Kawit Daily

28/05/2025

28 MAY, 2025 — Isang abalang araw ang hinarap ni Mayor-elect Armie Aguinaldo matapos siyang bumisita sa ilang tahanan ng mga Kawiteño at personal na nag-inspeksyon sa Kawit RHU.

28 May, 2025 — Muling bumisita si Mayor-elect Armie Aguinaldo sa Kawit Rural Health Unit (RHU) ngayong araw upang personal na masaksihan…

28/05/2025

NEWS UPDATE: Inumpisahan na ng gobyerno ng Timor-Leste ang proseso ng deportation laban sa dating kongresista na si Arnolfo Teves Jr., matapos itong maaresto kanina sa Dili, capital ng Timor-Leste.

Ayon sa mga opisyal ng Timor-Leste, si Teves ay nahuli na walang bisa ang visa at may kanselado nang pasaporte. Inilarawan ng tagapagsalita ng gobyerno ang kanyang pananatili sa bansa bilang “isang seryoso at hindi katanggap-tanggap na sitwasyon.”

Matatandaang humiling si Teves ng asylum o political refuge sa Timor-Leste, ngunit ito ay opisyal nang tinanggihan ng nasabing bansa. Kasalukuyan siyang nasa kustodiya ng mga awtoridad sa Timor-Leste habang inaasikaso ang deportation.

Sa Pilipinas, si Teves ay nahaharap sa ilang kasong kriminal, kabilang ang pagkakadawit sa pagpatay kay Negros Oriental Governor Roel Degamo at iba pang insidente ng karahasan.

28/05/2025

MAYOR-ELECT ARMIE AGUINALDO, NAGPAABOT NG TULONG SA MGA NAULILANG PAMILYA SA IBA'T IBANG PANIG NG KAWIT

TINGNAN: Isinagawa ni Mayor-elect Armie Aguinaldo ang isang pag-iikot sa iba't ibang bahagi ng bayan noong Mayo 27, kasama ang ilang miyembro ng Team Puso at Malasakit. Sa naturang aktibidad, nag-abot ng pinansyal na tulong ang grupo sa mga pamilyang kamakailan lamang ay nawalan ng mahal sa buhay.

Ayon sa ulat, bahagi ito ng umiiral na burial assistance program ng lokal na pamahalaan na tumutulong sa mga pamilya sa pamamagitan ng pagbabayad ng bahagi o kabuuan ng gastusin sa punerarya. Depende sa pangangailangan o estado sa buhay ng naulilang pamilya, maaaring sagutin ng opisina ang hanggang 80% o 100% ng kabuuang halaga.

Ang naturang inisyatibo ay regular na isinasagawa ng lokal na pamahalaan upang tugunan ang agarang pangangailangang pinansyal ng mga residente, lalo na sa panahon ng pagdadalamhati.

Samantala, ang pag-iikot ni Mayor-elect Aguinaldo sa iba't ibang panig ng Kawit ay kanya nang nakagawian mula nang manungkulan siya bilang konsehal noong 2022. Ipinagpapatuloy niya ito sa kanyang bagong tungkulin bilang kauna-unahang babaeng alkalde ng bayan ng Kawit, matapos magwagi sa katatapos na halalan.

Photos: Noree Aguilar | Facebook

26/05/2025

BARANGAY WAKAS 2, NAGPAALALA SA PUBLIKO SA KAHALAGAHAN NG KALINISAN; PUMANGATLO SA 23 BARANGAY NG KAWIT SA KALINISAN VALIDATION SA UNANG QUARTER NG TAON

Nagpaabot ng paalala ang pamunuan ng Barangay Wakas 2 sa pangunguna ni Punong Barangay Gary Solania hinggil sa kahalagahan ng pagpapanatili ng kalinisan sa komunidad. Sa kanilang opisyal na Facebook post, binigyang-diin ng barangay na ang paglilinis ng kapaligiran ay hindi lamang responsibilidad ng mga opisyal, kundi ng buong pamayanan.

Iginiit nito na ayon sa nakasaad sa Local Government Code of 1991 (R.A. 7160) at DILG Memorandum Circular 2019-09, ang pagpapanatili ng kalinisan ay kolektibong tungkulin ng bawat isa—mula sa mga pamilya at residente, hanggang sa iba’t ibang sektor ng barangay. Bahagi ng obligasyon ng mamamayan ang pagtiyak na malinis ang paligid ng kanilang mga tahanan.

