S'bang Ka Mindanao (2025)

15/08/2025

📣 Panoorin at pakinggan ang Ika-labing-apat na Episode ng 𝑺𝒖𝒘𝒂𝒓𝒂 𝑲𝒂𝒎𝒃𝒂𝒚𝒂𝒃𝒂𝒚𝒂!

📻 Sa episode na ito, tinalakay natin ang Pre-Election Insights at Voter Education para sa kauna-unahang parliamentary elections sa BARMM isang makasaysayang yugto para sa Bangsamoro.

🎯Layunin nitong maghatid ng mahalagang impormasyon at magsilbing panawagan para sa responsableng, may kaalaman, at may prinsipyo na pakikilahok sa halalan.

👥Kasama natin sina Youth Patrollers Alliana Fiona Mamogcat at Haifa Bantas, na nagbahagi ng kanilang pananaw sa kahalagahan ng boto, paglaban sa vote-buying, at pagsusulong ng mapayapang halalan.

🔊Makinig at maki-join tuwing sabado ng umaga, mula 10:00am hanggang 11:00am sa D’Empire 104.3 Radio DXBM.

👍I-follow at i-like ang S'bang Ka Mindanao and S'bang Ka Maguindanao upang maging updated sa mga susunod na episodes.

📲May mga gusto ka bang itanong o talakayin? Mag-text sa 0916-1605-597 o mag-chat sa aming page.

_________________________________________

Ang 𝑺𝒖𝒘𝒂𝒓𝒂 𝑲𝒂𝒎𝒃𝒂𝒚𝒂𝒃𝒂𝒚𝒂 radio broadcasting program sa North Cotabato ay parte ng proyektong na nagsusulong ng kapayapaan sa BARMM sa pamamagitan ng pagpapalakas ng mga boses, pagsiguro ng pag-unlad, at pagbibigay ng dialogue platforms para sa mga komunidad na apektado ng conflict.

14/08/2025

𝗛𝗮𝗹𝗼𝘀 𝟱𝟬𝟬 𝗞𝗮𝗯𝗮𝘁𝗮𝗮𝗻 𝘀𝗮 𝗕𝘂𝘁𝗶𝗴, 𝗟𝗮𝗻𝗮𝗼 𝗱𝗲𝗹 𝗦𝘂𝗿, 𝗡𝗮𝗴𝗽𝗮𝗿𝗲𝗵𝗶𝘀𝘁𝗿𝗼 𝗽𝗮𝗿𝗮 𝘀𝗮 𝗕𝗦𝗞𝗘 𝟮𝟬𝟮𝟲

Matagumpay na natapos ang sampung araw na voters' registration sa Butig, Lanao del Sur, na nagtapos noong Agosto 10, 2025. Tinatayang halos 500 residente ang nakapagparehistro, na karamihan ay mga kabataan dahil sa kagustuhang makaboto na sa darating na Barangay at Sangguniang Kabataan Election 2026. Para masiguro ang maayos na proseso, nagtakda ang mga awtoridad ng partikular na araw para sa bawat barangay. Ngunit sa huling araw ng pagpaparehistro, nagkaroon ng general registration na bukas para sa lahat ng mga residente.

Ang pagpaparehistrong ito ay pangunahing layunin na ihanda ang mga botante para sa gaganaping BSKE 2026. Nilinaw ni Adam Hadji Amer, chairman ng Barangay Bayabao Poblacion, na ang mga bagong rehistradong botante ay hindi pa makakaboto sa nalalapit na kauna-unahang Bangsamoro Parliamentary Election "Hindi makakaboto ang mga nag-register ngayon sa paparating na BARMM election dahil sa Barangay election lang sila pwede nang makakaboto," paliwanag ni Chairman Amer.

Isa sa mga bagong rehistradong botante ay si Omelkhair Omar, 18 taong gulang, na unang beses pa lamang boboto. "Excited po ako kasi ito ang unang pagkakataon ko na makakaboto. Sana makapili ako ng mga lider na magbibigay-pansin sa kabataan," sabi ni Omar, na nagpapakita ng pag-asa para sa mas magandang kinabukasan ng mga kabataan sa kanilang lugar.

Inaasahang ilalabas ng Commission on Elections (COMELEC) ang opisyal na listahan ng mga bagong botante matapos ang pagsusuri at pag-apruba sa mga susunod na buwan. Patuloy na inaanyayahan ang lahat ng mga residente na makilahok sa mga darating na eleksyon upang masiguro ang maayos at tapat na pagpili ng mga lider ng kanilang komunidad.

