12/02/2025
Pahiyom, katawa ug kalipay mao'y gihambing sa kasing-kasing,
Mga pangandoy nga sa hataas nga panahon sa handurawan naglimin,
Sa mga higayon nga mga tinulo sa uwan ug kainit sa adlaw mao ra'y kasumbungan,
Pag-antos ug kasakitan sa dakong pag-ampo gipukan,
Katuigan ang milabay ug ang gamay'ng paghanduraw kalit nga misilak,
Napun-an sa hapuhap ang kasing-kasing nga naghilak,
Ingon sa dili kapugngan ang mga luha sa pagdahili,
Ang kaluoy ug gugma sa Diyos wala man nag dumili,
Gipanday ang mga pangandoy ilaw'm sa dakong gugma,
Gibuylogan sa mga kinabuhi'ng puno sa kalipay ug katawa,
Hangtod ang mga inadlaw nanglabay sa wala lang dahoma,
Ug ang simpleng gihanduraw gibisbisan sa yamog sa pangaliya,
Mga awit ug pagpasalamat mao'y nabati sa duha ka dughan,
Mapinaubosong kasinghkasing sa mga kaguol ug kabalaka gilangkatan,
Ug ang mga pulong nga gipugas padayon'g giamuma,
Hangtod ang pagsubang sa adlaw midan-ag kanila,
Susama sa pagsilak sa adlaw, kini usab 'dunay paglunod,
Ang maong kalipay gilumsan sa mga balod,
Kinabuhing naghatag ug kahayag kalit nga napalong,
Angay ba ang tanan sa kalimot ilubong?
Kini ang usa ka pangutana sa kapikas nga mahabiling mag inusara,
Wala'y ikasarang kun' dili ang pagbakho ug pag salod sa mga luha,
Kadtong paghanduraw nga natuman apan sa kalit gipulihan sa kamingaw,
Ang mga damguhanon sa mga kasakit gipukaw,
Ang imong larawan giukit niining dughan,
Bisan ang katuigan mulabay dili ka hikalimtan,
Padayon kang panggaon sa matag higayon,
Tatay Emilio "Milyo" amoa kang handumon.
|| Rest in Peace Tatay Emiliođ„ș
"He will wipe every tear from their eyes. There will be no more death or mourning or crying or pain, for the old order of things has passed away."
- Revelation 21:4 -
