https://www.facebook.com/558716870651046/

Bicol Daily, Manila (2026)

21/01/2026

Mawot ni Senador Bam Aquino na patawan nin mas magabat na padusa an mga indibidwal asin eskwelahan na nag-aabuso sa pondo kan gobyerno sa irarom kan private school voucher program.

Ginibo ni Aquino an pangapodan matapos ibunyag kan sarong opisyal kan Private Education Assistance Committee (PEAC) na igwang pirang pribadong eskwelahan na may provisional permit an naggagamit nin ghost students para makakinabang sa Senior High School (SHS) voucher program.

Sa pagdangog kan Committee on Basic Education, na saiyang pinamamayohan, manungod sa mga lakdang na gibuhon na mas moderno asin pakusugon an suporta kan gobyerno sa pribadong basic education, sinabi ni Aquino na dapat iiba sa committee report an suway asin mas halangkaw na padusa nganing maulan an pandaraya.

“An saro sigurong pwede tang maidagdag sa committee report iyo an separate penalty para sa mga eskwelahan o mga indibidwal na niloloko an satuyang mga estudyante,” pahayag ni Aquino.

Tinawan-duon ni Aquino na irerekomendar sa committee report an mas magabat na padusa nganing malikayan an salang paggamit kan pondong itinanig para sa edukasyon kan mga estudyante.

“Pwede kitang magbugtak nin iba pang penalty ta an ikinakaso nindo, syndicated estafa. Sa katunayan, tibaad falsification of commercial documents lang. Pero posible sa bill na ini, pwede tang iiba an mga padusa para sa mga naggigibo nin pandaraya,” giit niya.

“Huli ta kun hinahabon ta an kwartang dapat napupunta sa mga hoben, garo ibang lebel na iyan nin karatan. Kaya pwede tang irekomendar sa satuyang committee report, sa satong bersyon, an suway na padusa para sa mga nanloloko sa gobyerno asin naggagamit kan voucher system na ini,” dagdag pa niya.

Naglalaom si Aquino na makua an suporta kan kapwa mga mambabatas, sa pagsabing kaipuhan nin mas magabat na padusa nganing magduwang-isip an mga nagbabalak na abusuhon an sistema.

“Irerekomendar ta iyan sa komite asin naglalaom ako na makukua ko an suporta kan satong mga katuwang, para kun si isay man an magprabar na gumibo nin maraot gamit an sistemang ini, gamit an kwarta kan DepEd, magduduwang-isip huli ta igwang suway na penalty na iibali. Itaas ta an penalty na iyan,” sabi ni Aquino.

19/01/2026

Tinatayang 20,000 na nursing asin iba pang allied health sciences students an makikinabang sa P500 milyon na tabang-pinansyal para sa Related Learning Experience (RLE) sa 2026 national budget, sigun ki Senador Bam Aquino.

Inanunsyo ini ni Aquino sa sarong reunion kaiba an mga nursing students na namidbid niya mantang nangangampanya para sa 2025 senatorial elections sa Cebu City.

Sa inot nindang paghilingan, pigheras kan mga estudyante an saindang mga pagkahadit manungod sa halangkaw na gastos sa RLE -- katumbas kan on-the-job training (OJT) asin sarong requirement para sa graduating nursing students. Nagpromisa man si Aquino na tatawan aksyon an mga idinulog saiya.

Bilang pag-utob sa saiyang promisa, pigduso ni Aquino an dagdag na P500 milyon sa 2026 national budget sa irarom kan Maintenance and Other Operating Expenses (MOOE) kan Higher Education Development Program, na espesyal na itinalaan para suportaran an RLE requirements kan allied health sciences students.

“We were able to include in the budget a P500-million scholarship specifically for RLE, providing up to P20,000 per semester,” sabi ni Aquino.

“That’s good for about 20,000 students. I think there are around 100,000 nursing students in the Philippines, so one-fifth can receive assistance,” dagdag pa niya, kadungan kan pagsabing an mga nagtitios na estudyante an tatawan prayoridad sa panuntunan na iluluwas kan Commission on Higher Education (CHED) nganing masigurado an patas asin maayos na pagpautob.