✍️ Sittie Rasnah M. Samsoden, S'bang Ka Mindanao Patroller

14/08/2025

𝗩𝗼𝘁𝗲𝗿 𝗥𝗲𝗴𝗶𝘀𝘁𝗿𝗮𝘁𝗶𝗼𝗻 𝘀𝗮 𝗠𝗮𝗴𝘂𝗶𝗻𝗴, 𝗟𝗮𝗻𝗮𝗼 𝗱𝗲𝗹 𝗦𝘂𝗿, 𝗠𝗮𝘁𝗮𝗴𝘂𝗺𝗽𝗮𝘆 𝗻𝗮 𝗡𝗮𝗶𝘀𝗮𝗴𝗮𝘄𝗮 𝘀𝗮 𝗚𝗶𝘁𝗻𝗮 𝗻𝗴 𝗣𝗮𝗴𝗽𝗮𝗽𝗮𝗹𝗶𝗯𝗮𝗻 𝗻𝗴 𝗕𝗦𝗞𝗘

Dumagsa ang mga residente, lalo na ng mga kabataan, sa voter registration na idinaraos sa Maguing, Lanao del Sur noong August 1 hanggang August 10, 2025. Sa kabila ng pagpapaliban ng Barangay at Sangguniang Kabataan Elections (BSKE) sa 2026, nananatiling aktibo at organisado ang proseso ng pagpaparehistro para sa darating na halalan sa Bangsamoro Autonomous Region in Muslim Mindanao (BARMM).

Ayon kay COMELEC Election Officer Ansari C. Macapundag, matagumpay ang pagpapatakbo ng voter registration na nagsimula noong Agosto 1, 2025. Aniya, umaabot sa 160 hanggang 200 katao ang nairerehistro araw-araw. Bunsod nito, tinatayang nasa 1,440 hanggang 1,800 katao na ang naitala sa loob ng sampung araw. Pinananatili naman ng Philippine National Police (PNP) at Armed Forces of the Philippines (AFP) ang kaayusan at seguridad sa lugar upang matiyak ang kaligtasan ng mga nagpaparehistro.

Isa sa mga bagong rehistrado ay si Ginoong Hafidh Bagul, na ngayon ay unang beses boboto. “Excited ako na makaboto sa kauna-unahang pagkakataon. Nais kong marinig ang boses ng kabataan sa pagpili ng mga lider,” ani Bagul. Naniniwala siyang mahalagang hakbang ito para maging bahagi ng mahalagang desisyon para sa kinabukasan ng kanilang rehiyon.

Batay sa obserbasyon ng COMELEC, karamihan sa mga nagpaparehistro ay nasa hanay ng mga kabataan na naghahangad na magkaroon ng boses sa pamamahala. Tiniyak naman ng COMELEC na handa sila sa malinis at mapayapang halalan sa pamamagitan ng pagbibigay ng voter education at pagpapanatili ng maayos na sistema sa registration site.

Layunin ng mga bagong botante na magkaroon ng mas malawak na boses para sa kaunlaran ng kanilang bayan at ng buong BARMM, sa kabila ng desisyon ni Pangulong Ferdinand "Bongbong" Marcos Jr. na i-anunsyo ang extension ng BSKE sa Nobyembre 2026. Ang pagpaparehistro ay mahalaga pa rin para sa iba pang paparating na eleksyon sa rehiyon

✍️ Pidi P. Panondi, S'bang Ka Marawi Patroller

14/08/2025

𝗣𝗮𝗴𝗵𝗶𝗻𝘁𝗼 𝘀𝗮 𝗟𝗮𝗵𝗮𝘁 𝗻𝗴 𝑾𝗮𝗹𝗮𝗻𝗴 𝗣𝗲𝗿𝗺𝗶𝘁 𝗻𝗮 𝗤𝘂𝗮𝗿𝗿𝘆 𝘀𝗮 𝗟𝗮𝗻𝗮𝗼 𝗱𝗲𝗹 𝗦𝘂𝗿, 𝗜𝗽𝗶𝗻𝗮𝗴-𝘂𝘁𝗼𝘀 𝗻𝗶 𝗚𝗼𝘃. 𝗔𝗱𝗶𝗼𝗻𝗴 J𝗿.

