Pahayagang Tugatog

31/10/2025

Mga Mamamahayag ng Tomas Lim Alcordo Sr. NHS, Nag-uwi ng Tagumpay sa DSPC!

Muling ipinamalas ng mga mag-aaral ng Tomas Lim Alcordo Sr. National High School ang kanilang husay at dedikasyon sa larangan ng campus journalism sa katatapos lamang na Division Schools Press Conference (DSPC).
Sa kabila ng matinding kompetisyon, tatlong mag-aaral ng paaralan ang nag-uwi ng karangalan:
🖋️ Erica Jean Ngalo – Ikaapat na Gantimpala sa Pagsulat ng Editoryal Tagasanay: Saidamen Solutan
🖋️ Ricalou Caballero – Ikaapat na Gantimpala sa Pagsulat ng Kolum Tagasanay: Saidamen Solutan
🖋️ Rezel Dalucan – Ikalimang Gantimpala sa Pagwawasto ng Sipi at Paguulo ng Balita Tagasanay: Josie Lapaz
Ang kanilang tagumpay ay bunga ng tiyaga, determinasyon, at gabay ng kanilang mga tagasanay na walang sawang naglaan ng oras at kaalaman upang sila ay maihanda sa patimpalak.
Buong Tomas Lim Alcordo Sr. National High School ay lubos na ipinagmamalaki ang kanilang mga mag-aaral sa pagkamit ng mga karangalang ito. Ang inyong tagumpay ay patunay na sa sipag, tiyaga, at pananalig sa sarili, walang imposibleng makamit.
Mabuhay ang mga Tomasian Journalists!

01/10/2025

01/10/2025

Pagpupugay sa mga G**o, Tampok sa Masayang Teachers' Day ng TLASNHS

Tomas Lim Alcordo Sr. National High School, Setyembre 29, 2025 Buong puso at galak na ipinagdiwang ng Tomas Lim Alcordo Sr. National High School ang School-Based Teachers' Day bilang pagkilala sa walang kapantay na serbisyo, sakripisyo, at dedikasyon ng mga g**o sa kanilang tungkulin bilang tagapaghubog ng kabataan.

27/09/2025

Tomasians Namayagpag sa Katatapos na District Training Writeshop

Muling pinatunayan ng mga mag-aaral ng Tomas Lim Alcordo Sr. National High School ang kanilang husay sa larangan ng Campus Journalism matapos dominahin ang District Training Writeshop na ginanap sa Teoderico Lopez Elementary School noong Setyembre 26–27, 2025.
Ipinamalas ng mga Tomasians ang kanilang galing sa iba't ibang kategorya ng pagsulat, pagguhit, at pagkuha ng larawan, kung saan marami sa kanila ang tumanggap ng mga pangunahing parangal.
🏅 Mga Nagwagi mula sa Tomas Lim Alcordo Sr. NHS:
🥇 Hanna Jean Panday – Unang Gantimpala sa Copy Reading (English)
🥇 Marian Culano – Unang Gantimpala sa Pagwawasto ng Sipi at Pag-uulo ng Balita (Filipino)
🥇 Erica Jane Ngalo – Unang Gantimpala sa Editorial Writing (Filipino)
🥇 Dee Ann Senajon – Unang Gantimpala sa Pagsulat ng Lathalain (Feature Writing)
🥇 Veralyn Vivas – Unang Gantimpala sa Sci-Tech Writing (Filipino)
🥇 Yohanah B. Esmael – Unang Gantimpala sa Photojournalism
🥈 Janiza Mama – Ikalawang Gantimpala sa Column Writing (English)
🥉 Ricalou Caballero – Ikatlong Gantimpala sa Column Writing
🥈 Eha Mie Masalon – Ikalawang Gantimpala sa Editorial Cartooning
🥈 Joven Bhods Culano – Ikalawang Gantimpala sa Editorial Cartooning
🥈 Jelly Jane Torebellas – Ikalawang Gantimpala sa Photojournalism

Ang tagumpay na ito ay patunay ng kahusayan, disiplina, at sipag ng mga mag-aaral ng Tomas Lim Alcordo Sr. NHS sa larangan ng pamamahayag. Hindi rin matatawaran ang dedikasyon ng kanilang mga tagapagsanay at g**o na naging katuwang nila sa paghahanda.
Ang nasabing writeshop ay bahagi ng patuloy na pagsasanay para sa mga campus journalists upang mapahusay ang kanilang kakayahan bilang mga tagapaghatid ng makabuluhang impormasyon sa kanilang mga paaralan at komunidad.