Nagpasalamat man si Aquino sa mga estudyante sa pagdara kan isyu sa saiyang atensyon, na sigun saiya ay igwang dakulang papel sa pagbilog kan RLE proposal.

“You can be proud and you can say, dahil nag-session kita sa IT Park ay may nabuong pondong iyan. A lot of our laws kaya, when we consult, when we talk to people that we want to help, or idtong mga ibang leaders, mga mayors, nakukua mi su insight,” paliwanag ni Aquino.

Nagsampa man si Aquino kan Senate Bill No. 123, na nagmamawot na gibuhon na libre an RLE sa State Universities and Colleges (SUCs) asin Local Universities and Colleges (LUCs).

Sa irarom kan panukalang batas, an mga nursing students sa private universities pwedeng mag-apply para sa TES assistance para sa mga gastuson na may kinaaraman sa RLE.

06/01/2026

Ngunyan na naaprubahan na an 2026 national budget, nagtutubod si Senador Bam Aquino na mapopondohan nin toltol asin maipapautob nin tama an mga importanteng programang pang-edukasyon, arog kan pagpapatindog nin mga classroom asin pagpapakusog sa school-based feeding program.

“Gana an mga hoben na Pilipino ngunyan na naaprubahan na an 2026 national budget. Huli kaini, mapopondohan na asin maipapautob nin tama an mga importanteng programa na makakatabang tanganing mapakusog asin maparahay an sektor kan edukasyon,” sabi ni Aquino, chairperson kan Senate Committee on Basic Education.

“Igwa nang pondo para sa pagpapatindog nin mga classroom, dagdag na budget para sa school-based feeding program asin libreng kolehiyo, asin iba pang importanteng suporta para sa mga estudyante tanganing maseguro na mas marhay an saindang pag-adal,” dagdag pa niya.

Kaiba sa P1.34-trilyon na pondo para sa edukasyon – an pinakadakula sa kasaysayan kan nasyon – an P68 bilyon para sa pagpapatindog nin mga bagong classroom asin P25.6 bilyon para sa pagpapalawig kan School-Based Feeding Program.

Nagtagama man an budget nin P67 bilyon para sa pagpapautob kan Republic Act No. 10931, o an batas sa Libreng Kolehiyo na inakda ni Aquino.

Dagdag pa digdi, iniba sa budget an suhestiyon ni Aquino na magtagama nin P500 milyon sa irarom kan Maintenance and Other Operating Expenses (MOOE) kan Higher Education Development Program, na partikular na itinalaga para sa pinansiyal na suporta sa Related Learning Experience (RLE) kan mga estudyante sa allied health sciences programs.

Kaiba sa mga estudyanteng makikinabang sa pondong ini an mga yaon sa allied health sciences programs arog kan Nursing, Medical Technology/Medical Laboratory Science, Pharmacy, Physical Therapy, Occupational Therapy, Respiratory Therapy, Radiologic Technology, Midwifery, Nutrition and Dietetics, Speech-Language Pathology, Human Biology/Pre-Med Allied Programs, Dentistry, Biochemistry, asin Psychology.

Sa saiyang talumpati, sinabi ni Presidente Marcos na sinusuportaran man kan education budget an pagmugna nin teaching asin non-teaching plantilla positions sa mga pampublikong eskwelahan, pati na an promosyon o reclassification kan mga paratukdo tanganing maseguro an de-kalidad na edukasyon.

Sa ibong kaini, liwat na tinawan-duon ni Aquino an saiyang pangapodan para sa mahigot na pagbabantay tanganing maseguro na an budget maipapautob nin tama asin an lambang piso magagamit sa tamang programa asin sa kapakinabangan kan mga estudyante.

“Sarabay niyatong bantayan an paggamit kan pondong ini, sagkod sa pinakahuring sentimo, tanganing masegurong mapupunta ini sa edukasyon asin bako sa korapsyon,” pirit niya.

10/12/2025

Naghagad si Senator Bam Aquino nin mas istriktong pagbantay para masigurong manatiling bilog an P1.38-trilyong pondo para sa edukasyon sa panukalang 2026 national budget sa panahon kan bicameral conference committee.