Bilang tugon sa tumataas na bilang ng mga ilegal na operasyon ng quarry, ipinag-utos ni Governor Mamintal Adiong Jr. ang agarang paghinto sa lahat ng operasyon sa buong lalawigan na walang kaukulang permit mula sa Provincial Mining Regulatory Board (PMRB). Ang direktiba ay ipinatupad epektibo noong Setyembre 1, 2025, sa pamamagitan ng Executive Order 008, Series of 2025, na nilagdaan ng gobernador noong Huwebes, Hulyo 31.

Ayon sa gobernador,, malaking problema ang patuloy na pagdami ng mga ilegal at hindi reguladong quarrying dahil unti-unti nitong sinisira ang kapaligiran at nauubos ang likas na yaman, na nagdudulot ng banta sa kaligtasan ng publiko.
Isa sa mga partikular na pinagtutuunan ng pansin ng gobernador ay ang pagkasira ng kalikasan. Upang maiwasan ang pagbaha at pagguho ng lupa, ipinag-utos niya na ang bawat punong pinuputol dahil sa quarrying ay kailangan palitan sa pamamagitan ng pagtatanim.

Binanggit din ni Gov. Adiong na mayroong biglang pagtaas sa interes sa pagmimina ng mga likas na yaman, na makikita sa dumaraming aplikasyon para sa mga permit sa buong probinsya. Ikinonekta niya ito sa paglago ng mga proyekto sa imprastraktura at muling pagtatayo ng mga tahanan sa Marawi City.

Isa ang Munisipalidad ng Masiu sa may pinakamaraming aplikasyon para sa quarry permit, na may 15 sa kabuuang 43 na aplikasyon sa buong lalawigan.

Ibinahagi naman ni Pili Papandayan, Provincial Environment and Natural Resources Officer, na kabilang sa mga karaniwang lugar ng quarrying ang mga bayan ng Kapatagan, Balabagan, Malabang, Picong, Marogong, Butig, Masiu, Bubong, Kapai, Tagoloan, Mulondo, Wao, Tugaya, Bacolod-Kalawi, Madalum, at Madamba. Idinagdag pa ni Papandayan na dati ring may mga quarry site sa Marawi City, ngunit tuluyan na itong ipinasara.

Binigyan rin ni Gov. Adiong ang mga local government units, PNP , at militar ng sapat na panahon bago ang pagpapatupad ng kautusan upang masiguro na matitigil ang lahat ng ilegal na operasyon. Ang kautusan ay sumasaklaw sa lahat ng uri ng pagkuha ng mineral at malawakang quarrying ng buhangin at graba na walang pahintulot mula sa kanyang tanggapan.

✍️Norlainie A. Pascan, S'bang Ka Marawi Patroller

12/08/2025

ICYMI: As local journalism continues to play a vital role in communities long overlooked, the S’Bang Ka Core Group stripped their reporting down to its core and confronted what truly drives it during a vision-mapping session on August 1 in Iligan City.

Participants wrestled with identity whether to remain hyperlocal storytellers, unite as a single Mindanao voice, or shape a new model that does both. The conversation moved beyond branding, zeroing in on survival, impact, and integrity.

Next, they tackled ethics. With international newsroom codes on one side and the realities of their own communities on the other, they challenged the assumption that global standards fit all contexts. In response, they began drafting a homegrown code anchored in truth-telling, cultural sensitivity, and accountability to the people they serve.

For many, this activity was a reckoning with the consequences of their work. Weam Solomon, a Sulu patroller, captured the stakes clearly.

“We’re not just here to report what’s happening. We’re here to ask why it matters and who pays the price if we get it wrong.”

______
📝 Co-organized with Probe Media Foundation, Inc. and Probe, in partnership with IMS (International Media Support), and funded by the European Union and the Danish Ministry of Foreign Affairs, this initiative supports the S’Bang Ka Core Group in becoming powerful agents of truth in their communities.

📌 This activity is part of , supported by the Global Community Engagement and Resilience Fund (GCERF).

12/08/2025

‘BARMM Without Sulu: Fragmenting Autonomy?’ Tinalakay sa UP Diliman

QUEZON CITY — Muling nabuhay ang diskusyon ukol sa pagkalas ng lalawigan ng Sulu sa Bangsamoro Autonomous Region in Muslim Mindanao (BARMM) sa isang forum na pinamagatang “BARMM Without Sulu: Fragmenting Autonomy?” sa Unibersidad ng Pilipinas (UP) Diliman noong Agosto 11.

