https://www.facebook.com/951608468237007/

Ang Tanglaw : Ang Opisyal na Pahayagan ng Morong High School, Sumulong Street, San Juan, Morong (2026)

21/09/2026

‎[𝐄𝐃𝐈𝐓𝐎𝐑𝐘𝐀𝐋]

Setyembre 21, 1972. Isang petsa na nanatiling nakaukit sa kasaysayan ng Pilipinas—hindi lamang bilang isang araw na nagbago sa takbo ng bansa, kundi bilang simula ng isang panahong nag-iwan ng malalim na sugat sa lipunan.

Sa ilalim ng pamumuno ni Ferdinand E. Marcos Sr., ipinatupad ang Martial Law sa pamamagitan ng Proclamation No. 1081. Bagama't Setyembre 21 ang petsang karaniwang iniuugnay sa deklarasyon, ang Martial Law ay inihayag sa publiko noong Setyembre 23, matapos ang mga pangyayaring naganap sa mga naunang araw. Ang pagkakaibang ito mismo ay nagpapakita kung bakit mahalagang suriin ang kasaysayan nang may pag-iingat at batay sa mga dokumentadong tala.

Ngunit ang Martial Law ay hindi lamang isang petsa sa isang aklat-aralin.

Kasunod nito ang malawakang pagsasara ng mga institusyon ng pamamahayag at pag-aresto sa mga kritiko ng pamahalaan. Maraming Pilipino ang nakaranas ng paglabag sa kanilang mga karapatan, kabilang ang arbitraryong pagkakakulong, torture, at iba pang pang-aabuso. Ang 𝘏𝘶𝘮𝘢𝘯 𝘙𝘪𝘨𝘩𝘵𝘴 𝘝𝘪𝘰𝘭𝘢𝘵𝘪𝘰𝘯𝘴 𝘝𝘪𝘤𝘵𝘪𝘮𝘴' 𝘔𝘦𝘮𝘰𝘳𝘪𝘢𝘭 𝘊𝘰𝘮𝘮𝘪𝘴𝘴𝘪𝘰𝘯 ay patuloy na kumikilala at nagdodokumento sa mga biktima ng mga paglabag na ito.

Sa paglipas ng panahon, nagbabago ang paraan ng pag-alala natin sa nakaraan. May mga kuwento na maaaring mawala sa mga pahina ng kasaysayan, may mga salaysay na maaaring pagtalunan, at may mga impormasyong maaaring maiba ang pagkakalahad. Ngunit hindi dapat maging dahilan ang pagtatalo upang talikuran ang pagsasaliksik.

Ang kasaysayan ay hindi lamang tungkol sa kung ano ang gusto nating maalala. Ito ay tungkol sa kung ano ang kailangang malaman.

Bilang mga Pilipino, tungkulin nating kilalanin ang iba't ibang dokumento, testimonya, at rekord upang mas maunawaan ang tunay na lawak ng panahong iyon. Ang pag-alala ay hindi nangangahulugang pagsasabuhay muli ng nakaraan; nangangahulugan itong pagkatuto mula rito.

Limampu’t apat na taon man, isang siglo, o higit pa ang lumipas, nananatiling mahalaga ang tanong: Ano ang natutuhan natin?

Dahil kapag ang kasaysayan ay nakalimutan, mas madaling mawala ang konteksto ng mga pangyayaring humubog sa ating bansa. At kapag ang mga karanasan ng mga taong nabuhay sa panahong iyon ay hindi naipapasa sa susunod na henerasyon, nawawala rin ang pagkakataong maunawaan kung paano naaapektuhan ng kapangyarihan, pamahalaan, at mga institusyon ang buhay ng ordinaryong mamamayan.

Kaya sa tuwing sasapit ang Setyembre 21, hindi lamang isang petsa ang ating binabalikan. Binabalikan natin ang isang bahagi ng kasaysayan ng Pilipinas na nangangailangan ng pag-unawa, pagsusuri, at maingat na pag-alala.

Sapagkat ang kasaysayan ay hindi dapat piliin ayon sa kung ano ang komportable nating marinig. Dapat itong pag-aralan upang maunawaan natin kung saan tayo nanggaling—at kung paano haharapin ang kinabukasang ating binubuo.

