Opinyon Bicol

08/09/2026

TOTOO PALA TALAGA ANG PRIVILEGE SPEECH NI CONG. PIDO GARBIN TUNGKOL SA JUETENG SA ALBAY NOONG PEBRERO

Noong Pebrero pa lamang, ibinunyag na ni Ako Bicol Rep. Alfredo “Pido” Garbin Jr. sa kanyang privilege speech ang umano’y operasyon ng jueteng sa Albay. Ngayon, lumalabas na may pagkakatugma ang kanyang mga sinabi sa mga isiniwalat ni dating Kapitan Alwin Nimo.

Ayon sa mga pahayag niya na lumutang, umano’y nagbigay si Gov. Noel Rosal ng instruksyon na si “ZagNim” ang mamahala sa operasyon. Ang tinutukoy umanong “Nim” ay si Nimo. Bagama’t nabanggit sina Rosal, Nimo at iba pa sa kanyang privilege speech, wala naman siyang sinabi tungkol sa pagkakasangkot ni Cong. Caloy Loria.

Kung totoo ang mga alegasyong ito, malinaw na kayo-kayo lamang ang nagplano at nag-usap tungkol sa operasyon at wala kayong isinamang ibang politiko. Kaya ngayong nagkaroon kayo ng hindi pagkakaunawaan at may lumutang nang whistleblower, bakit ang depensa ninyo ay pinupulitika lamang kayo?

Kayo-kayo ang nagplano at nagkasundo. Malay ba ang ibang mga politiko sa inyong napag-usapan—kung saan napunta ang sinasabing 9%, 3% at iba pang porsiyento, at kung sino-sino ang nakinabang?

Ngayong may mga taong nagsasalita na, panahon nang sagutin nang direkta ang mga alegasyon. Hindi sapat ang puro pagtanggi, pagdadahilan at pagsigaw ng “pamumulitika.” Kung walang katotohanan ang mga paratang, harapin ang mga ito at ilabas ang ebidensiya. Sa korte magkakaalaman kung sino ang nagsasabi ng totoo at kung sino ang nagsisinungaling.

08/09/2026

SINO ANG DAPAT MAGPALIWANAG?

Tinatanong ng mga kapanalig ng Kapitolyo kung magkano raw ang ginastos ng Legazpi sa sako at pagre-repack ng BBM Rice.

Maling puno ang tinataholan nila. Sa ilalim ng LGSF-FALGU guidelines, prescribed ang branded packaging at paglalagay ng opisyal na LGU seal.

Mas dapat tanungin ang Kapitolyo: Kung may nakalaang budget para sa prescribed packaging, bakit puting sako na may sticker lamang ang ginamit? Bakit may apat na logo, kabilang pa ang “Albay in My Heart”?

Bago bumanat, tingnan muna ang sariling sako. Bumerang iyan.

08/09/2026

PARA SA NAGMAMAGALING NA
MAESTRO, MALI NA NAMAN ANG INSINWASYON MO

NO ISSUE PO ANG PAGLAGAY NG LOGO NG LEGAZPI

Sa ilalim ng 2026 LGSF–FALGU Rice Distribution Project, may itinakdang standard packaging para sa bigas. Kabilang dito ang:

* Bagong Pilipinas/Bawat Bayan Makikinabang branding;
* Sagisag ng Pangulo;
* “Not for Sale”;
* timbang ng bigas; at
* opisyal na logo o seal ng tumatanggap na LGU.

Makikita rin sa procurement documents ng Tabaco City at Casiguran, Sorsogon ang template na may nakalaang “LGU Logo Here.” Kaya ang logo ng Legazpi City sa sako ay naaayon sa prescribed program packaging at hindi natatanging ginawa lamang ng Legazpi. DBM-DILG Joint Circular No. 1, s. 2026⁠, Tabaco City procurement document⁠, Casiguran procurement specifications⁠

Gayunman, hindi eksaktong sabihing ipinapadala ng national government ang nakasakong bigas. Karaniwang pondo ang inililipat sa LGU, at ang LGU ang nangangasiwa sa procurement at pamamahagi. Bahagi na ng procurement specifications ang tamang sako at paglalagay ng LGU seal.