Tinalakay ng mga tagapagsalita ang malalim na implikasyon ng hindi pagsama ng Sulu sa BARMM. Nilinaw din nila na ito ay desisyong hindi ginawa ng Korte Suprema, kundi resulta ng 2019 plebisito kung saan tinanggihan ng mga taga-Sulu ang pagsali sa rehiyon. Lumitaw sa forum na maaaring epekto ito ng kakulangan sa tiwala, impormasyon, at benepisyong naranasan ng lalawigan mula sa BARMM at pambansang pamahalaan.

𝗣𝗮𝗴𝗸𝗮𝗸𝗮𝗸𝗶𝗹𝗮𝗻𝗹𝗮𝗻 𝗮𝘁 𝗣𝗮𝗴𝗸𝗮𝗵𝗶𝘄𝗮𝗹𝗮𝘆
Itinuturing ng maraming Tausug na ang kanilang kasaysayan at kultura ay bukod-tangi. Ito ay matagal nang hinubog ng Sultanato ng Sulu, na isa sa mga unang sentro ng Islam at sariling pamahalaan sa Mindanao.

Sa kasalukuyan, ang paglipat ng Sulu sa Region IX (Zamboanga Peninsula) ay tinitingnang isang cultural mismatch, dahil ito’y rehiyong may kolonyal at Kristiyanong impluwensya na taliwas sa pinagmulan ng mga Tausug.

Ayon kay Prof. Henry Solomon ng Western Mindanao State University, layunin ng Bangsamoro na pag-isahin ang 13 Moro ethnolinguistic groups sa ilalim ng isang sistemang nagbibigay ng makabuluhang partisipasyon sa pambansang pamahalaan. Ngunit para sa ilan, hindi sapat ang pagkakaisang ito kung hindi kinikilala ang natatanging kasaysayan ng mga Tausug.

May iba ring pananaw na mas epektibong isulong ang pambansang pagkakaisa kung ikalat ang mga komunidad ng Muslim sa mga rehiyong mayoryang Kristiyano, tulad ng Region IX. Sa ganitong paraan, magkakaroon ng mas diretsong ugnayan sa pagitan ng Muslim at Kristiyanong populasyon na isang hakbang patungo sa assimilation o pagpapaloob sa mas malawak na lipunang Pilipino.

Ayon sa pananaw na ito, mas maliit ang panganib sa pambansang pagkakaisa kung hindi pagsasama-samahin sa iisang rehiyon ang mga lugar na may malaking populasyong Muslim. Sa halip na konsentrasyon, mas isinusulong ang integrasyon ng mga Muslim sa mas malawak na lipunang Pilipino.

Binigyang-diin naman ni Prof. Darwin Absari, propesor ng UP Institute of Islamic Studies, na dapat itong isagawa sa paraang nakaugat sa lokal na pananaw at hindi sa banyagang lente.

"Engage them from the indigenous philosophy of kapwa and not from the western lens,” wika niya.

Aniya, ang tunay na pagkilala sa mga Tausug at iba pang Moro ay dapat nakaugat sa lokal na kultura, gamit ang konsepto ng “kapwa”, ang pakikibahagi, paggalang, at pag-unawa sa kapwa bilang kapantay.

𝗣𝗼𝘀𝗶𝗯𝗶𝗹𝗶𝗱𝗮𝗱 𝗻𝗴 𝗣𝗮𝗴𝗹𝗶𝗸𝗵𝗮 𝗻𝗴 “𝗕𝗮𝗻𝗴𝘀𝗮 𝗦𝘂𝗴”
Iminungkahi naman ni Atty. Ancheta K. Tan, isang Tausug-Chinese, ang pagkakaroon ng hiwalay na Bangsamoro autonomous region para sa lalawigan ng Sulu, na tinawag niyang “Bangsa Sug.” Ayon sa kanya, hindi makatwiran ang pagsubok na pag-isahin ang lahat ng Moro tribes sa iisang rehiyon tulad ng BARMM, at kailangang kilalanin ang natatanging identidad ng mga Tausug.

Gayunpaman, iginiit sa talakayan na bagama’t lehitimo ang hangaring ito, hindi ito dapat isakatuparan kapalit ng pagkakaisa ng buong Bangsamoro. Ang awtonomiya ay bunga ng mahabang pakikibaka at pagkilala sa batas, gaya ng Republic Act No. 11054 (Bangsamoro Organic Law) at mga desisyon ng Korte Suprema.

Nilinaw din ng Korte na ang pagiging Bangsamoro ay hindi ipinipilit, at bawat tribo, kabilang ang mga Tausug, ay may karapatang panatilihin ang kanilang sariling kultura at pagkakakilanlan.