Isinulat ni: Rania Ysabella F. Arnesto
Disenyo ni: Lindseymiel Dela Torre

20/09/2026

𝗦𝗨𝗟𝗬𝗔𝗣-𝗦𝗔𝗟𝗜𝗧𝗔 | 𝗛𝗶𝗺𝗮𝘆 𝗻𝗴 𝗧𝗶𝘁𝗶𝗸𝗮𝗻

Ang ating salita sa linggong ito ay “Kinaadman”

Kinaadman — malalim na kaalaman, karunungan, o talento na taglay ng isang tao na nakukuha sa pamamagitan ng karanasan at pag-aaral.

Kasingkahulugan: Karunungan, Kaalaman, Paham

Halimbawa sa pangungusap: “Layunin ng Ang Tanglaw na linangin ang kinaadman ng bawat miyembro upang maging tanglaw sila ng lipunan. ”

Sa bawat salita, may kahulugang dapat tuklasin at pahalagahan. Kaya, sabay-sabay nating sulyapan ang kagandahan ng ating wikang Filipino—isang salita bawat linggo.

Isinulat ni: Zabrina Kyla SJ. De Guzman

13/09/2026

𝗦𝗨𝗟𝗬𝗔𝗣-𝗦𝗔𝗟𝗜𝗧𝗔 | 𝗛𝗶𝗺𝗮𝘆 𝗻𝗴 𝗧𝗶𝘁𝗶𝗸𝗮𝗻

Ang ating salita sa linggong ito ay “Haraya.”

Haraya — ang kakayahan ng isip na lumikha ng mga imahe, ideya, o konsepto na wala sa kasalukuyang realidad; imahinasyon o bisyon.

Kasingkahulugan: Imahinasyon, Hiraya, Likhang-isip

Halimbawa sa pangungusap: “Sa tulong ng kanyang malawak na haraya, nakalikha ang manunulat ng isang kamangha-manghang mundo sa kanyang nobela.”

Sa bawat salita, may kahulugang dapat tuklasin at pahalagahan. Kaya, sabay-sabay nating sulyapan ang kagandahan ng ating wikang Filipino—isang salita bawat linggo.

Isinulat ni: Kheyla Marchelle DC. Vallestero

06/09/2026

𝗦𝗨𝗟𝗬𝗔𝗣-𝗦𝗔𝗟𝗜𝗧𝗔 | 𝗛𝗶𝗺𝗮𝘆 𝗻𝗴 𝗧𝗶𝘁𝗶𝗸𝗮𝗻

Ang ating salita para sa linggong ito ay “Kapuwa.”

Kapuwa — isang kasama o ibang tao bukod sa sarili. Lahat ng tao na kasama ng indibidwal sa lipunan.

Kasingkahulugan: Kasama, Kaparis, Katulad

Halimbawa sa pangungusap: “Huwag mong gawin sa iyong kapuwa ang hindi mo gustong gawin nila sa iyo.”

Sa bawat salita, may kahulugang dapat tuklasin at pahalagahan. Kaya, sabay-sabay nating sulyapan ang kagandahan ng ating wikang Filipino—isang salita bawat linggo.

Isinulat ni: Juan Marcelo G. Sto. Tomas

31/08/2026

𝗦𝗨𝗟𝗬𝗔𝗣-𝗦𝗔𝗟𝗜𝗧𝗔 | 𝗛𝗶𝗺𝗮𝘆 𝗻𝗴 𝗧𝗶𝘁𝗶𝗸𝗮𝗻

Magandang araw, LabSchool! Kami, Ang Tanglaw, ay magsisimulang magbahagi ng mga salita bawat linggo sa ating serye na tinatawag na “𝗦𝗨𝗟𝗬𝗔𝗣-𝗦𝗔𝗟𝗜𝗧𝗔 | 𝗛𝗶𝗺𝗮𝘆 𝗻𝗴 𝗧𝗶𝘁𝗶𝗸𝗮𝗻.” Layunin ng seryeng ito na palawakin ang ating kaalaman sa wikang Filipino at bigyang-halaga ang mga salita sa pamamagitan ng kanilang kahulugan, kasingkahulugan, at paggamit sa pangungusap.

Para sa unang salita ng linggong ito, ating kilalanin ang salitang “Tanglaw.”

Tanglaw — isang bagay o taong nagsisilbing ilaw, gabay, o patnubay.

Kasingkahulugan: liwanag, ilaw, gabay

Halimbawa sa pangungusap:
“Ikaw ang nagsisilbing tanglaw sa buhay ko sa bawat pagsubok na aking kinakaharap.”

Sa bawat salita, may kahulugang dapat tuklasin at pahalagahan. Kaya, sabay-sabay nating sulyapan ang kagandahan ng ating wikang Filipino—isang salita bawat linggo.

