30/07/2026
Ikwento ko daw sa inyo... 😊
Ikwento ko daw sa inyo sabi ni Imran.
Yang picture na yan, kuha yan ilang araw matapos gumuho ang building na kung saan nakatira sina Imran.
Si Imran yung medyo malaking bata dyan, ung katabi naman nya is yung younger brother nya, ung nakaupo sa gitna. Then yung medyo matanda, kuya nila yan, bale inampon yan ng nanay nila.
Sabi ni Imran, nasawi yung tatay nya at yung bunso nilang kapatid na isang taong gulang dahil nga sa gumuhong building na yon. Sa isang iglap lang, nawala na lahat. Tulog sila nung time na yan tapos bigla na lang silang nakarinig ng malakas na pagsabog. Yung kalahati ng building lang ang gumuho, at sa kasamaang palad, doon sila nakatira sa parte na iyon.
Nakita pa nga daw nya yung katawan ng tatay at bunsong kapatid nya na wala nang buhay. Tapos yung nanay nya kritikal ang kondisyon, nasa ospital.
Maraming katanungan noon si Imran sa Allah, bakit daw? Sobrang matulungin daw ng tatay nya, mapagbigay, maraming pera, negosyo, hindi sya makasariling tao. In short, di dapat ito nangyari sa kanila.
Natatandaan niya noon, sa picture na yan, unang beses syang nasuotan ng pambaba. Wala man lang daw nagbigay sa kanya ng salawal man lang. Samantalang nung nabubuhay pa ang tatay nila, namimigay pa raw sila ng damit sa mga mahihirap.
Kung iisipin mo, sobrang unfair di ba? Kung sino pa ang may mabuting puso, sila pa ang nakakaranas ng ganito. Totoo naman, kahit sa amin nangyari ito eh.
Pero, ang Allah talaga ang nakakaalam ng lahat. Siya lang at wala nang iba. Kung hindi nangyari kay Imran yon, walang Zhai, Annan at Rehaan ngayon. Lahat ay nakatakdang mangyari, at lahat ay may aral na mapupulot na maaari nating ipamana sa magiging anak at pamilya natin. Un lang, mahirap tanggapin sa una, pero unti unti na lang nating maiintindihan paglipas ng panahon.
Madami pang kwento, busy lang ako gumawa ng customized 3d keychains ha. Next time na lang ulit.