Ayon pa sa Article X Section 15 ng 1987 Konstitusyon, bagama’t pinapahintulutan nito ang paglikha ng mga rehiyong awtonomo sa Muslim Mindanao at Cordillera, hindi ito nagpapahintulot ng autonomous region para lamang sa isang lalawigan. Sa halip, kinakailangang ito’y binubuo ng mga “provinces, cities, municipalities, and geographical areas” na may magkakatulad na katangian. Kaya’t ang mungkahing “Bangsa Sug” na hiwalay na rehiyon para lamang sa Sulu ay walang malinaw na batayan sa Saligang Batas.

Sa halip na paghiwalay, iminungkahi ng ilang tagapagsalita na ang pagkilala sa Bangsa Sug ay maaaring isakatuparan sa loob ng BARMM mismo, sa pamamagitan ng inklusibong pamumuno at mas malawak na representasyon. Nanawagan sila sa liderato ng BARMM, partikular sa Moro Islamic Liberation Front (M**F) na karamihan ay mula sa Maguindanao, na mas pagtuunan ang pagkakabuo ng isang rehiyong tunay na sumasalamin sa lahat ng Moro kasama ang Sulu at mga karatig lalawigan gaya ng Basilan at Tawi-Tawi.

𝗣𝗮𝗻𝗮𝘄𝗮𝗴𝗮𝗻𝗴 𝗛𝘂𝘄𝗮𝗴 𝗜𝘄𝗮𝗻 𝗮𝗻𝗴 𝗦𝘂𝗹𝘂
Para kay Hadja Nur-Ainee Tan Lim, Deputy Minister ng Ministry of Social Services and Development (MSSD) at anak ni Hji. Nur Misuari, hindi magiging buo ang BARMM kung wala ang Sulu.

Aniya, ang pagbabalik ng Sulu sa Bangsamoro ay hindi simpleng political reintegration, kundi pagkilalang may lugar pa rin ang mga nadismaya o nawalan ng tiwala.

“It is not wise for BARMM to let go of Sulu easily. Once autonomy is fragmented one piece at a time, then it will become a reason for other provinces to follow suit,” ani Tan Lim.

Nagbabala rin siya na kung hindi kikilos ang BARMM para muling akitin at isama ang Sulu, maaaring masira ang pundasyon ng awtonomiya.

Panawagan niya sa pamahalaang Bangsamoro na magbukas ng bukas na diyalogo, makinig nang tunay, at kilalanin ang natatanging karanasan ng Sulu hindi sa pamimilit, kundi sa pakikipagkapwa. Ipinunto niya na ang usaping ito ay tungkol sa pananagutan at pagkakapatiran sa loob ng Bangsamoro.

Ang mga Tausug ay kabilang sa mga unang aktibong kalahok sa mga kilusang Moro para sa kalayaan. Sila ay naging bahagi ng mga mahahalagang yugto—mula sa armadong pakikibaka hanggang sa mga usaping pangkapayapaan—na nagdala sa pagkakatatag ng BARMM.

“When the time came for the Bangsamoro, Tausugs were there. Now that we need the BARMM, we will wait for them to fight for us. It is their time to use whatever voice, power, and influence they have to bring us back in.”

06/08/2025

𝗖𝗢𝗠𝗘𝗟𝗘𝗖, 𝗡𝗮𝗴𝗹𝘂𝗻𝘀𝗮𝗱 𝗻𝗴 𝗠𝗼𝗰𝗸 𝗘𝗹𝗲𝗰𝘁𝗶𝗼𝗻 𝘀𝗮 𝗕𝘂𝘁𝗶𝗴 𝗽𝗮𝗿𝗮 𝘀𝗮 𝗞𝗮𝘂𝗻𝗮-𝗨𝗻𝗮𝗵𝗮𝗻𝗴 𝗕𝗔𝗥𝗠𝗠 𝗣𝗮𝗿𝗹𝗶𝗮𝗺𝗲𝗻𝘁𝗮𝗿𝘆 𝗘𝗹𝗲𝗰𝘁𝗶𝗼𝗻 𝘀𝗮 𝗥𝗲𝗵𝗶𝘆𝗼𝗻

Upang masiguro ang kaayusan at kahandaan ng Lanao del Sur para sa kauna-unahang Bangsamoro Autonomous Region in Muslim Mindanao (BARMM) Parliamentary Election, nagsagawa ang Commission on Elections (COMELEC) ng isang field test monitor noong July 19, 2025 at mock election noong July 26, 2025 sa munisipalidad ng Butig.