Likhang Pamagat ni: Rania Ysabella F. Arnesto
Isinulat ni: Lindseymiel Dela Torre
Disenyo ni: Kurt Cassandra R. Navarro

31/08/2026

𝗕𝗔𝗬𝗕𝗔𝗬𝗜𝗡: 𝗞𝗔𝗛𝗨𝗟𝗨𝗚𝗔𝗡 𝗔𝗧 𝗞𝗔𝗦𝗔𝗡𝗔𝗬𝗔𝗡

"Kung anong bigkas, siyang baybay."

Ang baybayin ay isang sinaunang sistema ng pagsusulat ng mga katutubo. Ito ay nagmula sa salitang "baybay" na nangangahulugang "to spell" sa ingles. Binubuo ito ng 17 na titik, 3 na katinig at 14 na patinig.

Ang estraktura nito ay itinuturing ehemplo ng "alpha-syllabary" o abugida na kada pantig na binabaybay dito ay may kaakibat na titik "a," ito ay napapalitan ng kaakibat sa pamamagitan ng mga kudlit (ᜊᜒ at ᜊᜓ), para naman sa nagiisang patinig ay dinagdag ang krus-kudlit (ᜊ᜔) para sa B17+ na bersyon ng baybayin.

Malalaman niyong madali lang aralin ang baybayin, ngunit kailangan pa rin ng masinsinang pananaliksik upang mapanatili ang tamang paggamit tulad ng pagsasalin mula sa ibang wika at pagsalin ng mga modernong titik tulad ng C, F, J, Ñ, Q, R, V, X, at Z.

Isinulat ni: Juan Marcelo G. Sto. Tomas
Disenyo ni: Kurt Cassandra R. Navarro

31/08/2026

[𝐋𝐀𝐓𝐇𝐀𝐋𝐀𝐈𝐍]

𝐊𝐚𝐛𝐚𝐲𝐚𝐧𝐢𝐡𝐚𝐧𝐠 𝐇𝐢𝐧𝐝𝐢 𝐊𝐚𝐢𝐥𝐚𝐧𝐦𝐚𝐧 𝐊𝐮𝐤𝐮𝐩𝐚𝐬

“Ang hindi marunong lumingon sa pinanggalingan ay hindi makakarating sa paroroonan.” Ang pahayag na ito, na iniuugnay kay Dr. Jose Rizal, ay patuloy na nagsisilbing paalala sa atin ng ating pinagmulan at ng mga ipinaglaban ng ating mga bayani para sa patuloy na pag unlad ng ating bayan.

Tuwing huling Lunes ng Agosto, ginugunita ng mga Pilipino ang Araw ng mga Bayani upang parangalan at bigyan ng halaga ang ating mga bayaning nag alay ng kanilang buhay at naglingkod para sa kalayaan ng ating bansa.

Ang Araw ng mga Bayani ay hindi lamang isang araw ng paggunita sa mga pangalang nakaukit sa mga monumento at nakasulat sa ating mga aklat ng kasaysayan. Ang araw na ito ay isang paalala sa mga sakripisyo na pinagdaanan ng mga Pilipino upang makamit ang kalayaan na tinatamasa natin ngayon. Mula kay Dr. Jose Rizal na ginamit ang kaniyang pluma upang ilahad ang paghihirap ng ating bansa sa panahon ng mga Espanyol, hanggang kay Andres Bonifacio na nanguna sa Katipunan upang ipaglaban ang kalayaan ng ating bayan, makikita natin ang mukha ng kabayanihang hindi kailanman kukupas.

Ngunit hindi natatapos ang kabayanihan sa nakaraan. Makikita pa rin natin ito sa kasalukuyan, at sa katunayan, bahagi na ito ng ating pang araw araw na buhay. Makikita ito sa ating mga g**o na humuhubog sa ating kinabukasan, sa mga doktor at nars na nag aalaga sa mga nangangailangan, sa mga magsasakang nagsisikap upang may pagkain sa ating hapag, at sa mga manggagawang patuloy na nagbibigay ng serbisyo sa kabila ng mga hamon sa kanilang buhay. Maging ang simpleng pagtulong at pagkilos para sa ibang tao ay maituturing ding anyo ng kabayanihan.

Hindi lahat ng bayani ay tanyag at kilala. Hindi nasusukat ang kabayanihan sa laki ng sakripisyo o sa dami ng tao na nakakakilala sa iyo. Minsan, nakikita natin ito sa maliliit na bagay—sa pagiging responsable, sa pagtulong sa ating kapwa, at sa paninindigan para sa tama.