Nag-iiristoryahan na an mga piling miyembro kan Senado asin Kamara sa bicam para pagsaroon an mga probisyong magkaiba sa kani-kanilang bersyon kan budget.

Sa mga nakaaging taon, digdi nangyari an pagdadagdag o pagbabawas sa pondo, insertions, asin pagsingit kan mga bagong proyekto asin special provisions.

Alagad dahil ila-livestream an bicam proceedings, sinabi ni Aquino na may pagkakataon na ngunyan an publiko na mahiling an deliberasyon asin mabantayan nin marhay an anuman na pagbabagong pwedeng makaapekto sa budget sa edukasyon -- an pinakadakula sa kasaysayan kan nasyon.

“This is really an education budget. Iyan an panawagan ta. Bantayan ta. I’m expecting that an sinabi ngani digdi ay ila-livestream su laog kan bicam ay madagos. Incumbent iyan sa sato gabos na bantayan,” sabi ni Aquino, chairperson kan Senate Committee on Basic Education.

“Bakong lang su media, bakong lang su mga pulitiko, kundi su banwaan, bantayan na mayo nang slash sa mga budget item na mapupunta sa tawo asin mapupunta sa tama. Dae na dagdagan su budget item na alanganin asin posibleng magamit lang sa corruption,” dagdag pa niya.

Tinaon-duon ni Aquino na napakahalaga na tuloy-tuloy an pagbabantay kan publiko tanganing maprotektahan an education budget hanggang sa mapirmahan ini kan Presidente asin magin batas.

“Kung gusto ta nin marhay na pamamahala, bantayan ta su bicam. Pag may move or may motion na ma-slash an education budget, umalma tulos kita asin ipaabot ta na 'di katanggap-tanggap na babawasan an budget sa edukasyon,” sabi niya.

Ayon kay Aquino, naglaan an Senado nin lampas P65 bilyon para sa pagpapatindog nin nasa 27,000 hanggang 30,000 na classrooms sa 2026.

Para sa nutrisyon kan mga estudyante, itinaas kan Senado an pondo para sa school-based feeding program sa P27 bilyon.

Idinagdag niya na naglaan an Senado nin total na P37 bilyon para sa implementasyon kan Republic Act 10931 o an Free College Law, na mataong-benepisyo sa 5.7 milyong estudyante sa state universities and colleges, local universities and colleges, asin private higher education institutions (PHEIs).

Luwas sa libreng tuition, naglaan man an Senado nin P30 bilyon para sa allowances, na papakinabangan kan 1.5 milyong tios alagad kualipikadong estudyante hali sa public o private universities, kaiba an 490,000 learners hali sa Pantawid Pamilya Pilipino Program (4Ps).

“Over 27 million students po diyan sa K-12 at the tertiary an matatawanan po nin tabang,” sabi ni Aquino, principal sponsor kan Free College Law.

09/12/2025

Nag-apod si Senator Bam Aquino na tawan nin prayoridad asin pakusugon an suporta para sa children with disabilities, orog na an mga estudyante sa pampublikong eskwelahan na igwang espesyal na pangangaipo. Pigduon kan senador na kaipuhan masigurado kan gobyerno na nasisimbagan nin toltol an saindang mga pangangaipo.

Ginibo ni Aquino an pahayag bilang suporta ki Sen. Raffy Tulfo, na inot nang nagtaong-duon sa kakulangan nin tabang kan gobyerno para sa mga aking may kakundian, mga estudyanteng may special needs, asin sa saindang mga pamilya.

Bilang chairperson kan Committee on Basic Education, sinabi ni Aquino na makikitabangan siya ki Tulfo tanganing makahanap nin mga solusyon sa mga isyung inaatubang kan sektor na ini.

“Maninigo ining ma-raise and we will work hand-in-hand with the good senator, as soon as we can reconvene our committee, pag-abot sa mga children with special needs asin mga estudyanteng may special needs,” sabi ni Aquino. “Pwede kitang magtabangan para matawan nin solusyon an problema kaini asin makahanap kita nin solusyon para sa mga pamilya ninda.”