Isinagawa ito sa Dianaton Naim Elementary School at Butig National High School. Dinaluhan rin ito ng mga kinatawan mula sa COMELEC, local media, LGU-Butig at mga kinatawan mula sa Legal Network for Truthful Elections (LENTE).

Layunin ng pagsasanay na tiyakin ang maayos na operasyon ng mga Automated Counting Machines (ACMs) at tama ang mga resultang inilalabas ng mga ito. Inobserbahan din ang proseso ng pagboto, pag-canvas ng mga balota, at kung paano naitatala at naililipat ang mga resulta ng boto. Isa sa mga pinaka-pinagtuunan ng pansin ay ang proseso kung paano maipapadala ang mga balota sa mga service center.

Kabilang sa mga nakilahok ang ilang estudyante mula sa Butig National High School. Isa sa kanila, si Juhaiber Pacalundo, na nagbahagi ng kanyang pananaw tungkol sa kahalagahan ng mock election. Aniya, mahalaga ito dahil "dito nasusuri ang tamang proseso ng pagboto, makikita kung paano ginagamit ang ACM at ano ang mga posibleng isyu na maaaring mangyari o lumitaw sa actual po na eleksyon."

Sa bawat paaralan, mayroong 50 test voters na lumahok upang subukin ang buong proseso ng pagboto. Naging mahalaga ang kanilang partisipasyon upang matukoy ang anumang posibleng problema na posibleng mangyari sa kasagsagan ng halalan.

Inaasahang magkakaroon ng isa pang final field test monitor sa lugar upang mas higit pang mapabuti ang sistema at mapanatili ang integridad at kaayusan ng halalan sa sa BARMM region.

✍️ Sittie Rasnah M. Samsoden, S'bang Ka Mindanao Patroller

06/08/2025

📣 Panoorin ang Ika-labing tatlo na Episode ng 𝑺𝒖𝒘𝒂𝒓𝒂 𝑲𝒂𝒎𝒃𝒂𝒚𝒂𝒃𝒂𝒚𝒂!

📻 Sa episode na ito ay sinamahan tayo ni Ma’am Laila Ampat, isang Moro Muslim woman advocate, peacebuilder, at tagapagsulong ng karapatan ng kababaihan, upang talakayin ang mahalagang papel ng kababaihan sa nalalapit na unang parliamentary election sa Bangsamoro Autonomous Region in Muslim Mindanao (BARMM).

📻 Layunin ng episode na ito ang ipakita ang pananaw ng kababaihan sa pagpili ng mga lider, pagbibigay ng tamang representasyon, at pagpapalakas ng boses ng kababaihan at kabataan sa mga usaping pampulitika, panlipunan, at pangkaunlaran.

📻 Ibinahagi rin ni Ma’am Laila ang kanyang karanasan bilang isang aktibong kababaihan sa Bangsamoro. Sa panayam, kanyang tinalakay ang kahalagahan ng partisipasyon ng kababaihan at kabataan sa halalan bilang mahalagang bahagi ng pagtataguyod ng isang makatarungan at inklusibong lipunan. Binigyang diin niya ang mga katangiang dapat taglayin ng isang lider, gaya ng pagiging makadiyos, may malasakit sa kapwa, at may konkretong plataporma para sa bayan. Ayon sa kanya, may malaking papel ang kababaihan sa pagpapalaganap ng moral governance sa rehiyon, at kailangan ding bantayan ang epekto ng fake news at propaganda sa paghubog ng desisyon ng mga botante. Ipinunto rin niya ang mga isyung nararapat unahin ng mga lider partikular ang edukasyon, hanapbuhay, mental health, at access to justice bilang mga pangunahing pangangailangan ng mamamayang Bangsamoro.

🔊Makinig at maki-join tuwing sabado ng umaga, mula 10:00am hanggang 11:00am sa D’Empire 104.3 Radio DXBM.

👍I-follow at i-like ang S'bang Ka Mindanao and S'bang Ka Maguindanaoupang maging updated sa mga susunod na episodes.

📲May mga gusto ka bang itanong o talakayin? Mag-text sa 0916-1605-597 o mag-chat sa aming page.
____________________________________________
Ang 𝑺𝒖𝒘𝒂𝒓𝒂 𝑲𝒂𝒎𝒃𝒂𝒚𝒂𝒃𝒂𝒚𝒂 radio broadcasting program sa North Cotabato ay parte ng proyektong na nagsusulong ng kapayapaan sa BARMM sa pamamagitan ng pagpapalakas ng mga boses, pagsiguro ng pag-unlad, at pagbibigay ng dialogue platforms para sa mga komunidad na apektado ng conflict.

