31/01/2024
PEBRERO 1, 2024 – HUWEBES
Ikaupat nga Semana Sulod sa Tuig
(Green)
PUDYOT SA EBANGHELYO
Ang matuod nga kasiguruhan makaplagan dili diha sa mga butang sa kalibutan sama sa salapi, kabtangan, mga hinagiban ug uban pa. Apan kini makaplagan ug masinati lamang diha sa kamatngunan nga ang Dios mao ang matuod tuburan niini. Diha sa pagpadala ni Hesus sa iyang mga tinun-an sa misyon, siya nagpahinumdom niini kanila sa dili pagdala sa bisan unsang butang. Buot ni Hesus nga ang ilang dad-on mao ang hugot nga pagsalig sa Dios ug sa iyang mensahe sa kaluwasan.
Kini usab mao ang gipakita ni San Pedro Bautista ug San Pablo Miki ug mga kauban diha nga sila wala mahadlok sa paglutos ug kamatayon ug nahimong martir sa pagtuo tungod kay hugot ang ilang pagsalig sa Dios nga sila dili niya pasagdan.
ANG PABBASA GIKAN SA UNANG BASAHON SA MGA HARI (1 Kgs. 2:1-4, 10-12)
Sa dihang hapit na mamatay si David, gipahimangnoan niya ang iyang anak nga si Solomon. Miingon siya, “Hapit na ako mamatay. Pagmalig-on ug pagmaisogon, ug tumana ang pahimangno sa GINOO nga imong Dios; sunda ang iyang kabubut-on ug tumana ang tanan niyang mga sugo ug mga hukom sumala sa nahisulat sa Balaod ni Moises, aron molampos ka sa tanan mong buhaton bisag asa ka paingon; aron tumanon sa GINOO ang iyang saad kanako nga nag-ingon, ‘Kon ang imong mga anak magmatngon sa ilang pagkinabuhi, ug magmatinumanon kanako sa kinasingkasing gayod, dili kakabsag kaliwat nga maghari sa Israel.’
Unya namatay si David ug gilubong didto sa Jerusalem. Naghari si David sa Israel sulod sa kuwarenta ka tuig, pito ka tuig sa Hebron, ug katloag-tulo ka tuig sa Jerusalem. Human mamatay si David mipuli kaniya paghari si Solomon ug gamhanan kaayo ang iyang gingharian.
ANG PULONG SA GINOO.
SALAMAT SA DIOS
SALMO RESPONSORYO
1 Chr. 29:10, 11, 11-12, 12
T. Ginoo, gibayaw ikaw labaw sa tanan.
Daygon ka unta, O Ginoo, Dios ni Israel among Amahan, Gikan sa kahangturan ngadto sa kahangturan.
T. Ginoo, gibayaw ikaw labaw sa tanan.
Imo, O Ginoo, ang kaharianon; gibayaw ka nga pangulo labaw sa tanan. Ang kabahandianon ug kadungganan nagagikan kanimo.
T. Ginoo, gibayaw ikaw labaw sa tanan.
Ug ikaw ang nagmando diha sa tanan sa imong kamut anaa ang gahom ug kusog; Ikaw ang naghatag sa kadako ug kusog ngadto sa tanan.
T. Ginoo, gibayaw ikaw labaw sa tanan.
ALELUYA (Mk. 1:15)
T. Aleluya.
Miabot na gayud ang panahon nga maghari na ang Dios! Busa hinulsoli ug biyai ang inyong mga sala ug tuohi ninyo ang Maayong Balita.
T. Aleluya.
ANG PAGBASA GIKAN SA EBANGHELYO SUMALA NI SAN MARCOS (Mk. 6:7-13)
Unya miadto si Jesus sa tanang kasikbit nga balangay ug nagtudlo sa mga tawo. Ug gitigom niya ang napulogduha ka tinun-an ug gipadala sa tinagurha. Unya iyang gihatagan sila sa gahum sa paghingilin sa mga yawa, ug giingnan sila, “Ayaw kamo pagdala’g pagkaon, ni puntil, ni kuwarta, o bisan unsa, gawas lamang sa sungkod. Pagsandalyas kamo, apan ayaw pagdala’g laing bisti gawas sa inyong gisul-ob.” Miingon usab siya kanila, “Sa inyong pag-abot sa lungsod, adto saka sa balay sa nagdapit kaninyo, ug ayaw’g balhin sa laing balay hangtud mobiya kamo nianang lungsora. Kon mahiadto kamo sa usa ka dapit diin ang mga tawo dili modawat kaninyo o dili mamati kaninyo, biyai kanang dapita ug taktaka ang abog sa inyong tiil. Pasidaan kini alang kanila!”
Busa nanglakaw sila ug nagwali nga ang mga tawo kinahanglan maghinulsol sa ilang mga sala. Ilang gihinginlan ang daghang mga yawa ug gihaplasan nilag lana ug giayo ang daghang mga masakiton.
ANG EBANGHELYO SA GINOO.
DAYGON IKAW, O CRISTO.
KATILINGBANONG PAG-AMPO
P: Mga igsuon, ang Dios maoy unang nahigugma kanato, gipadala Niya ang Iyang Anak alang sa atong kaluwasan, ato Siyang himamaton dinhi sa atong kinabuhi ug mag-ampo kita diha sa pag-ingon: GINOO, DUNGGA KAMING IMONG KATAWHAN.
a. Alang sa tanang nag-alagad sa Simbahan nga mabatunan unta nila ang hiyas nga angay sa ilang mga responsibilidad aron magmabungahon ang ilang pagpangalagad. Mag-ampo kita sa Ginoo.
b. Alang sa tanang nag-alagad sa atong gobyerno mahitukma unta ang ilang mga plano ug disisyon sa kabubut-on sa Dios alang sa kauswagan sa atong nasud. Mag-ampo kita sa Ginoo.
c. Alang sa tanang mag-uuma, mga nagtrabaho sa nagkalainlaing departamento nga pinaagi sa panabang sa Dios magmadasigon silang mopalambo sa mithing Kristohanon diha sa ilang pagbuhat ug pagpakita sa pagkamaayong panig-ingnan sa uban. Mag-ampo kita sa Ginoo.
d. Alang kanatong tanan nga ania karon dinhi nga mamahimo unta kitang mga maayong binhi nga miturok sa maayong yuta aron motubo ug magmabungahon ang atong pagtoo inubanan sa atong mga maayong buhat. Mag-ampo kita sa Ginoo.
P: Amahan nga puno sa gugma, among giya ug sumbanan, patalinghugi kining among mga pag-ampo nga among gipaabot Kanimo pinaagi ni Cristo Imong Anak ug among Ginoo. Amen.