Sa paggunita ng Araw ng mga Bayani, hindi lamang natin dapat bigyang pansin ang mga bayani na nag alay ng kanilang buhay para sa kalayaan. Nararapat din nating tanungin ang ating mga sarili kung paano natin maipapakita ang ating sariling kabayanihan, sapagkat ang halaga ng salitang kabayanihan ay hindi dapat nananatili sa nakaraan. Gaya ng paalala ni Dr. Jose Rizal tungkol sa mahalagang papel ng mga kabataan para sa kinabukasan ng bayan, nasa ating mga kamay ang pagpapatuloy ng kanilang ipinaglaban. Patuloy na mabubuhay ang diwa ng kabayanihan sa puso ng mga Pilipino at sa mga susunod na henerasyon sa pamamagitan ng pagpapatuloy ng hangarin nating gumawa ng mabuti para sa bayan.

Isinulat ni: Naomi Kirsten S. Salvador
Disenyo nina: Kurt Cassandra R. Navarro at Lindseymiel Dela Torre

28/08/2026

[𝐏𝐀𝐆𝐌𝐀𝐒𝐃𝐀𝐍]

𝗜𝗦𝗔𝗡𝗚 𝗠𝗔𝗟𝗔𝗞𝗜𝗡𝗚 𝗞𝗔𝗥𝗔𝗡𝗚𝗔𝗟𝗔𝗡! 🏆

Isang taos-pusong pagbati at pagkilala sa lahat ng mag-aaral na buong husay, sipag, at dedikasyong lumahok at nagbigay ng kanilang makakaya sa LABSCHOOL EVENT na ginanap noong 4PM-5PM sa Student center, Agosto 27, 2026!

Ang bawat pagsubok, paghahanda, at pagsisikap ay patunay ng inyong talento, determinasyon, at pagmamalaki sa inyong mga organisasyon. Tunay ngang ang tagumpay ay hindi lamang nasusukat sa pagkapanalo, kundi pati na rin sa tapang na lumahok at ibigay ang buong makakaya.

Sa kabila ng sunod-sunod na pag-ulan, bagyo, at mga suspensiyon ng klase, nanatiling matatag at determinado ang mga mag-aaral, G**o, at miyembro ng faculty upang maisakatuparan ang mga nakatakdang gawain. Sa pamamagitan ng kanilang pagtutulungan, tiyaga, at dedikasyon, matagumpay pa ring naisagawa at naidaos ang mga CLUB EVENTS.

Narito ang mga organisasyong nagpakita ng kanilang galing sa iba't ibang larangan:

• Ang Tanglaw — Debate

• Buklod Diwa sa Panitik (BDP) at Ang Tanglaw — Pagkuha ng Larawan at Pagsulat ng Editoryal

• SININGLAYA — Audition

• Buklod Diwa sa Panitik (BDP), Council of Leaders (COL), at SININGLAYA — Singing Bee

• Future Homemakers of the Philippines (FHP) — MasterChef at Slogan and Poster Making

• Sibol Agham at Future Homemakers of the Philippines (FHP) — Nutricell

• The English Society (TES) — Impromptu Speech

• Council of Leaders (COL) — Giants Olympiad

Sa lahat ng nakilahok, ipagpatuloy ninyo ang pagningning, paglikha, at pagbibigay-inspirasyon! 🌟

Muli, isang malaking pagbati sa inyong lahat! Ang inyong sipag at dedikasyon ay tunay na karapat-dapat kilalanin.

Isinulat ni: Kheyla Marchelle DC. Vallestero
Kuhang larawan ni: Rania Ysabella F. Arnesto

28/08/2026

[𝐏𝐀𝐆𝐌𝐀𝐒𝐃𝐀𝐍]

𝗘-𝗠𝗔𝗧𝗛 𝗕𝗜𝗡𝗚𝗢 | 𝗠𝗔𝗧𝗛-𝗔-𝗠𝗔𝗧𝗥𝗜𝗫 & 𝗠𝗔𝗧𝗛𝗦𝗖𝗜𝗘-𝗬𝗔 𝗘𝗩𝗘𝗡𝗧 𝟮𝟬𝟮𝟲

Naging matindi at kapana-panabik ang kompetisyon ng E-Math Bingo na ginanap sa Student Center ng University of Rizal System—Morong. Ang aktibidad na ito ay pinangunahan ng organisasyong Math-A-Matrix at MathScie-ya na dinaluhan ng mga mag-aaral mula sa bawat baitang na nahati sa dalawang pangkat.