05/08/2025

‘Our doors will never close’ — Bangsamoro Government
✍🏽 Eunicito Barreno, S’Bang Ka Mindanao Core Producer

COTABATO CITY — Ipinahayag ng Bangsamoro Government na kinikilala nito ang Executive Order No. 91 na nilagdaan ni Pangulong Ferdinand Marcos Jr. noong Hulyo 31, 2025. Ang kautusan ay naglilipat sa lalawigan ng Sulu mula sa Bangsamoro Autonomous Region in Muslim Mindanao (BARMM) patungong Region 9 o Zamboanga Peninsula.

Ang kautusang ito ay alinsunod sa desisyon ng Korte Suprema na tanggalin ang Sulu mula sa BARMM matapos nitong tumutol sa ratipikasyon ng Bangsamoro Organic Law (BOL) noong 2019 plebisito.

“As we proceed with the transition, our foremost priority is to ensure that services will be unhampered. We have and will continue working closely with the National Government and the concerned agencies to facilitate a smooth, orderly, and respectful transition that does not disrupt essential public services. Education, healthcare, social assistance, and all other government support must continue without interruption for the people of Sulu,” saad ng Bangsamoro Government sa isang pahayag.

Giit ng Bangsamoro Government, bagama’t mabigat ang desisyon para sa maraming taga-Sulu, igagalang nito ang legal na proseso at mananatiling katuwang sa mapayapang transisyon.

Patuloy din ang panawagan ng pamahalaang rehiyonal para sa pagkakaisa at pag-unawa mula sa mga mamamayan. Tiniyak nito na isusulong pa rin ang kapakanan ng mga Bangsamoro saan mang bahagi sila naroroon.

“Our doors will never close,” saad pa ng pahayag.

05/08/2025

Lalawigan ng Sulu, Inilipat na sa Region IX

Pormal nang inilipat ang lalawigan ng Sulu sa Region IX o Zamboanga Peninsula mula sa Bangsamoro Autonomous Region in Muslim Mindanao (BARMM), base sa Executive Order No. 91 na pinirmahan ni Pangulong Ferdinand “Bongbong” Marcos Jr. noong Hulyo 31, 2025.

Ang desisyon ay kasunod ng pasya ng Korte Suprema na kinatigan ang apela ng Sulu na hindi ito kabilang sa BARMM matapos tutulan ng probinsya ang pagpapatibay ng Bangsamoro Organic Law noong 2019.

Bilang bahagi ng pagsasakatuparan nito, binuo rin ang isang technical working group na pamumunuan ng Executive Secretary upang pangasiwaan ang pagpapatupad ng buong proseso ng paglipat ng lalawigan sa Region IX.

04/08/2025

Panibagong operasyon kontra-droga isinagawa sa Datu Piang, isang taon matapos ang drug bust
✍🏽 John Ray Garcia, S’Bang Ka Mindanao Core Producer

Datu Piang, Maguindanao del Sur — Isinagawa noong Hulyo 31, 2025, ang panibagong operasyon laban sa ilegal na droga sa mga barangay ng Poblacion at Kanguan, makalipas ang halos isang taon mula nang makasamsam ng higit P1 milyong halaga ng hinihinalang shabu sa nasabing bayan.

Nabahala ang ilang residente sa muling presensya ng mga lugar na sinasabing dating ginagamit sa ilegal na gawain. Sa isinagawang inspeksyon, natuklasan ang tatlong abandonadong drug den at drug paraphernalia, na agad iniulat sa mga kinauukulan.

Sa kabila ng pangamba, positibo ang naging tugon ng komunidad sa ikinasang hakbang.

“Maayos po na may ganitong programa, kasi napakarami na pong krimen na may koneksyon sa droga dito sa bayan namin,” ayon kay Norhaya Delis, residente ng Barangay Poblacion.

Aniya, matagal nang suliranin sa kanilang lugar ang ilegal na droga at may epekto ito sa seguridad ng buong komunidad.

Hiling naman ng estudyanteng si Benladin Dalagunan ang tuloy-tuloy na mga hakbang upang mapigilan ang pagkalulong ng mga kabataan sa masasamang bisyo.

“Sana palaging may ganitong mga aktibidad para hindi na tularan ng kabataan ang paggamit ng droga at mailayo sila rito,” ani Dalagunan.

