08/06/2026
Ganun ba talaga.. Or normal na lang?
Sumali kami sa endurance hindi lang para matapos ang challenge, kundi para maranasan kasama ang mga kapwa rider kung ano talaga ang pakiramdam ng isang endurance ride.
Sa buong biyahe, nag-enjoy kami sa mga tanawin, photo opportunities, at sa bawat lugar na aming dinaanan.
Pagdating namin sa bandang Lopez hanggang Calauag, Quezon, may hindi inaasahang pangyayari. Bandang alas-otso ng umaga, nagkaroon ng aksidente sa pagitan ng isang tricycle at isang Aerox, na naging sanhi ng pagkakabangga ng kasamahan kong naka-NMAX. Dahil dito, lubhang nasira ang harapang bahagi ng kanyang motorsiklo.
Sa pagkakataong iyon, may ilang kapwa namin endurance riders na dumaan at tumingin lamang. Ang iba ay hindi man lang huminto upang magbigay ng tulong o mag-assist sa sitwasyon, kahit kitang-kita na may rider na nakahiga at nangangailangan ng agarang tulong.
Naalala ko tuloy noong 2023 sa Quezon City Endurance Challenge. May isang rider na naaksidente sa Zambales at nahulog sa bangin. Hindi ko na inisip kung matatapos ko pa ang challenge. Ang nasa isip ko lang noon ay matulungan ang kapwa rider. Kahit pa maging DNF (Did Not Finish), para sa akin mas mahalaga ang buhay at kaligtasan ng isang tao.
Hindi ko ito ibinabahagi para manghusga o magmagaling. Ang nais ko lamang sana ay paalalahanan ang bawat isa na sa susunod, magbigay tayo ng kaunting oras, respeto, at malasakit sa mga nangangailangan ng tulong sa kalsada.
Alam kong magkakaiba tayo ng pananaw at maaaring hati ang opinyon ng mga makakabasa nito. Ngunit sana ay huwag nating balewalain ang mga ganitong sitwasyon
Bilang mga endurance riders, hindi lamang pagtatapos ng challenge ang sukatan ng tagumpay. Para sa akin, mas mahalaga pa rin ang pagiging makatao at ang malasakit sa kapwa rider sa oras ng pangangailangan.
Hindi ko ipinagmamalaki na tumulong ako noon at naging DNF. Ang mahalaga para sa akin ay nagawa ko ang tama sa pagkakataong iyon.
May kanya-kanya tayong goals sa ride, pero sana huwag nating kalimutan na higit sa anumang medalya o finisher status, ang tunay na tagumpay ay ang pagiging mabuting tao sa kapwa natin rider.
Iginagalang ko ang pananaw at desisyon ng bawat isa. Iba-iba tayo ng pagtingin sa buhay, at ito ay simpleng pagbabahagi lamang ng aking karanasan at saloobin.
Congratulations sa lahat ng participants ng PL8!
Ride safe always, and thank you.
Ingat po kayo Powerloop 8
Ron Jake Pangilinan Romy Ito