Tinukoy kan senador an EDCOM 2 report, na nagpapahiling na saro sa lambang limang estudyante an may kakundian o espesyal na pangangaipo na dapat matawan nin angkop na atensyon. Minsan siring, sinabi ni Aquino na kulang pa man giraray an pasilidad, pondo, asin iba pang kaipuhan na resources kan gobyerno tanganing sapat na masuportahan an mga aking ini.

“Kung ikukumparar ta an pondo, an imprastruktura, asin an kakayahan na matabangan an mga hoben na may special needs, kung ikukumparar sa nakatagamang budget ay harayo man nanggad. Dai sapat an facilities na itinatao kan gobyerno,” duon ni Aquino.

Dugang pa niya: “An iba mayong pambayad asin nakasarig lang talaga sa government facilities alagad kulang. Idtong mga gusto man magbayad, mayo man mapadumanan.”

03/12/2025

Nagsumiter si Senador Bam Aquino nin panukalang batas para repasuhon asin higpitan an party-list system tanganing masigurong an mga representante kaini tunay na nagseserbi sa marginalized asin underrepresented sectors, asin para makatabang sa pagsugpo kan korapsyon.

Pag naisabatas, makakatabang an Senate Bill No. 1559, o an “Party List Reform Act,” para masiguro na an party-list system tunay na magseserbi sa nakakarami, matao nin boses sa ordinaryong Pilipino sa Kongreso, asin mababawasan, kung dai man tulos mabura, an posibleng pag-abuso asin korapsyon sa sistema.

Sinambit ni Aquino an sarong pag-aadal kan 2025 kan election watchdog na Kontra Daya, na nadiskubreng 86 sa 156 na accredited party-list groups sa 2025 elections an konektado sa political dynasties o darakulang korporasyon.

Sa 63 na party-list groups na ipinroklama kan Mayo 19 bilang parte kan 20th Congress, 40 an kabali sa mga nasambitan sa nasabing report.

Nag-apodar na man an iba-ibang organisasyon, kaiba an John J. Carroll Institute on Church and Social Issues (ICSI), para sa pagbabalik kan dignidad sa party-list system sa paagi kan pagbaliki kaini sa orihinal na katuyuhan asin intensyon.

“These findings underscore an urgent and undeniable truth: the party-list system is being exploited by the powerful at the expense of those it was designed to uplift,” pahayag ni Aquino.

Inaatasan kan panukala an Commission on Elections (COMELEC) na magsagawa nin public evidentiary hearings tanganing beripikahon kung talagang pigrerepresentar kan mga organisasyon an sektor na saindang pigsasabing pigseserbisyuhan. Pagsisiguraduhon man kan proseso na an saindang mga nominees tunay na galing sa mga sektor na iyan.

Ipigpapanukala man kaini na palawigon an pirang importanteng deadlines, kaiba an registration period para sa mga party-list groups hale sa 90 pasiring 120 aldaw bago an eleksyon, asin an pagpapaluwas kan certified list kan eligible organizations hale sa 60 pasiring 90 aldaw bago an eleksyon.

Hihigpitan man kan panukala an mga regulasyon sa nominees, kung sain aatasan an party-list groups na magsumiter nin dae mababa sa anom (6) na nominees, na an listahan dapat aprubahan kan pinakahalangkaw na decision-making body kan organisasyon.

Dae tutugutan bilang nominees an mga tawong may relasyon hasta sa ikatlong (3rd) degree sa maski isay na presenteng nakatukaw na opisyal, pati na man an mga indibidwal na presente o naging government contractors, kaiba an mga opisyal kan mga kumpanya na kabali sa pampublikong imprastruktura o iba pang proyekto na pigpondohan kan estado.

“Through these reforms, this measure ensures that the party-list system truly serves the many, not the few, and empowers ordinary Filipinos to have a real say in their Congress. It is a step toward a more inclusive, accountable, and meaningful democracy and the kind of government the Filipino people deserve,” ani Aquino.

27/11/2025

Nanawagan si Senador Bam Aquino sa publiko na isantabi muna an kolor politika asin magkasararo sa laban kontra korapsyon sa tahaw kan isyu nin anomalya sa mga flood control projects kan gobyerno.

