13/03/2026
3 Katao, Natagpuang Patay sa Lal-lo, Cagayan; Sasakyang Ginamit sa Insidente, Nabawi sa Camalaniugan
Camp Tirso H Gador Tuguegarao City – Natagpuang walang buhay ang tatlong indibidwal sa kahabaan ng Provincial Road sa Brgy. Sta. Teresa, Lal-lo, Cagayan bandang alas-2:00 ng hapon noong Marso 12, 2026.
Batay sa ulat, nakatanggap ng impormasyon ang mga tauhan ng Lal-lo Police Station mula sa isang concerned citizen hinggil sa tatlong hindi pa nakikilalang indibidwal na nakahandusay sa nasabing lugar. Agad na rumesponde ang mga pulis sa pangunguna ni PCPT GILBERT C COLUMNA, Deputy Chief of Police ng Lal-lo Police Station, upang beripikahin ang nasabing ulat.
Pagdating sa lugar, natagpuan ng mga awtoridad ang dalawang bangkay na nakahandusay sa gitna ng kalsada habang ang isa naman ay natagpuan sa irrigation canal malapit sa lugar. Sa isinagawang paunang imbestigasyon, napag-alaman na ang mga biktima ay pawang residente ng Tuguegarao City, kung saan dalawa sa kanila ay mag-asawa at ang isa ay kapatid ng lalaking biktima.
Ayon sa mga awtoridad, ang mga biktima ay nagtamo ng ilang tama ng bala sa iba’t ibang bahagi ng kanilang katawan. Ang kanilang mga labi ay dinala na sa EM Funeral Services sa Maxingal, Lal-lo, Cagayan para sa isasagawang post-mortem examination ng Medical Doctor mula sa RHU Lal-lo.
Sa pagpapatuloy ng imbestigasyon, bandang alas-2:15 ng hapon ng parehong araw ay nabawi ng mga awtoridad ang sasakyang ginamit sa pagtransport ng mga biktima. Ang sasakyan, na isang Toyota Vios ay natagpuan na abandonado sa kahabaan ng Provincial Road sa Brgy. Abagao, Camalaniugan, Cagayan, humigit-kumulang 15 kilometro ang layo mula sa crime scene.
Batay sa imbestigasyon, dalawang saksi na kapatid ng dalawang lalaking biktima ang nagbigay ng mahalagang impormasyon. Ayon sa kanila, dapat ay kasama sila sa biyahe ng mga biktima patungong Grupo Medico De Dios Hospital sa Brgy. Bulala, Camalaniugan, Cagayan, subalit naiwan sila sa napagkasunduang lugar dahil hindi na sila magkasya sa loob ng sasakyan. Naganap umano ang maikling negosasyon sa harap ng nasabing ospital bago ang insidente.
Samantala, dalawang karagdagang saksi, kapwa construction workers at residente ng Lal-lo, Cagayan, ang nagsalaysay na nakita nila ang nabanggit na Toyota Vios na dumaan mula sa silangang direksyon at biglang nag-U-turn malapit sa kanilang bunkhouse. Ayon sa kanila, bumaba ang dalawang lalaki mula sa sasakyan at hinila palabas ang tatlong bangkay mula sa loob ng sasakyan bago iniwan sa kahabaan ng kalsada sa Brgy. Sta. Teresa.
Sa crime scene, nakarekober ang mga awtoridad ng isang fired bullet na natagpuan sa ilalim ng bangkay ng babaeng biktima. Sa isinagawang forensic processing sa abandonadong sasakyan ng Provincial Forensic Unit na pinangunahan ni PCPT ELVIS BACUD, natagpuan sa loob ng sasakyan ang dalawang fired bullets o slugs, limang fired cartridge cases na pinaniniwalaang mula sa .45 caliber firearm, mga bakas ng dugo, at ilang personal na gamit.
Nang ipakita sa mga saksi ang nasabing sasakyan, kanilang kinumpirma na ito ang parehong sasakyang kanilang ginamit mula Tuguegarao City patungong Grupo Medico De Dios Hospital sa Camalaniugan.
Sa kasalukuyan, tinitingnan ng mga awtoridad na robbery ang posibleng motibo ng krimen matapos mapag-alaman na nawawala ang halagang ₱1,100,000 na cash at isang Samsung Android cellular phone na pagmamay-ari ng babaeng biktima.
Patuloy ang follow-up investigation, CCTV backtracking, at hot pursuit operations ng Lal-lo Police Station katuwang ang iba pang law enforcement units kabilang ang Regional Intelligence Division 2 (RID2), Cagayan Provincial Intelligence Unit (PIU), Regional Intelligence Unit 2 (RIU2), Provincial Mobile Force Company (PMFC), at Regional Mobile Force Battalion (RMFB) upang madakip ang mga suspek sa insidente.
Samantala, nanawagan naman ang Provincial Director, PCOL MARDITO G ANGULUAN, sa lahat ng operatiba na paigtingin ang ginagawang imbestigasyon at agad na matukoy at maaresto ang mga responsable sa krimen.
Ayon sa kanya, “Mahigpit kong ipinag-uutos sa lahat ng concerned units na magsagawa ng mas pinaigting na follow-up investigation at hot pursuit operations upang agad na maresolba ang kasong ito. Hindi tayo titigil hangga’t hindi napapanagot ang mga nasa likod ng karumal-dumal na krimeng ito at maibigay ang hustisya sa mga biktima at kanilang mga pamilya.”
CTTO
Cagayan Police Provincial Office
.
