo sa masalimuot ngunit makabuluhang mundo ng tunay na pamamahayag — handa na kaming tumindig, magsalita, at ipaglaban ang katotohanan.

Paikot na ang huling pahina ng 𝕻𝖊𝖓 𝕻𝖔𝖜𝖊𝖗 𝟐𝟎𝟐𝟓, ✍ ngunit ang tinta ng aming determinasyon ay patuloy na dadaloy — hindi mapapawi, hindi matutuyo.

𝘼𝙣𝙙𝙖𝙢 𝙣𝙖 𝙠𝙖𝙢𝙞 𝙗𝙪𝙢𝙪𝙜𝙨𝙖𝙮, 𝙥𝙖𝙧𝙖 𝙝𝙖 𝙎𝙖𝙢𝙖𝙧 𝙃𝙞𝙜𝙝! 🖋️

𝘷𝘪𝘢 𝙈𝙞𝙘𝙝𝙖𝙚𝙡 𝘽𝙖𝙗𝙤𝙣 | 𝕬𝖓𝖌 𝕾𝖆𝖒𝖆𝖗𝖎𝖓𝖆𝖓

02/09/2025

𝙃𝙖𝙣𝙙𝙖 𝙣𝙖 𝙗𝙖 𝙠𝙖𝙮𝙤? ✨

Sa pagbubukas ng taunang Campus Journalism Seminar-Workshop, narito ang ilang mahahalagang bagay na maaari ninyong dalhin para sa tatlong-araw na paglalakbay sa makulay na mundo ng pamamahayag.

Mag kita-kita tayo bukas sa SNS Social Hall, Samariñan! ✍️