Tinawan-duon ni Aquino na an tunay na biktima kan korapsyon iyo an ordinaryong Pilipino, asin an mga kalamidad asin sistemikong kapalpakan dai naghihiling kung ano an pigpapanigan sa politika.

“Right now, an hapot, si isay an mga naghabon asin si isay an mga hinabunan. Idtong mga binabaha, bako man iyan pink, green, red, yellow, or whatever. An binabaha, an banwaan,” duon niya.

“It shouldn't just be kung bako ka kampi dyan, kampi ka digdi. Bako eh. It should be, si isay ba an naggibo kaini sa bansa ta asin si isay an banwaan na hinahabunan,” dagdag pa niya, sabay duon na dapat isantabi kan banwaan an politika huli ta mayong kolor an korapsyon.

Para ki Aquino, dapat ibalyo an urulay hali sa mga politiko pabalik sa mga tawong dapat nindang serbihan.

“Dapat arog kaiyan an way we should frame it. Huli ta, once you frame it back to the politician, it just becomes about politics again. And people tune out of politics,” sabi niya.

Dugang pa niya, dapat ipokus an isyu hali sa politika pasiring sa mga bagay na nakakaapekto sa mga nagbabayad nin buhis, sa saindang kinabukasan, asin sa kinabukasan kan presenteng asin masunod na henerasyon.

“This is beyond politics. It's about taxpayers, your future, and your children's future. You know, it's about things that affect us,” duon ni Aquino.

Bilang parte kan saiyang adbokasiya na pakusugon an transparency asin malikayan an pag-abuso sa kaban kan banwaan, pigduduso ni Aquino an saiyang panukalang Senate Bill No. 1506, an Citizen Access and Disclosure of Expenditures for National Accountability (CADENA) Act.

Sabi niya, katuyuhan kan panukala na mapatibay an transparency sa badyet kan gobyerno asin masigurado na an lambang piso nababantayan.

Sa irarom kan Senate Bill No. 1506, na bisto man bilang Blockchain the Budget Act, gabos na ahensya kan gobyerno obligado na i-upload asin mantinirhon an mga dokumento manungod sa badyet—kabali an mga kontrata, gastos sa proyekto, bills of materials, asin detalye kan procurement—sa sarong Digital Budget Platform. Naggagamit ini nin teknolohiyang dai madaling baguhon tanganing gibuhong transparent asin accessible sa publiko an bilog na proseso.

Kung maipasa bilang batas, sabi ni Aquino, an mga opisyal kan gobyerno na dai isasapubliko an mga dokumentong manungod sa badyet o tuyong mag-upload nin salang impormasyon aatubang sa administratibo asin kriminal na padusa.

"Panahon na para isabatas an CADENA Act tanganing masigurado na napupunta sa tama an pondong hali sa pinagpagalan kan satuyang mga kahimanwa," sabi ni Aquino.

26/11/2025

SENADOR AQUINO: PHP 1.38 TRILYON NA EDUCATION BUDGET, MASISIMBAGAN AN KAKULANGAN SA MGA CLASSROOM, MAPAPAKUSOG AN NUTRISYON KAN MGA ESTUDYANTE

Ikinaugma ni Senator Bam Aquino an P1.38 trilyon na pondo para sa edukasyon sa 2026 – an pinakadakula sa kasaysayan kan Pilipinas – na inapod niyang sarong tunay na education budget na makakatabang tanganing masimbagan an dakulaon na kakulangan sa mga classroom asin mapakusog an nutrisyon kan mga estudyante.

"Let me say that the work that the committee has put in the budget is really exemplary. Sa totoo lang po, maiaapod talagang education budget ining budget ta," pahayag ni Aquino sa plenary deliberations para sa budget kan Department of Education (DepEd).

"Ngunyan lang kita nakalaog sa 4 hasta 6 na porsyento na prescribed kan United Nations. An ibig sabihon kaini, nasa tamang paggatos kita pag-abot sa edukasyon," dagdag niya, na pigtutukoy an rekomendasyon kan UN na itaas an budget para sa edukasyon sa 4 hasta 6 na porsyento kan gross domestic product (GDP) kan nasyon.

