27/03/2026
PAG-SUSPINDE SA SALARY DEDUCTION TULAD NG SSS, PAG-IBIG, PHILHEALTH AT IBA PA, PINANAWAGAN
Nanawagan si Senator Imee Marcos ng pansamantalang tigil-singil sa mga pangunahing ahensya ng gobyerno tulad ng Social Security System (SSS), Government Service Insurance System (GSIS), Pag-IBIG Fund, at PhilHealth sa gitna ng umiiral na krisis sa enerhiya sa bansa.
Ayon sa senadora, matinding epekto na ang nararamdaman ng mga Pilipino dahil sa patuloy na pagtaas ng presyo ng langis, na nagdudulot ng domino effect sa pamasahe, pagkain, at iba pang pangunahing bilihin. Lubhang apektado rito ang mga manggagawa, magsasaka, mangingisda, at maliliit na negosyante.
Iminungkahi ni Marcos ang pagpapatupad ng loan moratorium o pansamantalang pagpapaliban ng pagbabayad upang kahit papaano ay mabawasan ang pinansyal na pasanin ng mamamayan. Aniya, nararapat lamang na bigyan ng palugit ang mga Pilipino sa gitna ng patuloy na pagtaas ng gastusin.
Dagdag pa niya, makatutulong din kung pansamantalang ihihinto ang mga kaltas sa sahod upang mas maramdaman ng mga manggagawa ang kanilang buong kita at makasabay sa tumataas na presyo ng mga bilihin.
Binigyang-diin din ng senadora na hindi na bago ang ganitong hakbang, dahil naipatupad na rin ito noong panahon ng pandemya at sa mga nakaraang kalamidad bilang tulong sa mga apektadong sektor.
Sa ngayon, hinihintay pa ang tugon ng mga nasabing ahensya sa panawagan, habang patuloy namang minomonitor ng pamahalaan ang sitwasyon at inaasahang maglalabas pa ng mga karagdagang hakbang upang maibsan ang epekto ng krisis sa enerhiya sa bansa.