Ang lahat ng kalahok ay sumalang sa tatlong regular na rounds at sa isang matinding blackout round kung saan nakita ang kanilang bilis at talino. Sa kategoryang baitang 7 hanggang 9 na naganap ng 12:00 ng tanghali hanggang 1:00 ng hapon. Nanalo sina Samantha Aerith C. Elaco at Markiesha Genn B. Mendoza para sa unang round. Nagwagi naman si Wilyzzah Beatriz S. Rio sa ikalawang round, habang si Reign Mariellee Tiburcio ang nanaig sa ikatlong round. Hindi naman nagpatinig si Steven Jaymhar SJ. De Ungria na siyang nagkamit ng panalo para sa unang pangkat ng black-out round.

Sa sumunod na pangyayari na naganap ng 1:00 ng hapon na nagpatuloy hanggang 2:00 ng hapon, naging matindi din ang paligsahan sa pangkat ng baitang 10 hanggang 12. Sinimulan ni Nina Lindsay SJ. Landas ang tagumpay sa unang round, na sinundan naman ni Franchesca Louise N. Maniago sa ikalawang round. Tinanghal namang nanalo si Nicky Francheska B. Cinco sa ikatlong round, at tuluyang nakuha ni Neo Nigell F. Sarcia ang panalo para sa pangalawang pangkat ng black-out round.

Binigyan ng masigabong palakpakan at hiyawan ang mga nagwagi sa paligsahan na ito. Pinakita ng Math-A-Matrix at MathScie-ya na ang asignaturang Matematika ay maaring maging isang masiya at kapanapanabik na aktibidad.

Isinulat ni: Paul Yohan Tinagan
Kulang larawan nina: Mark Angelo A. Salinding at mga Opisyal ng Math-A-Matrix & MathScie-ya

28/08/2026

[𝐏𝐀𝐆𝐌𝐀𝐒𝐃𝐀𝐍]

𝗗𝗘𝗕𝗔𝗧𝗘 𝗔𝗧 𝗜𝗠𝗣𝗥𝗢𝗠𝗣𝗧𝗨 𝗦𝗣𝗘𝗘𝗖𝗛 | 𝗔𝗡𝗚 𝗧𝗔𝗡𝗚𝗟𝗔𝗪 & 𝗧𝗛𝗘 𝗘𝗡𝗚𝗟𝗜𝗦𝗛 𝗦𝗢𝗖𝗜𝗘𝗧𝗬 𝗘𝗩𝗘𝗡𝗧 𝟮𝟬𝟮𝟲

Sa ika-27 ng Agosto 2026, pinangunahan ng mga opisyal ng Ang Tanglaw ang 𝗗𝗘𝗕𝗔𝗧𝗘 na ginanap sa AVR. Nagsimula ito ng 12:50 at nagtapos ng 2:00 ng hapon.

Ang aktibidad na ito ay higit na nagpatalas sa kakayahan at nagpakita ng kagalingan ng bawat estudyante sa Laboratory School. Ipinamalas ng mga kalahok ang kanilang husay sa pangangatwiran, kritikal na pag-iisip, at malinaw na paglalahad ng kanilang mga pananaw.

Sumunod namang isinagawa ang 𝗜𝗠𝗣𝗥𝗢𝗠𝗣𝗧𝗨 𝗦𝗣𝗘𝗘𝗖𝗛, na pinangunahan ng mga opisyal ng The English Society. Nagsimula ito ng 2:30 ng hapon at nagtapos ng 3:30 ng hapon.

Ipinakita rito ng mga estudyante ang kanilang kakayahang mag-isip nang mabilis, bumuo ng sagot, at magpahayag nang malinaw at maayos ang kanilang mga ideya.

Sa kabuuan, maayos na naisagawa ng parehong organisasyon ang mga aktibidad, na nagbigay ng pagkakataon sa mga estudyante na mahasa ang kanilang kakayahan.

Isinulat ni: Lindseymiel Dela Torre
Kuhang larawan nina: Kurt Cassandra R. Navarro, Naomi Kirsten S. Salvador, at Mikeila Ayesha M. Vivar

Ang Tanglaw : Ang Opisyal na Pahayagan ng Morong High School

21/09/2026

20/09/2026

13/09/2026

06/09/2026

31/08/2026

31/08/2026

31/08/2026

28/08/2026

28/08/2026

28/08/2026

Address

Website

Alerts

Shortcuts

Share

Listing takedown request