Bagaman inaasahang pangunahan ng mga opisyal ng barangay ang mga clean-up drive at kampanya para sa kalinisan, hindi ito magiging ganap na matagumpay kung wala ang aktibong pakikilahok ng mga residente.

Bilang patunay ng epektibong ugnayan ng barangay sa mamamayan, ikinararangal ng Barangay Wakas 2 ang kanilang pagkakapuwesto bilang ikatlong pinakamalinis na barangay sa isinagawang Kalinisan Validation para sa unang quarter ng 2025 sa buong bayan ng Kawit.

Photos: Barangay Wakas 2 | Facebook

26/05/2025

BARANGAY KAPITAN, 2 KAGAWAD PATAY SA PAMAMARIL SA SALITRAN 3, DASMARIÑAS CITY, SK SECRETARY, KRITIKAL. SUSPEK NA DATING TANOD, NAGBARIL SA SARILI, PATAY

Patay ang barangay chairman at dalawang konsehal habang nasa kritikal na kondisyon ang Sangguniang Kabataan (SK) secretary matapos pagbabarilin ng isang dating barangay kagawad sa gitna ng flag ceremony sa Barangay Salitran, Dasmariñas City, Cavite nitong Lunes, Mayo 26.

Kinilala ng pulisya ang mga nasawi na sina Raul Atarde Ballos, 56, barangay chairman; Jose Lagones, 65, konsehal; at Marvin Cañete, 54, konsehal. Samantalang ginagamot at nasa kritikal na kalagayan sa ospital ang SK secretary na si Christine Joseph Bonus.

Ayon kay Police Lt. Colonel Regino Oñate, officer-in-charge ng Dasmariñas City Police, lumapit ang suspek na si “Ariel,” 50-anyos, isang dating barangay tanod, sa likuran ni Chairman Ballos at binaril ito. Pagkatapos ay pinaputukan rin niya sina Lagones at Cañete, bago nito pinutukan ang sarili.

Agad na isinugod sa ospital ang mga biktima at ang suspek, ngunit idineklarang dead on arrival ang apat maliban kay Bonus.

Inutos ni Regional Director PBGen. Paul Kenneth Lucas ang masusing imbestigasyon sa insidente upang matukoy ang motibo at mapanagot ang may sala.

Ito na ang pangalawang malalang insidente ng pamamaril sa lalawigan sa loob lamang ng dalawang araw.

Una na rito noong Sabado, kung saan isang 48-gulang na tagasuporta ng alkalde ng Naic, Cavite ang pinatay sa harap ng kanyang bahay, at ito umano ay may kaugnayan sa banta dahil sa nakaraang eleksyon.

26/05/2025

RIVERWALL NG BARANGAY PANAMITAN, PATULOY ANG KONSTRUKSYON

TINGNAN: Patuloy ang konstruksyon ng riverwall sa Barangay Panamitan, Kawit bilang bahagi ng proyekto ng tanggapan ng Unang Distrito ng Cavite katuwang ang Pamahalaang Bayan ng Kawit, na layong maibsan ang pagbaha sa nasabing lugar.

Sa Facebook post ni Punong Barangay Gilbert Reyes, ipinaabot nito ang pasasalamat kina Congressman Jolo Revilla, Mayor-elect Armie Aguinaldo, at Vice Mayor-elect Angelo G. Aguinaldo sa kanilang pagtutulungan upang maisakatuparan ang flood control project sa kanilang barangay.

Patuloy naman ang mga proyektong pang-imprastraktura sa iba’t ibang bahagi ng Kawit mula nang maupo si Congressman Jolo Revilla noong 2022, katuwang si outgoing Mayor Angelo Aguinaldo na itinuturing na matatag nitong kaalyado.

Photo: Brgy. Captain Gilbert Reyes | Facebook

25/05/2025

TANSONG PLAKE NG WORLD WAR II MONUMENT SA ALABANG, NINAKAW; MGA SUSPEK ARESTADO, MAY-ARI NG JUNKSHOP KUNG SAAN IBINENTA ANG PLAKE, KASAMA SA KAKASUHAN

Arestado ang mga suspek na sangkot sa pagnanakaw ng mga tansong plake mula sa isang World War II monumento sa Alabang, Muntinlupa City — mga plakeng nagbibigay-pugay sa mga gerilyang lumaban noong digmaan.

