18/09/2025
Yellow Alert Status nga ginpagwa sang NGCP sang nagligad nga bulan, magapataas sang kuryente sa subong nga Septyembre
Iloilo City - Ginapahibalo ang mga konsumidor sang MORE Power sa ginapaabot nga pagsaka sang presyo sang kuryente sa subong nga bulan matapos ang Yellow Alert Status sang National Grid Corporation of the Philippines (NGCP) sang nagligad nga Agusto.
Madumduman nga naglab-ot sa apat ka mga yellow alert status sa Visayas Grid ang napagwa sang NGCP sa sulod sang August 1-6.
Rason nga ang pagsaka sang presyo sang kuryente ang mabatyagan sa bug-os nga Visayas kag indi lamang sa syudad sang Iloilo.
Ginpaathag ni Mr. Niel Parcon, Vice President for Corporate Energy Sourcing and Regulatory Affairs sang MORE Power nga nagpagwa sang yellow alert status ang NGCP kun magnubo ang supply margin kun ikumparar sa pinakadaku nga generating unit sa grid. Buot silingon sini, naganipis ang supply sa grid ikumpara sa demand sang kuryente.
“Unfortunately last month starting August 1 nagsaka amg presyo sang aton nga kuryente which is the result sang pagkulang sang supply sang aton sa market sa bilog nga Pilipinas. Actually indi lang ni sa Visayas, indi lang ni sa bilog nga Iloilo City, bilog ini nga Pilipinas, unfortunately ang hard hit ang Visayas and kapin pa sa Panay kay ara kita sa tail end sang transmission line network sang NGCP,” pahayag ni Parcon.
Nahibaluan nga ginakuha pa sa Luzon, Negros kag Mindanao ang iban nga kuryente nga gina-supply sa Panay island.
Madumduman nga sang Agosto 5, na-record ang manipis nga supply sang kuryente kun ikumparar sa demand. Yara sa 2,528 megawatts ang kuryente nga gina-supply sa mga konsumidor samtang yara sa 2,475 megawatts ang konsumo kun sa diin yara lang sa 53 megawatts ang margin nga makabig kritikal na.
Nagpagwa man ang Department of Energy sang kumpirmasyon nga may yara sang 14 ka mga generation facilities, kabahin na ang mga coal plants, ang nag-offline.
“Ginahambal ta nga tungod sina, nagsaka ang presyo sang kuryente kay ti syempre nagkulang na. Suppliers market ang tanan nga naga bid sa aton nga merkado nagapataas-taas na presyo kay ti bal an nila kulang. So typical, amu na sa law of supply and demand scenario, very different na sya sa previous months nga tama man kadako sang aton nga supply,” paathag pa ni Parcon.
Gindugang ni Parcon nga ang MORE Power isa ka distribution utility nga nagabakal sang kuryente agud may i-supply sa mga konsumidor.
Ginalantaw sang natungdan nga isa sa mga solusyon nga agud mahitso ang problema sa supply sang kuryente amu ang pagtukod sang dugang nga mga generation plants agud mangin bastante ang supply sini.
Ginpaathag man sini nga sa bahin sang MORE Power nga may mga ginahimu ini sila nga tikang agud mapabilin nga pinabarato sa gihapon sa bug-os nga Panay ang presyo sang kuryente sini.
Ginpasiguro man niya nga ginabantayan nila ang presyuhanay sang kuryente para sa masunod nga billing cycle kun sa diin nakita nga naga-amat-amat na balik sa normal nga presyuhanay sa kuryente.
