18/09/2025
𝗦𝗘𝗣𝗧𝗘𝗠𝗕𝗥𝗘 𝟭𝟴, 𝟮𝟬𝟮𝟱 - 𝗛𝗨𝗪𝗘𝗕𝗘𝗦
Ika-Kawhaa'g Upat nga Semana Sulod sa Tuig
ANG PAGBASA GIKAN SA EBANGHELYO SUMALA NI SAN LUCAS (Lk. 7: 36-50)
Unya may usa ka Pariseo nga midapit kang Jesus sa pagpangaon. Busa miadto si Jesus sa balay sa Pariseo ug nakigsalo kaniya. Niadtong lungsora may usa ka babaye nga dautag kinabuhi. Sa iyang pagkadungog nga si Jesus nagkaon didto sa balay sa Pariseo, miadto siya dala ang usa ka tibod nga alabastro nga puno sa pahumot. Samtang diha siya sa luyo ni Jesus dapit sa tiilan, mihilak siya ug nahumod sa iyang mga luha ang mga tiil ni Jesus. Unya gipahiran niya sa iyang buhok ang mga tiil ni Jesus, ug gihagkan ug gibuboan sa pahumot. Sa pagkakita niini sa Pariseo nga nagdapit kang Jesus, miingon siya sa iyang kaugalingon, “Kon kining tawhana tinuod pa nga propeta, makaila unta siya kon kinsa kining babaye nga mihikap kaniya, ug unsa ka daotan ang iyang kinabuhi!”
Apan miingon si Jesus kaniya, “Simon, aduna akoy isulti kanimo.”
Si Simon mitubag, “Sige Magtutudlo, sultihi ako.”
“May duha ka tawo nga nakautang sa usa ka tigpahulam og kuwarta,” miingon si Jesus. “Ang usa nakautang og kinyentos ka denario ug ang usa singkwenta. Apan kay silang duha dili man makabayad, gipapas na lamang ang ilang utang. Karon, kinsa man sa duha ang labaw nga mahigugma sa nagpahulam kanila?”
“Sa akong hunahuna,” mitubag si Simon, “kadtong dakog utang.”
“Husto ang imong tubag,” matod ni Jesus. Unya milingi siya sa babaye ug miingon kang Simon, “Nakita mo ba kining babaye? Mianhi ako sa inyo, ug wala mo ako hatagig tubig aron ihugas sa akong mga tiil, apan gihugasan niya ang akong mga tiil sa iyang mga luha ug gipahiran sa iyang buhok. Wala mo ako hagki sa imong pagdawat kanako, apan nagpunay siyag halok sa akong mga tiil sukad sa akong pag-abot. Wala mo hisuig lana ang akong ulo, apan iyang giagwahan ang akong mga tiil. Busa sultihan ko ikaw nga ang dakong gugma nga iyang gipakita nagmatuod nga gipasaylo na ang daghan niyang mga sala. Kinsa kadtong gipasaylo sa diyotayng mga sala nagpakita og diyotay lamang nga paghigugma.”
Unya giingnan ni Jesus ang babaye, “Gipasaylo na ang imong mga sala.”
Ug ang uban nga didto sa kan-anan miingon sa ilang kaugalingon, “Kinsa ba kining tawhana nga nagpasaylog mga sala?”
Apan miingon si Jesus sa babaye, “Ang imong pagtuo nagluwas kanimo; pauli nga malinawon.”
ANG EBANGHELYO SA GINOO.
DAYGON IKAW, O CRISTO.
Mass Presider: Rev. Fr. Romeo M. Beroy, MSC
Nuestra Señora De Regla Parish National Shrine
Barangay Poblacion,Lapu-Lapu City (Opon), Cebu
( This content is for Gospel & Homily Purposes Only )
Please Subscribe,Like & Share: Lapu-Lapu City TV News #1
https://mactan.iradioph.com
