05/07/2025
Press conference bag-o ang ika-86 nga commencement exercises, gipahigayon sa UP Cebu
Sa pagsaulog sa ika- otsintay sais nga Commencement Exercises sa University of the Philippines Cebu (UP Cebu), usa ka press conference ang gipahigayon uban sa mga halangdong bisita ug opisyal sa UP System.
Naglakip sa press conference si Alfonso Tomas “Atom” Araullo, ang commencement speaker, si Atty. Leo Malagar, ang UP Cebu Chancellor, si Atty. Angelo Jimenez, ang UP System President, ug si Dr. Leo Cubillan, ang UP Vice President for Academic Affairs kuyog ang dekano sa College of Science.
“For too long, UP education was imagined as distant, a plane ticket too expensive. But here in UP Cebu, we are proving that premiere education does not have to be far from the islands,” saad ni Malagar.
Gipahayag ni Chancellor Malagar ang tinguha sa UP Cebu nga madala ang edukasyon ug serbisyo ngadto sa mga komunidad. Matod pa niya, ang paglunsad sa unang graduate program sa Artificial Intelligence (AI) sa Visayas, kauban ang College of Engineering sa UP Diliman ug ang pag-abli sa Bachelor of Science in Accountancy ug Master of Arts in Communication, usa sa mga paagi sa pagtubag sa lokal nga mga panginahanglan.
Sa mga niaging semana, gianunsyo sa unibersidad pamaagi sa ilang page ang pag-abli niining mga bag-ong programa nga makahatag og mas daghang oportunidad para sa mga Pilipino na maka-eskwela sa UP.
Gisugdan sa usa ka representante sa SunStar ang pangutana para kay Araullo bahin sa responsibilidad sa usa ka mamamahayag sa pag-impluwensya sa komunidad. Gipadayag ni Araullo na labaw sa tanan, kinahanglan ang matinud-anong pakig-alayon sa katawhan. Pinaagi niini, mahimong makabilin ang mga tao og positibong epekto sa katilingban.
“I always tell young journalists to be bolder. Believe that they have a voice; and their voice is, in a way, even more influential than people working in mainstream media,” ingon ni Araullo. Iyahang gipabug-atan na bisan pa sa kausaban sa plataporma, ang papel sa mga mamamahayag kay nagpabilin nga pareho.
Matod ni Araullo, ang kabatan-onan adunay higayon nga maka-impluwensiya sa mga karaang mamahayag.
Alang sa pag-uswag ug misyon sa UP, giisabat sab ni Malagar ang pangutana sa representante sa Cebu Catholic Television Network kon CCTN kabahin sa pagpalapad sa presensya sa UP sa Bantayan Island. Matod ni Malagar, aduna na'y Memorandum of Agreement kon MOA nga napirmahan sa Bantayan, ug kasamtangang gihulat ang pag-apruba sa Deed of Donation sa UP Board of Regents aron masugdan ang plano para sa pundo, programa, ug imprastruktura.
Gipangutana sa usa ka representante sa GMA Super Radyo Cebu kung aduna bay balita o kauswagan sa isyu sa yuta sa South Road Properties kon SRP. Giklaro ni Malagar nga bisan pa man nga ang SRP anaa na sa pagdumala sa bag-ong administrasyon, ang lote sa UP didto dili apil niini. “Wala pamay nag file og case. But we are ready to defend if ever,” dugang niya.
Ang press conference kay nagsilbing plataporma sa media aron madungog ang mga panan-aw ug makapangutana sa mga opisyal sa unibersidad nga nitambong alang sa commencement exercises sa UP Cebu. Naghisgot kini dili lamang sa ilang mga programa ug plano alang sa unibersidad, apan sa mas lapad nga tahas sa edukasyon ug mamamahayag sa pag-alagad sa masa.
----
Report ni Athena Quidlat
Kuha ni Mike Navales