Ayon kay Muntinlupa Mayor Ruffy Biazon, nahuli ang mga suspek sa tulong ng PNP at mga opisyal ng barangay. Dinala ang mga ito sa Alabang PNP para sa imbestigasyon, kung saan inamin nilang naibenta na nila ang mga plake sa isang junk shop.

Kakasuhan ang mga suspek ng pagnanakaw, habang nahaharap din sa kasong paglabag sa Anti-Fencing Law ang may-ari ng junk shop dahil sa pagtanggap ng mga nakaw na kagamitan.

Photos: Mayor Ruffy Biazon of Muntinlupa

25/05/2025

TINGNAN: Bumida ang mga kabataan ng Barangay Kaingen kaninang hapon, Mayo 25, sa kanilang taunang sagala o Flores de Mayo.

Sa kabila ng init at mahabang paglalakad, masiglang ipinarada ng mga bata ang kanilang makukulay at tradisyonal na kasuotan, bilang pakikilahok sa mayamang kultura ng bayan, at malalim na pananampalataya kay Birheng Maria.

Photo source: Barangay Kaingen

25/05/2025

TRABAHO LANG, WALANG PERSONALAN

TINGNAN: Umani ng iba't ibang reaksyon mula sa netizens ang pagpapatupad ng curfew sa Barangay Aplaya kamakailan.

Ayon sa isang Facebook post ni Barangay Kagawad Rigor Villanueva, kasalukuyang miyembro ng sangguniang barangay, tila may ilang magulang ang nagpahayag ng pagkadismaya matapos sitahin ng mga tanod ang kanilang mga anak na lumabag sa itinakdang oras ng curfew. Sa kanyang pahayag, iginiit ng opisyal na ang layunin ng curfew ay upang maprotektahan ang mga kabataan sa posibleng panganib, lalo na sa disoras ng gabi.

"Magalit na lang kayo, basta kami ginagawa namin ang lahat upang maprotektahan ang inyong mga anak," aniya. Binanggit din niya na walang kinikilingan ang pamunuan ng barangay at mahigpit nilang ipinatutupad ang ordinansa. “Kung hindi niyo kayang disiplinahin ang inyong mga anak, kami sa barangay ang kikilos,” dagdag pa niya.

Ayon naman sa komento ng Punong Barangay ng Aplaya na si Romel Valenton, kasama sa isinumpaan nilang tungkulin ang mandato sa pagprotekta sa kanilang mga nasasakupan. Hinikayat din niya ang mga nagrereklamo na personal na dumulog sa barangay upang maipaliwanag nang maayos ang mga patakaran at masagot ang kanilang mga katanungan.

Ang curfew ay umiiral sa karamihan ng mga lugar sa Pilipinas mula alas-10 ng gabi bilang bahagi ng mga lokal na ordinansa para sa kaayusan at kaligtasan ng publiko, lalo na ng mga kabataan.

25/05/2025

CANAL CLEAN-UP BILANG PAGHAHANDA SA NALALAPIT NA TAG-ULAN, ISINAGAWA NG PAMUNUAN NG BARANGAY APLAYA

TINGNAN: Sinimulan na ng pamunuan ng Barangay Aplaya, sa pangunguna ni Punong Barangay Romel Valenton, ang malawakang paglilinis ng mga pangunahing kanal sa kanilang lugar bilang paghahanda sa nalalapit na panahon ng tag-ulan.

Sa mga larawang kuha, makikita ang pakikibahagi ng mga kawani ng barangay at mga volunteers sa pagsasaayos ng mga drainage at kanal upang maiwasan ang pagbaha na madalas nararanasan ng mga residente ng Aplaya tuwing umuulan. Ilang araw na ring tuloy-tuloy ang kanilang clearing operations sa mga kritikal na daluyan ng tubig upang matiyak ang maayos na daloy at kalinisan sa komunidad.

Photos: Barangay Aplaya

25/05/2025

JUST IN: Nakalapag na ang eroplanong sinasakyan ni Pangulong Ferdinand "Bongbong" Marcos Jr. sa Kuala Lumpur dakong alas-5:41 ng hapon ngayong araw.

Inaasahang dadalo ang Pangulo sa 46th ASEAN Summit, kung saan tatalakayin ang mahahalagang isyu, kabilang na ang tensyon sa West Philippine Sea at ang mga bagong ipinatupad na taripa ng Estados Unidos kamakailan.