01/09/2026
Anuman ang mga pagsubok na pinagdaraanan natin, at gaano man kabigat ang mga problemang kinakaharap natin, darating ang mga pagkakataong mapapagod tayo, manghihina, at mapapaiyak dahil sa bigat ng ating sitwasyon.
Minsan, may mga suliranin ding dumarating na pakiramdam natin ay inaapi tayo, sinasaktan, o hindi patas ang ginagawa sa atin ng ibang tao. Sa mga ganitong pagkakataon, huwag nating hayaang manaig ang galit. Huwag tayong mag-isip ng masama, at huwag nating gantihan ng masama ang gumagawa sa atin ng masama.
Sa halip, ilapit natin sa Diyos ang lahat.
Hayaan nating Siya ang gumawa ng paraan para ipagtanggol tayo. Sapagkat maaaring ang mga pagsubok na ito ay pagkakataon upang subukin ang ating pananampalataya upang maipakita natin na kahit mahirap, patuloy tayong nagtitiwala at sumasampalataya sa Kanya.
Huwag nating kalilimutan: kailanman ay hindi pababayaan ng Diyos ang Kanyang tapat na lingkod.
Maaaring hindi natin agad makita kung paano Niya lulutasin ang ating problema, ngunit magtiwala tayo sa Kanyang panahon at sa Kanyang paraan.
Sa bawat luha, bawat pagsubok, at bawat suliranin sa Diyos tayo lumapit, sa Kanya tayo kumapit, at sa Kanya tayo patuloy na sumampalataya.