Sinabi ni Aquino na nagtagama an Senado nin dagdag na P70 bilyon sa bersyon kaini kan 2026 national budget, na itinaas an pondo para sa pagpapatindog nin mga classroom gikan sa P13.2 bilyon sa National Expenditure Program (NEP) pasiring sa P65.9 bilyon, o P52.7-bilyon na paglangkaw.

Para sa nutrisyon kan mga estudyante, itinaas kan Senado an pondo kan school-based feeding program gikan sa P11.7 bilyon pasiring sa P28.6 bilyon, o P16.9-bilyon na paglangkaw.

"That’s really a huge amount. An ibig sabihon lang kaini, seryoso talaga kita sa pagsimbag sa problemang ini," sabi ni Aquino, na pigtutukoy an backlog na 165,000 na mga classroom na pwedeng umabot sa labi 200,000 sa laog kan tulong taon kun dai tulos aaksyunan.

"Ini po huli ta igwa kitang mga condemned classrooms, and every year that passes, there are more classrooms that are condemned because we have a rule that at 50 years, classrooms are condemned," dagdag niya.

Tinawan-duon ni Aquino, chairperson kan Senate Committee on Basic Education, na nagraraot an kamugtakan kan mga classroom huli sa linog, bagyo, asin iba pang natural na kalamidad, apwera pa sa padagos na pagdakol kan mga estudyanteng naglalaog sa pampublikong eskwelahan kada taon.

"Every year, igwa man kitang dagdag na mga estudyante na naglalaog sa satuyang mga eskwelahan. Garo kita igwang balde na pighihingua tang punuan pero may labot an balde kaya an pagmati ta, dai ta napupuno ining problema," sabi niya.

Tinawan niya nin duon na an bersyon kan Senado kan budget nagtutulod nin sarong marigon na solusyon sa backlog, na nagkakaipo nin haros P540 bilyon tanganing tulos na maresolba.

"I’m happy that for this year, we’re starting out with P65.9 billion. If in the next few years arog kaini kadakula asin mas dakula pa an popondohan ta, kaya ta ining ma-address. And we put six years as a target," sabi niya.

Ipapaautob an budget sa paagi kan manlain-lain na modalities, kaiba an yaon sa irarom kan Classroom-Building Acceleration Program (CAP) Act ni Aquino, na nagtataong-dalan sa DepEd na makipagtabangan sa mga local government units asin civil society organizations sa pagpapatindog nin classroom, pag-upa nin mga classroom, asin Public-Private Partnerships (PPP).

"Since this is the first year of our renewed push for classrooms, we can check every year which modality actually works the best. As the years go on, pigpopondohan ta an successful," sabi ni Aquino.

Inaghat man niya si DepEd Secretary Sonny Angara na magbugtak nin price cap para sa pagpapatindog nin classroom, kaiba an mga piggibo kan Department of Public Works and Highways asin kan mga PPP implementers.

"At the price of less than P2 million, we go from 23,000 to 32,000 (classrooms). If we’re able to address the disparity, mas dakol man an satong magigibo," sabi niya.

Pag-abot naman sa nutrisyon kan mga mag-aaram, sinabi ni Aquino na an mas halangkaw na pondo mapapahiwas kan school-based feeding program gikan 120 pasiring 200 feeding days.

"Gabos na Kinder, gabos na Grade 1, igwa kitang pagkakan para sa sainda for 200 days," sabi niya, asin sinambit na makikinabang digdi an haros 3.5 milyon na estudyante. Para sa Grade 2 hanggang Grade 6, an programa nakatutok sa mga wasted asin severely wasted learners.

"Ini pong budget na ini, ini an kapinunan. Hopefully, it can be a fresh start for our educational system. Basta nagtatabangan kita para sa satuyang mga kahubenan, I’m sure maaabot ta an pangarap ta para sa sainda," duon ni Aquino.

25/11/2025

Ipinagmalaki ni Senator Bam Aquino, Chairperson kan Senate Committee on Basic Education, an dakulang trayumpo para sa sektor kan edukasyon.

