24/03/2026
Davao Light nanawagan sa NORDECO nga hunongon ang sayop nga impormasyon ug mosunod sa balaod
Giawhag sa Davao Light ang Northern Davao Electric Cooperative (NORDECO) nga hunongon na ang pagpakaylap og "misleading" o sayop nga impormasyon ug magsugod na sa pagtinabangay alang sa transition sumala sa gimando sa RA 12144.
Sa usa ka advisory niadtong Marso 6, 2026, giingon sa NORDECO nga padayon gihapon sila nga mangolekta og bayad sa kuryente sa Island Garden City of Samal (IGACOS), dungan sa pag-ingon nga sila gihapon ang "legitimo nga distribution utility" sa isla. Matud pa sa kooperatiba, ang ilang prangkisa sa Samal balido hangtod sa 2033 ug kinahanglan kining "mabuhi dungan" (co-exist) sa Davao Light.
Isip tubag, giklaro sa Davao Light nga sila na ang legal nga gitahasan isip bugtong (sole) power distributor sa IGACOS. Kini gipalig-on pinaagi sa:
Republic Act 12144, nga nagpalapad sa ilang franchise area.
Unanimous Supreme Court Decision nga nagpamatuod nga konstitusyonal ug balido ang RA 12144.
Writ of Possession nga giisyu sa Regional Trial Court (RTC) alang sa tanang electric distribution assets sa IGACOS.
Provisional Certificate of Public Convenience and Necessity (CPCN) gikan sa Energy Regulatory Commission (ERC) nga nagtugot sa Davao Light nga moserbisyo na sa Davao del Norte (lakip ang IGACOS) ug Davao de Oro.
Exclusive Power Supply Agreement uban sa Phil-Power Ventures sugod niadtong Pebrero 25. Ang tanang kuryente gikan sa Phil-Power kontratado na sa Davao Light para ipang-apud-apod sa mga residente ug negosyo sa isla.
Angay hinumduman nga walay giingon ang Supreme Court bahin sa "parallel franchise" o "co-existence." Sa tinuod lang, ang RA 12144 nagmando sa Davao Light ug NORDECO nga adunay transition period nga dili molapas sa duha ka tuig. Sumala sa mga report, kapila na nagsulat ang Davao Light sa NORDECO aron sugdan ang transition team, apan wala kini panumbalinga sa kooperatiba.
"Nanawagan kami sa kadumalahan ug board sa NORDECO nga hunongon na ang pagpakaylap og sayop nga impormasyon. Alang sa interes sa serbisyo publiko ug kaayohan sa katawhan, sunda ug dawata ang gikinahanglan, malinawon, ug mapuslanon nga transition nga gimando sa RA 12144," matud pa sa Davao Light.
Giawhag usab sa Davao Light ang NORDECO nga "respetuhon ang desisyon sa Supreme Court ug ang mga mando sa RTC ug ERC."
"Giawhag namo ang tanang residente nga mosunod sa mga opisyal nga pahibalo gikan sa Davao Light samtang nakig-alayon kami sa mga awtoridad aron masiguro ang lig-on ug hapsay nga pagbalhin sa serbisyo para sa kaayohan sa komunidad," dugang pa sa Davao Light.
