DZEL1260khz Radyo Agila News and Information

25/09/2026

Arestado ang isang 67-anyos na lalaki sa isinagawang warrant operation ng mga awtoridad sa Barangay Kinabuhayan, Dolores, Quezon.

Sa operasyon, nasamsam mula sa pag-iingat ng suspek ang apat na baril na may iba't ibang kalibre, mga bala, at isang magazine.

Ayon sa pulisya, bago ang operasyon ay nakatanggap sila ng mga ulat na umano’y nanunutok at nagpapaputok ng baril ang suspek sa kanilang lugar, dahilan upang magsagawa ng kaukulang aksyon ang mga awtoridad.

Dinala sa himpilan ng pulisya ang suspek para sa dokumentasyon at inquest proceedings, habang sumasailalim naman sa pagsusuri ang mga nakumpiskang armas.

Patuloy ang imbestigasyon ng pulisya kaugnay ng insidente at sa posibleng iba pang paglabag na maaaring ikaso laban sa suspek.Ivia: Martin Banaag

24/09/2026

Mahigit anim na milyong pisong halaga ng mga hinihinalang smuggled o ilegal na sigarilyo at mahigit apat na milyong pisong halaga ng hinihinalang ilegal na droga ang nasamsam ng mga awtoridad sa magkakahiwalay na operasyon sa Northern Mindanao.

Ayon sa Police Regional Office 10 o Northern Mindanao Police Regional Office, ilang mga suspek ang naaresto at nahaharap na sa kaukulang kaso kaugnay ng mga nakumpiskang kontrabando at ilegal na droga. Bahagi ito ng pinaigting na kampanya laban sa smuggling at ilegal na droga sa rehiyon.

Sinabi ni PRO-10 Regional Public Information Officer Major Joann Navarro na patuloy ang operasyon ng kapulisan upang sugpuin ang mga iligal na gawain at papanagutin ang mga sangkot sa paglabag sa batas.

Patuloy namang isinasagawa ng mga awtoridad ang imbestigasyon at paghahanda ng mga kasong isasampa laban sa mga naarestong suspek.Ivia: RICHARD DELA CRUZ

24/09/2026

Patay ang dalawang miyembro ng Philippine Army matapos pagbabarilin ng hindi pa nakikilalang mga suspek sa Davao-Cotabato Road, Kilometer 17, Barangay Ladia, Sultan Kudarat, Maguindanao del Norte, gabi ng Setyembre 23.

Kinilala ng Sultan Kudarat Municipal Police Station ang mga biktima na sina PFC Jobert Labuson, 44 anyos, at PFC John Mark Dumaguing, kapwa nakatalaga sa Bravo Company ng 7th Infantry Battalion ng 6th Infantry Division.

Batay sa paunang imbestigasyon, hinabol umano ng dalawang armadong lalaki na sakay ng puting motorsiklo ang mga biktima bago pinaputukan.

Narekober ng mga awtoridad sa lugar ang tatlong basyo ng bala mula sa kalibre .45 na baril.

Agad na dinala sa pagamutan ang dalawang sundalo ngunit binawian din ng buhay habang ginagamot.

Patuloy naman ang imbestigasyon at intelligence gathering ng mga awtoridad upang matukoy ang pagkakakilanlan ng mga suspek at ang motibo sa insidente.Ivia: Ely Dumaboc

23/09/2026

Nasabat sa isinagawang Joint Interdiction Operations ng Regional Maritime Unit 13, Surigao del Norte Maritime Police Station, DENR at PPA Port Police, sa Gate 5 ng Port of Surigao , ang isang Transport Vehicle na may kargang Exotic Wildlife, 9mm Pistol at iba pang kontrabando na aabot sa halagang 3.301 Milyon Pesos.

Kabilang sa mga nakumpiskang Exotic Wildlife, ay ang White Cockatoos, Red-Footed Tortoises, Leopard Tortoises at iba pang Protected Species na nagkakahalaga ng 2.066 Milyong Piso.

2 indibidwal naman na kinilalang mga reprensentative ng JPV Pet Transport and Logistics ang naaresto ng mga operatiba sa naturang operasyon.

Dinala ang mga suspek sa Regional Maritime Unit 13 para sa dokumentasyon, habang itinurn-over naman sa DENR ang mga nakumpiskang Wildlife para sa kaukulang pangangalaga at disposisyon alinsunod sa batas.

Isinasagawa rin ang Inquest Proceedings kaugnay ng paglabag sa Republic Act No. 9147 o Wildlife Resources Conservation and Protection Act.Ivia: Aldrin Puno

📸: PPA

23/09/2026

23/09/2026

Posibleng maharap sa mabigat na kaso ang dalawang magkapatid na pinaghihinalaang nasa likod ng pagpapakalat ng mga online threats na nagdulot ng pangamba sa ilang paaralan sa Batangas.