Ang kampanya ay bahagi ng pagpapatupad ng lokal na ordinansyang “Ato Ka Datu Piang: Droga, Kabanegkaw, Haram!” (Lumaban ka, Datu Piang: Droga, Pagnanakaw, Bawal!) na naglalayong pagtibayin ang paninindigan ng mamamayan laban sa droga at kriminalidad.

Ang operasyon ay isinagawa ng pinagsanib na puwersa ng Philippine Drug Enforcement Agency – Bangsamoro Autonomous Region in Muslim Mindanao (PDEA-BARMM), Philippine National Police (PNP), Armed Forces of the Philippines (AFP), at mga miyembro ng Moro Islamic Liberation Front (M**F).

Nanawagan ang mga awtoridad sa publiko na patuloy na makipagtulungan sa pamamagitan ng agarang pag-uulat ng anumang aktibidad na may kaugnayan sa droga at krimen sa kanilang komunidad.

04/08/2025

Mga residente ng Sitio Marihangin, tagumpay sa pagpapaalis sa mga armadong guwardiya ng San Miguel Corporation
✍🏽 Eunicito Barreno, S’Bang Ka Mindanao Core Producer

Bugsuk, Palawan — Sa bisa ng dua o tradisyonal na panalangin at pag-aalay sa sagradong puno ng isla, ipinagdiwang ng mga katutubong Molbog, Cagayanen, at Palaw’an ang kanilang tagumpay sa pagpapaalis ng mga armadong guwardiya ng San Miguel Corporation (SMC) mula sa Sitio Marihangin, Bugsuk, Palawan noong Agosto 1.

Bilang bahagi ng selebrasyon, isinagawa rin ng mga katutubo ang ritwal na “Tulakbala” upang alisin ang malas at negatibong enerhiya na naiwan ng presensiya ng mga guwardiya sa lugar.

Ito ay matapos ang 397 araw na presensiya ng mga guwardiya sa sitio na nandahas at nagtangkang paalisin ang mga katutubo sa kanilang mismong lupaing ninuno. Ngunit ayon sa mga residente, matagal nang nagsimula ang karahasang ito noon pa mang panahon ng Batas Militar noong 1974.

Kasama sa nagdiwang ang organisasyong Ateneo Para sa Bugsuk sa tagumpay ng mga katutubo at nakiisa sa kanilang laban sa isang pahayag.

“We commend the residents of Marihangin for their courage, dedication, and perseverance in the face of grave injustice […] As freedom from oppression remains elusive, we call on the entire Ateneo community, our fellow universities, religious institutions, and civil society to stand with the Sambilog-Balik Bugsuk Movement,” saad ng organisasyon sa pahayag.

Ngunit sa kabila ng tagumpay, nananatili ang pangamba sa mga susunod na hakbang na maaaring banta sa seguridad ng mga residente at sa kanilang lupain.

“Sobrang saya pero hindi dapat magpakampante dahil may mga binabalak si [Palawan second district Rep. Jose Chaves Alvarez] na hakbang na dapat [naming] mapaghandaan,” ayon sa isang katutubong Molbog na residente rin ng Sitio Marihangin.

Binanggit ng ilang residente ang umano’y plano na pagtatayo ng military barracks sa sitio na anila'y isang panibagong panghihimasok sa kanilang komunidad.

Ironikal, ang kongresistang si Alvarez rin umano ang tumulong sa pagpapaalis sa mga guwardiya ng SMC. Ngunit makalipas lamang ang sampung oras matapos ang tagumpay, dumating sa sitio ang 10 tauhan ni Alvarez nang walang paunang abiso, at nagsabing apat sa kanila ang mananatili upang “magbantay” kontra sa pagbabalik ng mga guwardiya.

Nilabag nito ang kasunduan sa pagitan ng mga residente ng sitio at mga kinatawan ni Alvarez.

Kinalaunan nang araw na iyon, umalis ang 10 tauhan ng kongresista matapos ang diyalogo sa mga residente, at umalis din kinabukasan ang 10 pulis na nakabantay sa sitio noon pang Nob. 2024.

Sa ngayon, muling bulnerable ang Marihangin sa anumang panghihimasok.

S'bang Ka Mindanao

15/08/2025

14/08/2025

14/08/2025

14/08/2025

12/08/2025

12/08/2025

06/08/2025

06/08/2025

05/08/2025

05/08/2025

04/08/2025

04/08/2025

Address

Telephone

Website

Alerts

Contact The Business

Shortcuts

Share