12/09/2025

Binaha Tayo Hindi Dahil sa Ulan, Kundi sa Katiwalian.

Sa bawat pag-ulan na nauuwi sa baha, palaging ang karaniwang mamamayan ang nagdurusa. Nabubura ang kabuhayan, nalulunod ang pangarap, at nasisira ang tiwala sa sistemang dapat sana'y nagbibigay proteksyon. Ngunit mas masakit sa lahat ay ang katotohanang hindi na ang kalikasan ang pangunahing kalaban, kundi ang katiwaliang ugat ng mga proyektong multo—mga ghost projects—na kunwaring inilaan para sa flood control.

Sa ilalim ng pondo para sa disaster preparedness at infrastructure development, bilyun-bilyong piso ang nailaan ng pamahalaan upang ayusin at pahusayin ang flood control systems sa iba’t ibang bahagi ng bansa. Ngunit ano ang sinapit? Sa imbes na proyekto, mga papel lang ang natapos. Sa halip na floodways at drainage systems, resibo at report lang ang naipasa. May mga proyektong pinirmahan at pinondohan, ngunit hindi kailanman isinagawa. Kaya't sa bawat buhos ng ulan, baha rin ang paniningil—hindi lang ng kalikasan, kundi ng kapabayaan.

Mas masahol pa rito, ang mga dapat sanang managot ay tila mga multo ring hindi makita. Hindi sapat ang mga pagdinig, press release, o pansamantalang suspensyon. Ang katiwalian sa likod ng mga ghost projects ay hindi lang simpleng pagkukulang. Isa itong kriminal na pagtalikod sa tungkulin—isang direktang paglalagay sa panganib sa buhay ng mga Pilipino.

Habang abala ang ilan sa pagpapayaman mula sa pondo ng bayan, ang mga ordinaryong mamamayan ay abala sa pag-ahon mula sa putik at pagbangon mula sa trahedya. Ito ba ang sistemang nararapat? Patuloy bang iiral ang ganitong klase ng kalakaran kung walang mananagot?

Ang panawagan ay malinaw: Panagutin ang mga tiwali. Imbestigahan nang lubusan ang mga proyektong multo. Dapat magkaroon ng tunay na transparency at accountability sa paggastos ng pondo para sa kalamidad. Dahil ang bawat pisong ninakaw sa flood control ay katumbas ng buhay at kabuhayang tinangay ng baha.

Hindi lang ulan ang dahilan ng pagbaha. Sa isang bansang ginagapang ng korapsyon, ang tubig ay simbolo ng galit ng taong bayan. At kung hindi kikilos ang pamahalaan laban sa mga salarin, baka sa susunod, baha na ng pagkadismaya at galit ang tuluyang bumalot sa buong bayan.

10/09/2025

Maikling Editoryal:

Sa Paaralan Nagsisimula ang Kamalayan

Ang paaralan ay hindi lang lugar para matuto ng mga asignatura.

Dito rin natututo ang mga kabataan kung paano maging mapanuri at makialam sa mga nangyayari sa paligid.

Sa tulong ng pag-aaral, unti-unti nating nauunawaan ang mga isyu sa lipunan at natututo tayong pumili ng tamang lider hindi lang dahil sa sikat sila o magaling magsalita, kundi dahil tunay silang may malasakit at kakayahan.

Kung gusto natin ng maayos na lipunan, kailangang simulan ang kamalayan habang bata pa. Dito pumapasok ang mahalagang papel ng paaralan.

Sa paaralan nagsisimula ang kaalaman at tamang pagdedesisyon. Sa mulat na pag-aaral, nagmumula ang pagbabago.

May-ari ng larawan: angtugatog101.