07/09/2026

JUETENG SA ALBAY AT SI KAPITAN ALWIN NIMO: MAUULIT BA ANG KASAYSAYAN?

Matagal nang inuugnay sa operasyon ng jueteng sa Albay si dating Anislag, Daraga Barangay Captain Alwin Nimo. Siya mismo ay umamin noon na nagsilbi siyang tagapaghatid ng payola—isang mahalagang dahilan kung bakit hindi maaaring basta balewalain bilang karaniwang tsismis ang kanyang mga sinasabi.

Noong Pebrero 2024, nagsampa si Nimo ng reklamo sa Office of the Ombudsman laban kay noo’y Albay Governor Edcel Greco “Grex” Lagman. Inakusahan niya si Lagman na tumanggap umano ng lingguhang payola mula sa jueteng noong ito ay vice governor pa.

Itinanggi ni Lagman ang mga paratang at sinabing bahagi lamang ang reklamo ng isang kampanyang pampulitika laban sa kanya.

Ngunit hindi nagtapos sa palitan ng akusasyon at pagtanggi ang usapin.

Noong Oktubre 2024, preventively suspended si Lagman habang iniimbestigahan ang reklamo. Pagsapit ng Abril 2025, inilabas ang desisyon ng Ombudsman na nag-aalis sa kanya sa serbisyo matapos siyang mapatunayang administratively liable sa grave misconduct.

Ayon sa Ombudsman, may “substantial evidence” na sumuporta sa reklamo—kabilang ang mga bank deposit slip, salaysay ni Nimo at affidavits ng iba pang sinasabing bagman. Tinatayang ₱8.1 milyon ang kabuuang halagang umano’y natanggap ni Lagman.

Gayunman, ibinasura ng Ombudsman ang magkahiwalay na paratang na dishonesty at neglect of duty dahil sa kakulangan ng ebidensya. Patuloy namang itinanggi ni Lagman ang pagtanggap ng payola at sinabi niyang kanyang iaapela ang kaso.

Bagamat ang pagkatig ng Ombudsman sa mga akusasyon ni Nimo ay hindi tahasang nagpatutunay na siya nga ang bagman ng jueteng, ngunit ipinakikita nitong hindi basta kuwento lamang ang kanyang nalalaman sa jueteng. Sinuri ng Ombudsman ang mga isinumite niyang salaysay at dokumento at nakakita rito ng sapat na batayan sa ilalim ng pamantayang “substantial evidence” para sa isang kasong administratibo.

BAGONG GOBERNADOR, BAGONG AKUSASYON

Ngayon, isa na namang gobernador ng Albay ang direktang inaakusahan ni Nimo.

Sa isinagawang press conference, sinabi niyang sina Governor Noel Rosal at Albay Second District Representative Caloy Loria ay tumanggap umano ng payola mula sa operasyon ng jueteng. Pinangalanan din niya ang mga kontratistang sina “Lubiano” at “de los Santos” bilang umano’y sangkot sa sistema.

Ayon kay Nimo, nagsimula umano ang operasyon noong Enero 2026. Nang pumasok ang Lucky Gem Corporation bilang awtorisadong STL operator, itinalaga raw siyang operations supervisor ngunit ipinagpatuloy umano ang pamimigay ng payola, senyales na may bookies o isang operasyon na gumagamit sa resulta o anyo ng lehitimong STL.

Iginiit ni Nimo na nagpatuloy ang paghahatid ng payola hanggang noong isang buwan bago siya tuluyang alisin bilang operations supervisor.

Mariing itinanggi ni Governor Rosal ang paratang at sinabing wala siyang kinalaman o kaalaman sa sinasabing jueteng payola.

Sa ngayon, ang mga pahayag ni Nimo ay nananatiling mga alegasyon hangga’t hindi niya naihaharap ang kanyang ebidensya sa tamang ahensya at napagtitibay ang mga ito sa isang pormal na proseso.

MAUULIT BA ANG NAGING PATTERN?

Kapansin-pansin ang pagkakatulad ng mga pangyayari.

