14/07/2026
SP MATI NAGTUKI SA FISH PORT EXPANSION, PLASTIC REDUCTION UG UBANG MGA PROGRAMA SA 28TH REGULAR SESSION
MATI CITY – Gihisgutan sa Sangguniang Panlungsod sa Dakbayan sa Mati ang nagkalain-laing executive orders, komunikasyon, ug mga hangyo sa panahon sa 28th Regular Session niadtong Hulyo 14, 2026.
Lakip sa mga gipahibalo sa konseho ang Executive Order No. 066, Series of 2026, nga nagmugna sa Design and Build Committee alang sa pagtukod sa Sanitary Landfill Cell 2 ug sa pag-retrofit sa wastewater treatment facility sa Sitio Tagbobolo, Barangay Sainz.
Gipahibalo usab ang Executive Order No. 079, nga nag-reorganisa sa Camp Coordination and Camp Management Committee (CCCMC) aron mapalig-on ang koordinasyon ug pagdumala sa mga evacuation camp panahon sa kalamidad.
Samtang, pinaagi sa Executive Order No. 082, gipasiugdahan sa City Government ang mas hugot nga pagpatuman sa mga lakang batok sa paggamit sa single-use plastics sa tanang opisina, pasilidad, programa, proyekto, ug opisyal nga kalihokan sa dakbayan isip kabahin sa kampanya alang sa environmental sustainability.
Gidawat usab sa konseho ang hangyo sa Baywalk Night Market Dry Goods and Vendors Association alang sa accreditation sa ilang organisasyon, nga girefer sa Committee on Cooperative and Livelihood alang sa dugang pagtuon.
Girefer usab sa Committee on Finance, Budget and Appropriations/Ways and Means ang pre-reviewed annual budget alang sa tuig 2026 sa Barangay Buso ug Barangay Libudon.
Lakip usab sa gihisgutan ang hangyo sa City Mayor alang sa pagpasa og resolusyon nga motugot kaniya sa pagpirma sa Supplemental Memorandum of Agreement (SMOA) uban sa Philippine Fisheries Development Authority (PFDA) alang sa pagpalapad sa Mati City Fish Port.
Girefer usab sa Committee on Peace and Order and Public Safety ang proposed memorandum of agreement tali sa City Government ug sa Council of Imams and Datus of the City of Mati alang sa implementasyon sa community-based anti-illegal drug prevention, rehabilitation, ug reintegration initiatives pinaagi sa City Anti-Drug Abuse Council (CADAC).
Samtang, girefer sa Committee on Health and Sanitation ang hangyo nga motugot sa City Mayor sa pagpirma sa commitment alang sa Mati Primary Care Facility Central ubos sa National Health Insurance Program (NHIP).
Ang maong mga komunikasyon ug hangyo ipadayon sa nagkalain-laing komite sa Sangguniang Panlungsod alang sa pagrepaso ug pagrekomenda sa angayng aksyon sa umaabot nga mga sesyon.