Tinawan-duon ni Aquino na an inusisang badyet sarong malinaw na kapangganahan para sa kabataang Pilipino asin direktang simbag sa education crisis na inaatubang kan nasyon.

"Ngonyan na banggi, nanggana an kabataang Pilipino," pahayag ni Aquino. "P**n pa kan kampanya sagkod sa pagbalik niato sa Senado, malinaw an satuyang katuyuhan: simbagan an krisis sa edukasyon asin ipaglaban an kaipuhan kan pamilyang Pilipino."

Ipinagmalaki man kan senador na ini an pinakahalangkaw na budget sa kasaysayan kan nasyon na itinalaan para sa sektor kan edukasyon.

Kaiba sa mga panginot na trayumpo na tinawan-duon ni Aquino an pagtagama nin sobra sa ₱65 bilyon para sa pagpatugdok nin mga silid-aralan sa tabang kan manlain-lain na institusyon. Katuyuhan kan pondong ini na mabawasan an classroom backlog asin tapuson an kalbaryo kan mga estudyante sa shifting schedules, siksikan, asin paggamit nin mga makeshift classrooms.

Paliwanag kan senador, kun durungan an pagpatugdok sa tamang panahon asin sa tamang presyo, mas marikas na masisimbagan an kakulangan sa imprastraktura.

Ipinagmalaki man ni Aquino an ₱26 bilyon na pondo para sa School-Based Feeding Program. P**n sa dating 150 days, pinahilawig na ini sa 200 days tanganing epektibong labanan an stunting asin malnutrisyon, asin masigurong mayong aking malaog sa eskwelahan na kumakalam an sikmura.

Siniguro man ni Aquino an bastanteng pondo para sa Libreng Kolehiyo na pakikinabangan kan sobra sa 5.6 milyong kabataan. Kaiba sa nasabing alokasyon an dugang na suporta asin allowance tanganing masigurong bako sanang makapag-adal kundi makapagtapos man an mga benepisyaryo.

Magigirumduman na si Aquino an panginot na nagduso kan Republic Act 10931, o an "Universal Access to Quality Tertiary Education Act" na nagtao nin libreng pag-adal sa mga pampublikong kolehiyo asin unibersidad sa bilog na nasyon.

Idineklara ni Aquino na an badyet na ini nagsasalamin sa prinsipyo nin tapat na pamamahala.

"Edukasyon, bakong korapsyon. Ini an kapinunan kan tunay na solusyon sa krisis sa edukasyon—an pinakahalangkaw na budget sa kasaysayan kan nasyon, itinalaan para sa kinabukasan kan kabataang Pilipino," sabi ni Aquino.

23/11/2025

Tolos na naghiro ang opisina ni Senador Bam Aquino tanganing maghatod nin tabang sa mga residenteng grabe ang naging perwisyo huli sa paghumba kan Bagyong Uwan sa probinsya. Nakapokus ang nasabing relief operation sa mga banwaan kan Pandan asin Baras, na saro sa mga nakaranas nin makusog na bagyo.

Sa pakikitabangan sa Department of Social Welfare and Development (DSWD), matrayumpong naipanao ang mga Family Food Packs sa gatos-gatos na pamilya sa nasabing mga lugar. Ang inisyatibong ini parte kan immediate response efforts kan senador tanganing masigurong igwang makakakan ang mga komunidad mantang nagpupuon pa sana ang proseso kan recovery.

Sigun sa opisina ni Senador Aquino, dae digdi nagtatapos ang saindang suporta. Padagos sindang nagmomonitor sa sitwasyon asin nakikipag-coordinate sa mga Local Government Units (LGUs) na nangangaipo nin tabang tanganing maaraman kung ano pa ang ibang pangangaipo kan mga residente.

Pigduon ni Aquino na prayoridad niya ang tolos na pagbangon kan mga Bicolano asin sinigurado na igwang suporta sindang aakuon gikan sa national government.

Bicol Daily

21/01/2026

19/01/2026

06/01/2026

10/12/2025

09/12/2025

03/12/2025

27/11/2025

26/11/2025

25/11/2025

23/11/2025

Address

Website

Alerts

Shortcuts

Share

Category