Bago kasuhan si Lagman, nagpahiwatig muna si Nimo na magsasagawa siya ng press conference. Nang hindi umano pinansin at itinanggi ang kanyang mga pahayag, inilantad niya sa publiko ang kanyang mga akusasyon at kalaunan ay nagsampa ng pormal na reklamo sa Ombudsman.

Una, alegasyon. Sumunod press conference. Pagkatapos ay pagtanggi, na nauwi sa pagsusumite ng ebidensya at pagsasampa ng kaso.

Sa kaso ni Lagman, humantong ang prosesong ito sa preventive suspension at kalaunan ay dismissal mula sa serbisyo.

Ngayon, tila nasa unang yugto na naman tayo ng kaparehong pangyayari: nag-akusa si Nimo, nagsagawa ng press conference at itinanggi naman ng pinangalanan ang kanyang mga paratang.

Ang malaking tanong: susundan ba ni Nimo ang dati niyang ginawa?

Magsasampa ba siya ng kaso laban kina Governor Rosal, Congressman Loria at iba pang kanyang pinangalanan? Mailalabas ba niya ang sinasabi niyang mga pag-uusap, talaan ng kuwenta, cellphone records at iba pang dokumentong maaaring magpatibay sa kanyang mga paratang?

Hindi sapat ang press conference upang patunayang nagkasala ang sinuman. Hindi rin sapat ang simpleng pagtanggi upang tuluyang mawala ang mabibigat at detalyadong akusasyon.

Dalawa lamang ang maaaring lumitaw sa isang patas na imbestigasyon: nagsisinungaling ang nag-aakusa, o hindi nagsasabi ng buong katotohanan ang mga inaakusahan.

Kaya ang dapat abangan ay hindi lamang ang susunod na pahayag ni Nimo. Ang higit na mahalaga ay kung handa ba siyang panindigan ang kanyang mga sinabi sa ilalim ng panunumpa at iharap ang kanyang ebidensya sa Ombudsman, Department of Justice o iba pang kinauukulang ahensya.

Mauulit nga ba ang kasaysayan? Isa na naman bang gobernador ng Albay ang haharap sa kasong may kaugnayan sa jueteng—at maaari kayang humantong muli ito sa pagkakatanggal sa puwesto?

O sa pagkakataong ito, mapatutunayang walang sapat na batayan ang mga paratang?

Iyan ang dapat linawin sa pamamagitan ng isang pormal, malaya at walang kinikilingang imbestigasyon.

07/09/2026

Sikat na naman ang Rapu Rapu!

07/09/2026

PARA SA MAESTRONG HINDI ALAM ANG PAGKAKAIBA NG RESCUE VEHICLE AT AMBULANSYA

BAKIT MAINAM NA RESCUE VEHICLE ANG PICKUP?

Mainam gamitin ang pickup truck bilang rescue vehicle, lalo na tuwing may baha, bagyo, pagputok ng bulkan, pagguho ng lupa, sunog at iba pang sakuna. Gayunman, dapat itong malinaw na maiba sa patient transport vehicle at ambulansiya dahil magkakaiba ang kanilang gamit, kagamitan at kinakailangang mga tauhan.

Ang rescue pickup ay pangunahing ginagamit upang maihatid ang mga rescuer at kanilang kagamitan sa lugar ng sakuna. Angkop ito dahil mataas, matibay at may maluwag na cargo bed. Kaya nitong dumaan sa maputik, mabaha, mabato o sirang kalsada, lalo na kung four-wheel drive.

Maaaring ikarga rito ang mga lubid, life jacket, rescue tools, generator, water pump, relief goods, medical supplies at iba pang kagamitang kailangan sa emergency. Kaya rin nitong humila ng rescue boat, trailer o nasirang sasakyan. Maaari itong lagyan ng winch, canopy, warning lights, sirena, radyo at mga compartment para sa rescue equipment.

Iba naman ang ambulansiya. Espesyal itong dinisenyo upang mabigyan ng agarang pangangalagang medikal at ligtas na maihatid sa ospital ang isang pasyente. Mayroon itong nakasarado at malinis na treatment area, stretcher na may safety restraints, oxygen, emergency medicines, monitoring devices at iba pang medical equipment.