Sa isinagawang search warrant operation ng mga awtoridad sa Lipa City, nakumpiska ang dalawang cellphone at isang tablet na pinaniniwalaang ginamit sa pagpapadala at pagpapakalat ng mga naturang banta sa social media at iba pang online platforms.

Ayon sa paunang imbestigasyon, kabilang sa mga ipinadalang banta ang umano’y pagbabanta ng pambobomba, pangkikidnap sa mga bata, at pagpatay sa mga estudyante. Ang mga mensaheng ito ay nagdulot ng takot at pagkabahala sa mga g**o, mag-aaral, at mga magulang sa iba’t ibang paaralan.

Kasalukuyang sumasailalim sa pagsusuri ang mga nakumpiskang digital devices upang makalap ang karagdagang ebidensya na maaaring magpatibay sa kaso laban sa mga suspek.

Samantala, tiniyak ng Philippine National Police o PNP na seryoso nitong tinutugunan ang lahat ng uri ng banta laban sa mga paaralan at mag-aaral. Ayon sa pulisya, patuloy silang nagsasagawa ng masusing imbestigasyon upang mapanagot ang mga sangkot at matiyak ang kaligtasan at kapayapaan sa mga institusyong pang-edukasyon.

Pinaalalahanan din ng mga awtoridad ang publiko na maging responsable sa paggamit ng social media at iba pang digital platforms, dahil ang pagpapakalat ng maling impormasyon at pagbabanta ay maaaring magdulot ng matinding takot sa komunidad at humantong sa kaukulang pananagutang kriminal.Ivia: Martin Banaag

📸: Lipa CCPS

23/09/2026

Online Threat sa Paaralan sa Davao del Sur, Nagdulot ng Pangamba sa mga Magulang

DAVAO DEL SUR — Nabalot ng pangamba at matinding pag-aalala ang mga magulang at tagapag-alaga ng mga estudyante ng Sulop National High School matapos kumalat sa social media ang isang seryosong banta na may kaugnayan sa paaralan.

Dahil sa naturang online threat, agad na nagtungo sa paaralan ang maraming nag-aalalang magulang upang personal na tiyakin ang kaligtasan at kalagayan ng kanilang mga anak. Nagtipon ang mga ito sa harap ng gate ng paaralan habang hinihintay ang paglilinaw at mga hakbang na isinasagawa ng mga awtoridad kaugnay ng insidente.

Ayon sa mga ulat, mabilis na kumalat ang banta sa social media na nagdulot ng takot at pagkabahala hindi lamang sa mga magulang kundi maging sa buong komunidad.

Sa kasalukuyan, nagpapatuloy ang imbestigasyon ng Philippine National Police at ng lokal na pamahalaan upang matukoy ang pinagmulan ng online threat at mapanagot ang sinumang nasa likod nito.

Patuloy namang pinapayuhan ng mga awtoridad ang publiko na maging maingat sa pagpapakalat ng impormasyon sa social media at makipagtulungan sa mga kinauukulan habang isinasagawa ang masusing pagsisiyasat sa insidente.Ivia: Ely Dumaboc

📸: Celrima Naplada

22/09/2026

Tatlong hinihinalang sangkot sa ilegal na droga ang naaresto matapos mabuwag ng mga awtoridad ang isang drug den sa Purok 4, Barangay 27, Victory Village South, Legazpi City, Albay, gabi ng Setyembre 21.

Kinilala ang mga naaresto na sina alias “Dodon,” na itinuturong tagapamahala ng drug den; alias “VJ,” na sinasabing empleyado nito; at alias “Galog,” na itinuturing namang bisita sa lugar.

Sa isinagawang buy-bust operation ng PDEA Albay Provincial Office at iba pang law enforcement units, nasamsam ang tinatayang 14 gramo ng hinihinalang shabu na may standard value na humigit-kumulang ₱95,200.

Sumasailalim na sa kaukulang dokumentasyon ang mga suspek at mga nakumpiskang ebidensya habang inihahanda ang pagsasampa ng mga kaukulang kaso laban sa kanila.

📸: PDEA Bicol

22/09/2026

Negosyante sa Mati City, ninakawan ng dalawang armadong suspek; insidente, nahagip ng CCTV

Nahagip ng CCTV camera ang aktuwal na pagnanakaw ng dalawang armadong lalaki sa isang negosyante na may-ari ng tindahan ng piyesa ng motorsiklo sa Lungsod ng Mati, Davao Oriental, kagabi, Setyembre 21.

Sa kuha ng video, makikitang dumating ang dalawang suspek na sakay ng motorsiklo at agad na nilapitan ang biktima. Nagbunot umano ang mga ito ng baril at sapilitang kinuha ang kanilang target na mga gamit o pera bago mabilis na tumakas.

Nagsasagawa na ng imbestigasyon ang mga awtoridad upang matukoy ang pagkakakilanlan at kinaroroonan ng mga suspek. Humihingi naman ng tulong ang biktima sa pulisya para sa agarang pagdakip sa mga sangkot sa insidente.lvia: Ely Dumaboc

📸: Ajd Motorparts