06/01/2025
2 PATAY, 3 ANGOL HUMAN NAKURYENTIHAN SA LUNGSOD SA MABINAY
Duha ang patay samtang 3 ang naangol human nakuryentihan alas 5:30 kaganihang hapon, Lunes, Enero 6 sa Brgy. Poblacion, Lungsod sa Mabinay, Lalawigan sa Negros Oriental.
Giila ang mga namatay nga sila si Kagawad Elnie Endencio sa Barangay Arebasore ug ang operator sa Lift truck nga si Jonel Tenebroso, 31, residente sa Brgy. Mayapose, Mabinay. Samtang mga naangol giila nga sila si Jay-ar Norbe, 33-anyos, kagawad sa nasangpit nga barangay; Realyn Billares, 19, SK Chairwoman sa Brgy. Banban, Mabinay ug Kimjun Padasay, 30, Brgy. Secretary sa Brgy. Arebasore.
Sa inisyal nga imbestigasyon nasayran nga gi-disassemble sa mga biktima ang ilang Christmas Tree Entry ug gitangtang ang mga Christmas lights gamit ang man lift truck.
Hiingong ang boom sa man lift truck naigo sa livewire hinungdan nga nakuryentihan ang mga biktima.
Ang maong Christmas Tree maoy entry sa Brgy. Arebasore, atol sa bag-o lang natapos nga Lingganay Festival ug usa sa highlight mao ang Christmas tree making contest sa matag Barangay sa Munisipyo sa Mabinay.
Atol sa insidente mao kadto ang higayon nga ihatod na unta nila pagbalik ang ilang Christmas tree sa ilang dapit apan subo nga nahitabo ang aksidente.
Ang tulo ka mga biktima nga anaa na sa stable nga kahimtang padayon nga gitambalan sa Mabinay Medicare Hospital. Ang mga namatay nga biktima gideklarar sa nag-atiman nga doktor nga si Dr. Ernest T. Uy.
Kini nga balita hatod kanato sa:
Bhoy Pilongo l January 6, 2025
-via l Mabinay PNP
Screen grab from Marc Stephen Abueva's video