Higit sa lahat, ang ambulansiya ay nangangailangan ng mga espesyalista o tauhang may sapat na pagsasanay sa emergency medical care, tulad ng emergency medical technician, nurse o iba pang health professional na may angkop na training sa basic o advanced life support. Hindi sapat na may ambulansiya at medical equipment—kailangan ding may kwalipikadong taong marunong gumamit ng mga ito at kayang alagaan ang pasyente habang bumibiyahe.

Ang patient transport vehicle naman ay pangunahing ginagamit sa paghatid ng mga pasyenteng hindi nangangailangan ng agarang emergency treatment. Maaaring wala itong kumpletong life-support equipment at specialized medical personnel na matatagpuan sa isang ganap na ambulansiya.

Dahil dito, hindi dapat ituring na kapalit ng ambulansiya ang ordinaryong pickup. Ang pagsakay sa maysakit o malubhang nasugatan sa bukas na cargo bed ay maaaring maglantad sa kanya sa ulan, init, alikabok at panganib ng karagdagang pinsala. Dapat lamang itong gawin kung matinding emergency at wala nang ibang mas ligtas na paraan.

Simple ang pagkakaiba: ang rescue pickup ay naghahatid ng mga rescuer, kagamitan at tulong sa lugar ng sakuna. Ang patient transport vehicle ay naghahatid ng mga pasyenteng hindi kritikal. Ang ambulansiya naman ay may angkop na kagamitan at trained medical personnel upang maalagaan at ligtas na maihatid ang pasyente sa ospital.

Magkaiba ngunit magkatuwang ang kanilang tungkulin. Kaya ang isang handang lokal na pamahalaan o rescue organization ay nararapat magkaroon ng rescue vehicle at isang tunay na ambulansiyang may kumpletong kagamitan at sapat na sinanay na medical personnel.

07/09/2026

Sa Naga, lampas 200 na an kaso nin dengue asin anom na an nagadan. Samantala, sa Legazpi, lampas 300 na an kaso asin apat na an nagadan.

07/09/2026

Bakong iyo?

BOOKIES O JUETENG?

Hindi mabubuhay ang ilegal na sugal kung walang proteksiyon mula sa mga tiwaling pulis at politiko.

Habang pinaghahatian nila ang salaping kinulimbat mula sa mga nasa laylayan, may mga pamilyang lalo namang ibinabaon sa kahirapan. At ang masaklap—kaya nilang ipakain sa sarili nilang pamilya ang perang galing sa paghihirap ng mahihirap.

Ang jueteng ay hindi simpleng sugal. Isa itong sistemang nabubuhay sa kasakiman, katiwalian at proteksiyon ng mga makapangyarihan.

07/09/2026

BREAKING: PANIBAGONG WARRANT OF ARREST LABAN KAY ZALDY CO, INILABAS NG SANDIGANBAYAN; DATING SPEAKER MARTIN ROMUALDEZ, KASAMA NA!

Kaugnay ito ng ₱7.4-bilyong kasong plunder hinggil sa umano’y kickbacks mula sa flood control at iba pang government infrastructure projects. Kasama rin sa mga akusado sina Joselyn Tragua Serenio at Felicito Cristobal Guevarra.

07/09/2026

KAPAG SI NIMO NAG AKUSA!

Batay sa kasaysayan ng Albay, hindi maaaring basta balewalain ang mga akusasyon ni Alwin Nimo tungkol sa jueteng. Sa nauna niyang reklamo, ang mga ebidensyang kanyang iniharap ay naging bahagi ng kasong humantong sa pagkakatanggal sa puwesto ni dating Albay Governor Grex Lagman matapos itong mapatunayang guilty of grave misconduct ng Office of the Ombudsman.

Hindi nito awtomatikong pinatutunayang totoo ang mga bagong paratang ni Nimo laban kina Governor Noel Rosal at Congressman Caloy Loria. Ipinakikita lamang ng naunang kaso na hindi lahat ng kanyang inilalantad ay maaaring ituring na simpleng tsismis o walang-basehang akusasyon.

Kaya dapat nang dalhin ni Nimo sa tamang ahensya o hukuman ang sinasabi niyang mga pag-uusap, kuwentada at iba pang ebidensya. Doon dapat malaman kung sino ang nagsasabi ng totoo at kung sino ang nagsisinungaling.